ଭଦ୍ରକ: ସୋସିଆଲ ମିଡିଆ (ଫେସବୁକ) ପୋଷ୍ଟକୁ ନେଇ ଭଦ୍ରକ ପୌରାଞ୍ଚଳ ଅନ୍ତର୍ଗତ ପୁରୁଣା ବଜାର ଥାନା ଅଞ୍ଚଳରେ ହିଂସା ପରେ ପୋଲିସ ଛାଉଣୀରେ ପରିଣତ ହୋଇଛି ସମଗ୍ର ଭଦ୍ରକ ସହର । ଧାରା-163 ସହ ବ୍ୟାପକ ପୋଲିସ ଫୋର୍ସ ମୁତୟନ ହୋଇଛନ୍ତି । ୪୮ ଘଣ୍ଟା ପାଇଁ ଇଣ୍ଟରନେଟ ସେବାକୁ ମଧ୍ୟ ବନ୍ଦ କରାଯାଇଛି । ୩୦ ତାରିଖ ରାତି ୨ଟା ପର୍ଯ୍ୟନ୍ତ ସହରରେ ସମସ୍ତ ଇଣ୍ଟରନେଟ ସେବା ବନ୍ଦ ରଖିବାକୁ ଗୃହ ବିଭାଗ ନିର୍ଦ୍ଦେଶ ଦେଇଛି । ବର୍ତ୍ତମାନ ସୁଦ୍ଧା ହିଂସାରେ ସମ୍ପୃକ୍ତ ୯ ଜଣଙ୍କୁ ପୋଲିସ ଅଟକ ରଖିଛି । ଉପଦ୍ରବୀଙ୍କ ଉପରେ ନଜର ରଖାଯାଇଛି । କାର୍ଯ୍ୟାନୁଷ୍ଠାନ ଆଧାରରେ ଗିରଫଦାରୀ ସଂଖ୍ୟା ମଧ୍ୟ ବଢିପାରେ ।
- ବନ୍ଦ ହେଲା ଇଣ୍ଟରନେଟ :-
ଗୃହ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁଙ୍କ ଦ୍ବାରା ଜାରି କରାଯାଇଥିବା ନିର୍ଦ୍ଦେଶନାମାରେ ଦର୍ଶାଯାଇଛି ଯେ, ଭଦ୍ରକ ଓ ଧାମନଗରରେ ସୋସିଆଲ ମିଡିଆ ପୋଷ୍ଟକୁ ନେଇ ହିଂସା ଓ ସାମ୍ପ୍ରଦାୟିକ କାର୍ଯ୍ୟକଳାପ ଦେଖାଯାଇଛି । ଭାରତୀୟ ଟେଲିଗ୍ରାଫ ଆକ୍ଟ-1985 ଅନୁସାରେ, ଏହି ସ୍ଥାନରେ ସମସ୍ତ ପ୍ରକାର ମୋବାଇଲ ଡାଟା ସେବା ଓ ଫେସବୁକ, ଓ୍ବାଟ୍ସଆପ, ଇନଷ୍ଟାଗ୍ରାମ ଓ ‘ଏକ୍ସ’ ପରି ସମସ୍ତ ସୋସିଆଲ ମିଡିଆ ପ୍ଲାଟଫର୍ମର ସଞ୍ଚାଳନ ଉପରେ କଟକଣା ଜାରି କରାଯାଇଛି । ଆସନ୍ତା ୪୮ ଘଣ୍ଟା ଅର୍ଥାତ ସେପ୍ଟେମ୍ବର ୩୦ ତାରିଖ ରାତି ୨ଟା ପର୍ଯ୍ୟନ୍ତ ଏହି କଟକଣା ବଳବତ୍ତର ରହିବ । ସ୍ଥିତିକୁ ଅନୁଧ୍ୟାନ କରିବା ପରେ ପରବର୍ତ୍ତୀ ନିଷ୍ପତ୍ତି ଗ୍ରହଣ କରାଯିବ ।
- ବିଳମ୍ବିତ ରାତିରେ ପୋଲିସ ଓ ପ୍ରଶାସନିକ ଅଧିକାରୀଙ୍କ ବୈଠକ:
ଗତକାଲି(ଶୁକ୍ରବାର) ବିଳମ୍ବିତ ରାତିରେ ପୂର୍ବାଞ୍ଚଳ ଡିଆଇଜି ସତ୍ୟଜିତ ନାୟକ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ । ଡିଆଇଜିଙ୍କ ସହ ଭଦ୍ରକ ଜିଲ୍ଲାପାଳ, ଏସପିଙ୍କ ସମେତ ସମସ୍ତ ଅଧିକାରୀ ବିଳମ୍ବିତ ରାତିରେ ହିଂସା ପ୍ରଭାବିତ ସ୍ଥାନରେ ସ୍ଥିତି ପରଖିବା ସହ ନିଜେ ଫ୍ଲାଗମାର୍ଚ୍ଚରେ ସାମିଲ ହୋଇଥିଲେ । ସ୍ଥିତି ଏବେ ନିୟନ୍ତ୍ରଣରେ ରହିଛି । ସମସ୍ତ ସମ୍ପ୍ରଦାୟର ମୁରବୀ ଶ୍ରେଣୀର ବ୍ୟକ୍ତି, ଜନ ପ୍ରତିନିଧି, ବୁଦ୍ଧିଜୀବୀଙ୍କ ସହ ପ୍ରଶାସନ ନିରନ୍ତର ଯୋଗାଯୋଗରେ ଅଛି । ଏକ ଶାନ୍ତି କମିଟି ଗଠନ କରିବା ପାଇଁ ପ୍ରୟାସ କରାଯାଉଥିବା ଡିଆଇଜି କହିଛନ୍ତି ।
- 10 ପ୍ଲାଟୁନ ଫୋର୍ସ ମୁତୟନ:-
ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଭାରତୀୟ ନ୍ୟାୟ ସଂହିତା (BNSS) ଧାରା-163 ଧାରା ଜାରି ରହିଛି । ସହରରେ ୧୦ ପ୍ଲାଟୁନ ପୋଲିସ ଫୋର୍ସ ମୁତୟନ ରହିଛନ୍ତି । ଗତକାଲି ରାତିରେ ପୋଲିସ୍ ଫ୍ଲାଗମାର୍ଚ୍ଚ ସହ ଭେଇକିଲ ପାଟ୍ରୋଲିଂ ମାର୍ଚ୍ଚ ମଧ୍ୟ କରିଛି । ଅଞ୍ଚଳ ମଧ୍ୟକୁ ଯାତାୟତ କରୁଥିବା ସମସ୍ତ ଗାଡ଼ିଗୁଡ଼ିକୁ ଯାଞ୍ଚ ସହ ବିଭିନ୍ନ ସ୍ଥାନରେ ନକାବନ୍ଦୀ କରାଯାଉଛି । ଏଥିସହ ଲୋକମାନଙ୍କୁ ଏକାଠି ହେବା ଉପରେ ଡାକବାଜୀ ମାଧ୍ୟମରେ କଟକଣା ଜାରି କରାଯାଇଛି ।
- ଧାମନଗରରେ ମଧ୍ୟ ଉତ୍ତେଜନା:-
ଭଦ୍ରକ ପରେ ଧାମନଗର ଥାନା ସମ୍ମୁଖରେ ମଧ୍ୟ ଉତ୍ତେଜନା ଦେଖିବାକୁ ମିଳିଛି । ଗତକାଲି ରାତିରେ ଏକ ନିର୍ଦ୍ଦିିଷ୍ଟ ଗୋଷ୍ଠୀର ଶତାଧିକ ଲୋକ ଥାନା ଘେରାଉ କରିବା ସହ ଟାୟାର ଜାଳି ରାସ୍ତାରୋକ କରିଥିଲେ । ତେଣୁ ଧାମନଗର ବିଜ୍ଞାପିତ ଅଞ୍ଚଳ ପରିଷଦ (ଏନଏସି), ଦୋବଲ ଏବଂ ଏହାର ଆଖପାଖ ଅଞ୍ଚଳରେ ମଧ୍ୟ ଅନିର୍ଦ୍ଦିଷ୍ଟ କାଳ ପାଇଁ ଭାରତୀୟ ନାୟ ସଂହିତାର ଧାରା-163 ଜାରି ହୋଇଛି । ଏହା ସହ ଏହି ଅଞ୍ଚଳରେ ମୋବାଇଲ ଇଣ୍ଟରନେଟ ସେବା ମଧ୍ୟ ୪୮ ଘଣ୍ଟା ପାଇଁ ବନ୍ଦ ରଖାଯାଇଛି । କୌଣସି ସ୍ଥାନରେ ଅନାବଶ୍ୟକ ଭାବେ ଏକାଠି ନହେବା ପାଇଁ ପୋଲିସ ଓ ପ୍ରଶାସନ ପାଟ୍ରୋଲିଂ କରୁଛି ।
କାହିଁକି ହେଲା ବିବାଦର ସୂତ୍ରପାତ:-
ସୂଚନା ଅନୁସାରେ, ଗୁରୁବାର ଜଣେ ଯୁବକ ସୋସିଆଲ ମିଡ଼ିଆରେ ବିବାଦୀୟ ପୋଷ୍ଟ କରିଥିବା ଅଭିଯୋଗ ହୋଇଥିଲା । ଏହାକୁ ପ୍ରତିବାଦ କରି ଅନ୍ୟ ଏକ ସମ୍ପ୍ରଦାୟର ଲୋକମାନେ ଥାନାରେ ଏତଲା ଦେଇଥିଲେ । ପୋଲିସ ଏହି ଘଟଣାର ତଦନ୍ତ କରୁଥିବା ବେଳେ ଗତକାଲି ନଙ୍ଗାମହଲାରେ ହଠାତ ନିର୍ଦ୍ଦିଷ୍ଟ ଗୋଷ୍ଠୀର ଲୋକେ ଏକାଠି ହୋଇଥିଲେ । ସେମାନେ ସନ୍ଥିଆ ପୋଲ ନିକଟରେ ଟାୟାର ଜାଳି ରାସ୍ତା ଅବରୋଧ କରିଥିବା ଖବର ପାଇ ପୋଲିସ ଏବଂ ମାଜିଷ୍ଟ୍ରେଟ ଘଟଣାସ୍ଥଳକୁ ଆସୁଥିବା ବେଳେ ଉକ୍ତ୍ୟକ ଯୁବକମାନେ ପୋଲିସ ଓ ତହସିଲଦାରଙ୍କ ଉପରକୁ ଟେକା ପଥର ମାଡ଼ କରିଥିଲେ । ଏଥିରେ ଏକାଧିକ ପୋଲିସ କର୍ମୀ ମଧ୍ୟ ଆହତ ହୋଇଥିଲେ ।
ଇଟିଭି ଭାରତ, ଭଦ୍ରକ
