ବାଲେଶ୍ବର: ୮ ବର୍ଷର ଜିତେନ୍ଦ୍ର, କଅଁଳ ବୟସରେ ସହୁଛି ଅସହ୍ୟ ଯନ୍ତ୍ରଣା । ଯେଉଁ ବୟସରେ ଖେଳକୁଦ କରି ପାଠ ପଢିବା କଥା ସେହି ବୟସରେ ମେଡିକାଲ ଦୌଡ଼ି ଦୌଡ଼ି ଥକି ପଡ଼ିଲାଣି ସେ । ଜୀବନକୁ ଭଲ ଭାବରେ ଚିହ୍ନି ନଥିବା କୁନି ପିଲାଟିକୁ ଜୀବନ ସହ ସଂଗ୍ରାମ କରିବାକୁ ପଡୁଛି । ଖାଦ୍ୟନଳୀ ହୃତପିଣ୍ଡ ସହ ଯୋଡି ହୋଇଯିବା କାରଣରୁ ସଠିକ ଭାବରେ ଖାଇ ହେଉଛି ନା ନିଶ୍ୱାସ ନେଇ ହେଉଛି ।
ଆମେ କହୁଛୁ ବାଲେଶ୍ୱର ଜିଲ୍ଲା ରେମୁଣା ବ୍ଲକ ଅର୍ନ୍ତଗତ ଗୁଡୁଦା ପଞ୍ଚାୟତ ଗୁଡୁଦା ଗାଁର ମନୋଜ ମନ୍ତ୍ରୀଙ୍କ ପୁଅ ଜିତେନ୍ଦ୍ର କଥା । ବାପା ଦିନ ମଜୁରିଆ ଭାବେ କାମ କରୁଥିବା ବେଳେ ପୁଅର ଚିକିତ୍ସା ପାଇଁ ଅର୍ଥ କେଉଁଠୁ ଆଣିବେ ତାକୁ ନେଇ ଚିନ୍ତା । ଦିନକୁ ଦିନ ଜିତେନ୍ଦ୍ରର ସ୍ବାସ୍ଥ୍ୟ ସମସ୍ୟା ବଢ଼ି ବଢ଼ି ଚାଲଛି ।
ହୃତପିଣ୍ଡ ସହ ଯୋଡ଼ି ହୋଇଛି ଖାଦ୍ୟନଳୀ :
2019 ମସିହାରେ ଜିତେନ୍ଦ୍ରଙ୍କ ଦେହ ଖରାପ ହେବା ପରେ ଡାକ୍ତରଙ୍କୁ ଦେଖାଇଥିଲେ । ଜଣାପଡ଼ିଥିଲା ଯେ ତାଙ୍କର ଖାଦ୍ୟନଳୀ ହୃତପିଣ୍ଡ ସହ ଯୋଡି ହୋଇଯାଇଛି । ଫଳରେ ସେ କିଛି ଖାଦ୍ୟ ଖାଇପାରୁ ନଥିଲା । ଏହାପରେ ଟଙ୍କା ଯୋଗାଡ କରି ପରିବାର ଲୋକେ ଯୋଡି ହୋଇଥିବା ଖାଦ୍ୟନଳୀକୁ ହୃତପିଣ୍ଡରୁ ଅଲଗା କରିବା ପାଇଁ ଅପରେସନ କରିଥିଲେ । କିନ୍ତୁ ଗତ ଏକ ମାସ ହେବ ସମାନ ସ୍ଥିତି । ପୁଣି ଥରେ ହୃତପିଣ୍ଡ ସହ ଖାଦ୍ୟନଳୀଟି ଯୋଡି ହୋଇଯାଇଛି । ଫଳରେ ଖାଦ୍ୟ ଖାଇ ହେଉନଥିବାରୁ ତରଳ ଖାଦ୍ୟ ଖାଇବାକୁ ପଡୁଛି । ଏବେ ପୁଣିଥରେ ଅପରେସନ କରିବାକୁ ପଡିବ ବୋଲି ଡାକ୍ତର କହିଛନ୍ତି । ପରିବାରର ଆର୍ଥିକ ଅବସ୍ଥା ଭଲ ନଥିବାରୁ କିପରି ଚିକିତ୍ସା ହେବ ସେନେଇ ତିନ୍ତାରେ ପୁଅଟିର ମାଆ କବିତା । ସମସ୍ତେ ତାଙ୍କ ସାହାଯ୍ୟ କରିବାକୁ ସେ ନିବେଦନ କରିଛନ୍ତି ।
ପୁଅର କଷ୍ଟ ଦେଖି ମାଆ ଆଖିରୁ ସୁଖୁନି ଲୁହ:
ପୁଅର ଏପରି ଅବସ୍ଥା ଦେଖି କଷ୍ଟ ସହିପାରୁନି ମାଆ । ଆଖିରୁ ଲୁହ ସୁଖୁନି କି ପେଟରେ ଦାନା ପଡୁନି । କେମିତି ପୁଅର ଚିକିତ୍ସା କରିବେ ତାକୁ ନେଇ ଚିନ୍ତାରେ । ଜିତେନ୍ଦ୍ରଙ୍କ ବାପା ଦିନ ମଜୁରିଆ ହୋଇଥିବା ବେଳେ ଏବେ କେମିତି ଅପରେସନ କରିବେ ପୁଅର ସେ କଥା ଭାବିଲେ ଆଖିକୁ ନିଦ ଆସୁନି କି ପେଟକୁ ଭୋକ ହେଉନି । ପୁଅର ଏମିତି ଅବସ୍ଥା ପାଇଁ ବାର ଦୁଆର ବୁଲି ସହାୟତା ମାଗୁଛି ମାଆ । ମାଆ କବିତା ମନ୍ତ୍ରୀ କହିଛନ୍ତି ଯେ, " ଖାଦ୍ୟନଳୀଟି ହୃତପିଣ୍ଡ ସହ ଯୋଡି ଆମେ 2019 ରେ ପୁଅର ଅପରେସନ ଏମ୍ସରେ କରିଥିଲୁ । ସେତେବେଳେ ବହୁତ ଟଙ୍କା ଖର୍ଚ୍ଚ ହୋଇଥିଲା । ଧାର କରଜ କରିକି ପୁଅକୁ ଭଲ କରିଥିଲୁ । ସେ ସମୟର ସରକାରଙ୍କୁ ଚିଠି ଲେଖିଥିଲୁ ସହାୟତା ପାଇଁ । ସେତେବେଳେ ନବୀନ ସରକାର ଆମକୁ ଆଶ୍ବସନା ଦେଇଥିଲେ । ଅପରେସନ ପରେ ମୋ ପୁଅ ଭଲ ହେଇକି ଘରକୁ ଫେରିଥିଲା ।
ପୁଅର ଜୀବନ ବଞ୍ଚାଇ ଦେବାକୁ ଆକୁଳ ନିବେଦନ:
"ସମସ୍ତ ଓଡ଼ିଶାବାସୀଙ୍କୁ ଅନୁରୋଧ କରୁଛି ମୋ ପୁଅକୁ ବଞ୍ଚେଇ ଦିଅନ୍ତୁ। ତାର ହାର୍ଟରେ ଖାଦ୍ୟ ନଳୀ ଛନ୍ଦି ଯାଇଛି, ଏଥିପାଇଁ ପୁଅ କିଛି ଖାଉନି । ରକ୍ତ ଅଭାବ ବି ହେଇଗଲାଣି, ଆଖି କଷ ଭଳି ଦେଖା ଗଲାଣି । ବାଲେଶ୍ବର ସାଂସଦଙ୍କୁ କହିବାରୁ ସେ ସାହାଯ୍ୟ କରିବେ ବୋଲି କହିଛନ୍ତି । ଜିଲ୍ଲାପାଳଙ୍କୁ ଅବଗତ ମଧ୍ୟ କରାଇଛୁ । ସମସ୍ତେ ଆମକୁ ସାହାଯ୍ୟ କରନ୍ତୁ । '' ପୁଅର ଜୀବନ ପାଇଁ ଏଭଳି କାକୁତି ମିନତି କରିଛନ୍ତି ମାଆ କବିତା ।
ଇଟିଭି ଭାରତ, ବାଲେଶ୍ବର
