କଟକ: ସୋମବାର ଭାରତୀୟ ନ୍ୟାୟ ସଂହିତା ଲାଗୁ ହୋଇଥିବା ବେଳେ, କଟକ କମିସନରେଟ୍ ପୋଲିସର ପ୍ରଥମ ମାମଲା ଜଗତପୁର ଥାନାରେ ରୁଜୁ ହୋଇଛି । ସ୍ଥାନୀୟ ପୀରବଜାରର ଜିଶାନ୍ ଖାଁ ନାମକ ଜଣେ ବ୍ୟକ୍ତି ଏହି ମାମଲା ରୁଜୁ କରିଛନ୍ତି । ଜିସନ ବାଇକରେ ଆସୁଥିବା ସମୟରେ ଜଣେ ଅଜଣା ବ୍ୟକ୍ତି ତାଙ୍କୁ ଅଟକାଇ ଚାପୁଡ଼ା ମାରିଥିଲେ । ଅଶ୍ଳୀଳ ଭାଷାରେ ଗାଳି ଗୁଲଜ କରିଥିବା ନେଇ ଥାନାରେ ମାମଲା ଦାୟର କରିଛନ୍ତି । ଜିଶାନ୍ ଜଗତପୁର ଥାନାରେ ଅଭିଯୋଗ ଦେବା ପରେ ପୋଲିସ ତାଙ୍କ ମାମଲା ରୁଜୁ କରିଛି ।
ଭାରତୀୟ ନ୍ୟାୟ ସଂହିତ ଧାରା ୧୨୬(୨)- ହଠାତ ରାସ୍ତା ଅବରୋଧ କରିବା, ୨୯୬-ଗାଳିଗୁଲଜ କରିବା, ୧୧୫(୨)- ଆକ୍ରମଣ କରିବା, ୩୫୧(୩)-ଜୀବନରୁ ମାରିଦେବାକୁ ଧମକ ଦେବା ଆଧାରରେ ଏହି ମାମଲାଟି ରୁଜୁ ହୋଇଛି । ତେବେ ଖବର ଲେଖା ହେବା ପର୍ଯ୍ୟନ୍ତ କଟକ କମିଶନରେଟ ପୋଲିସ ଅଞ୍ଚଳରେ ନୂଆ ଆଇନରେ ୧୨ଟି ମାମଲା ରୁଜୁ କରାଯାଇଥିବା ନେଇ ଅତିରିକ୍ତ ଡିସିପି ସୂଚନା ଦେଇଛନ୍ତି । ନୂଆ ଆଇନରେ ପୋଲିସ ପାଇଁ କ'ଣ ସମସ୍ୟା ସୃଷ୍ଟି ହେବ ପ୍ରଶ୍ନର ଉତ୍ତର ଦେଇ ଅତିରିକ୍ତ ଡିସିପି କହିଛନ୍ତି ଯେ, ଯେକୌଣସି ନୂଆ ଜିନିଷ ଆରମ୍ଭ ହେଲେ ତାହା ପ୍ରଥମେ ପ୍ରଥମେ ସମସ୍ୟା ଉପୁଜେ । ମାତ୍ର ନୂଆ ଆଇନ ସମ୍ପର୍କରେ ସମସ୍ତ ଆଇଆଇସି, ଏସଆଇ, ଏଏସଆଇ, ଆଦି ସମସ୍ତଙ୍କୁ ସ୍ୱତନ୍ତ୍ର ତାଲିମ ପ୍ରଦାନ କରାଯାଇଛି । ଏନେଇ କୌଣସି ଅସୁବିଧା ହେବ ନାହିଁ ବୋଲି ସେ ଆଶା ପ୍ରକଟ କରିଛନ୍ତି ।
ଦେଶରେ ଲାଗୁ ହୋଇଛି ନୂଆ ଫୌଜଦାରୀ ଆଇନ । ଭାରତୀୟ ଅପରାଧ ନ୍ୟାୟ ବ୍ୟବସ୍ଥାରେ ବ୍ୟାପକ ପରିବର୍ତ୍ତନ ହେବା ସହ ହଠିଛି ଶାସନ କାଳରୁ ଦେଶରେ ପ୍ରଚଳିତ ଫୌଜଦାରୀ ଆଇନ । ଇତିହାସ ପାଲଟିଛି ବ୍ରିଟିଶ ଶାସନ କାଳରୁ ପ୍ରଚଳିତ ଭାରତୀୟ ପିଙ୍ଗଳ କୋର୍ଡ, ଫୌଜଦାରୀ ଦଣ୍ଡବିଧି ଆଇନ ଏବଂ ଭାରତୀୟ ସାକ୍ଷ୍ୟ ଆଇନ । ଏହା ପରିବର୍ତ୍ତେ ୩ ନୂଆ ଆଇନ ବ୍ୟବସ୍ଥା ଲାଗୁ କରିଛନ୍ତି କେନ୍ଦ୍ର ସରକାର । ଭାରତୀୟ ନ୍ୟାୟ ସଂହିତା, ଭାରତୀୟ ନାଗରିକ ସୁରକ୍ଷା ସଂହିତା ଓ ଭାରତୀୟ ସାକ୍ଷ୍ୟ ଅଧି ନିୟମ ।
