ଭୁବନେଶ୍ୱର: ସ୍ବାସ୍ଥ୍ୟସେବା କ୍ଷେତ୍ରରେ ଯୋଡ଼ି ହେଲା ଡ୍ରୋନର । ଏମ୍ସ ଭୁବନେଶ୍ବରରୁ ରକ୍ତ ନେଇ ଟାଙ୍ଗି ଗଲା ଡ୍ରୋନ । ସ୍ବାସ୍ଥ୍ୟସେବା କ୍ଷେତ୍ରରେ ଡ୍ରୋନର ସାହାଯ୍ୟ । ଏମ୍ସ ଭୁବନେଶ୍ବରରୁ ରକ୍ତ ନେଇ ଟାଙ୍ଗି ଗଲା ଡ୍ରୋନ । ଅପହଞ୍ଚ ଇଲାକା, ପ୍ରାକୃତିକ ଦୁର୍ବିପାକ ସମୟରେ ସଠିକ୍ ସମୟରେ ଅତ୍ୟାବଶ୍ୟକ ଔଷଧ ସାମଗ୍ରୀ ଯୋଗାଣରେ ପ୍ରମୁଖ ଭୂମିକା ଗ୍ରହଣ କରିବ । ଏକକାଳୀନ ଭାବରେ ୨ ରୁ ୫ କେଜି ପର୍ଯ୍ୟନ୍ତ ବିଭିନ୍ନ ସାମଗ୍ରୀ ବହନ କରିବାର କ୍ଷମତା ରହିଛି ।
ସ୍ବାସ୍ଥ୍ୟସେବା କ୍ଷେତ୍ରରେ ଅଗ୍ରଣୀ ଭୂମିକା ଗ୍ରହଣ କରିଛି ଡ୍ରୋନ ସ୍ବାସ୍ଥ୍ୟ ସେବା । ମେଡିକାଲ୍ ସାଇନ୍ସ୍ ସହିତ ପ୍ରଯୁକ୍ତି ବିଦ୍ୟାର ସମ୍ମିଶ୍ରଣରେ ପ୍ରୟୋଗ ପୂର୍ବକ ସ୍ବାସ୍ଥ୍ୟସେବା କ୍ଷେତ୍ରରେ ଡ୍ରୋନ୍ର ଉପଯୋଗ ନିମନ୍ତେ ଆଜି ସଫଳତାର ସହିତ ରୋଗୀଙ୍କ ପାଖକୁ ରକ୍ତ ପଠାଯାଇଛି । ଭୁବନେଶ୍ବର ଏମ୍ସ କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଆଶୁତୋଷ ବିଶ୍ବାସଙ୍କ ପ୍ରତ୍ୟେକ୍ଷ ତତ୍ତ୍ବାବଧାନରେ ହୋଇଥିବା ଏହି ଡ୍ରୋନ୍ ଉଡ଼ାଣ ଏମ୍ସ ପରିସରରୁ ଆରମ୍ଭ ହୋଇ ଟାଙ୍ଗି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପର୍ଯ୍ୟନ୍ତ ଯାଇଛି । ମାତ୍ର ୩୫ ମିନିଟ୍ ମଧ୍ୟରେ ଏହି ଡ୍ରୋନ୍ ୬୦ କିଲୋମିଟର ଅତିକ୍ରମ କରିଛି । ପୁନର୍ବାର ଟାଙ୍ଗିରୁ ଉଡ଼ାଣ ଆରମ୍ଭ କରି ଏମ୍ସକୁ ପ୍ରତ୍ୟାବର୍ତ୍ତନ କରିଛି ।
ତେବେ ମୋଟ ୧୨୦ କିଲୋମିଟରର ସଫଳ ଯାତ୍ରାକୁ ମାତ୍ର ଏକ ଘଣ୍ଟା ୧୦ ମିନିଟ୍ ମଧ୍ୟରେ ସମାପ୍ତ କରି ସଫଳତା ହାସଲ କରିଛି । ଏହି ଯାତ୍ରା କାଳରେ ଡ୍ରୋନ୍ରେ ଯୋଗାଣ ନିମନ୍ତେ ପ୍ରାୟ ୨ କିଲୋଗ୍ରାମ୍ ଓଜନର ରକ୍ତ ଏବଂ ଅନ୍ୟାନ୍ୟ ଔଷଧୀୟ ସାମଗ୍ରୀ ରଖାଯାଇଛି । ଡ୍ରୋନ୍ ମାଧ୍ୟମରେ ଔଷଧ ଏବଂ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ବିତରଣ ଗ୍ରାମାଞ୍ଚଳ, ଆଦିବାସୀ ଏବଂ ଅର୍ଦ୍ଧ ସହରାଞ୍ଚଳରେ ସ୍ବାସ୍ଥ୍ୟ ସେବାକୁ ବୃଦ୍ଧି କରିବ ।
ତେବେ ଏହି ଡ୍ରୋନ୍ ମାଧ୍ୟମରେ ଟିକା, ଅତ୍ୟାବଶ୍ୟକ ଔଷଧ, ରକ୍ତ ସହିତ ଅନ୍ୟାନ୍ୟ ଏକାଧିକ ପରୀକ୍ଷଣ ସାମଗ୍ରୀ ବହନ କରାଯାଇପାରିବ । ଗୁଣବତ୍ତାପୂର୍ଣ୍ଣ ସ୍ବାସ୍ଥ୍ୟସେବା ଯୋଗାଣରେ ପ୍ରମୁଖ ଭୂମିକା ଗ୍ରହଣ କରିଥିବା ଏମ୍ସ ଭୁବନେଶ୍ବର ଓଡ଼ିଶାବାସୀଙ୍କ ଆବଶ୍ୟକ ସମୟରେ ତ୍ବରିତ ସେବା ଯୋଗାଇଦେବା ନିମନ୍ତେ ଏପରି ପଦକ୍ଷେପ ଗ୍ରହଣ କରିଥିବା କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଆଶୁତୋଷ ବିଶ୍ବାସ ସୂଚନା ଦେଇଛନ୍ତି ।
ସେ ଆହୁରୀ ମଧ୍ୟ କହିଛନ୍ତି ଯେ ଯେକୌଣସି ପ୍ରାକୃତିକ ବିପର୍ଯ୍ୟୟ ସମୟରେ ଡ୍ରୋନ୍ ସେବା ଏକ ପ୍ରମୁଖ ଭୂମିକା ଗ୍ରହଣ କରିପାରିବ । ଭୌଗୋଳିକ ପ୍ରତିବନ୍ଧକକୁ ଦୂର କରିବା ସହିତ ଜରୁରୀକାଳୀନ ଔଷଧ, ରକ୍ତ ନମୁନା, ରକ୍ତ ଆଦିକୁ ଦୁର୍ଗମ ଅଞ୍ଚଳରେ ଚିକିତ୍ସା ଯୋଗାଣକୁ ସୁନିଶ୍ଚିତ କରିବ । ଆଜି ଅନୁଷ୍ଠିତ ଏହି ଡ୍ରୋନ୍ ପ୍ରାୟ ୫କେଜି ପର୍ଯ୍ୟନ୍ତ ସାମଗ୍ରୀ ବହନ କରିବା କ୍ଷମତା ରଖିଛି । ଏଥି ସହିତ ଏହା ପ୍ରାୟ ୧୬୦ କିମି ପର୍ଯ୍ୟନ୍ତ ଯାତ୍ରା କରିପାରିବ । ପ୍ରଧାନମନ୍ତ୍ରୀ ସ୍ବାସ୍ଥ୍ୟ ସୁରକ୍ଷା ଯୋଜନା ଅନ୍ତର୍ଗତ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟର ପଦକ୍ଷେପ ଅନୁଯାୟୀ, ଦୁର୍ଗମ ଅଞ୍ଚଳରେ ରହୁଥିବା ଲୋକଙ୍କ ପାଇଁ ସ୍ବାସ୍ଥ୍ୟସେବା ଉପଲବ୍ଧତାକୁ ସୁଦୃଢ଼ କରିବା ନିମନ୍ତେ ଏହି ପ୍ରୟୋଗ କରାଯାଉଛି ।
ଇଟିଭି ଭାରତ , ଭୁବନେଶ୍ବର
