ରାଇରଙ୍ଗପୁର: ମୟୂରଭଞ୍ଜ ଲୋକସଭା ଆସନରୁ ସାଂସଦ ପ୍ରାର୍ଥୀ ଭାବେ ବିଜେଡି ପକ୍ଷରୁ ସୁଦାମ ମାରାଣ୍ଡିଙ୍କ ନାମ ବିଧିବଦ୍ଧ ଭାବେ ଘୋଷଣା କରାଯାଇଛି । ସୁଦାମଙ୍କ ନାମ ସାଂସଦ ପ୍ରାର୍ଥୀ ଭାବେ ଘୋଷଣା ହେବା ପରେ ଭୁବନେଶ୍ୱରରୁ ନିଜ ଜିଲ୍ଲା ମୟୂରଭଞ୍ଜକୁ ଫେରିଛନ୍ତି ସୁଦାମ । ଜିଲ୍ଲାରେ ତାଙ୍କୁ ସାଧାରଣ ଜନତାଙ୍କ ସହ ବିଜେଡି କର୍ମୀମାନେ ସ୍ବାଗତ କରିଛନ୍ତି ।
ଗତ ଶୁକ୍ରବାର ଭୁବନେଶ୍ୱରରୁ ନିଜ ଜିଲ୍ଲା ମୟୂରଭଞ୍ଜକୁ ଫେରିଥିଲେ ସୁଦାମ । ବାରିପଦା ଠାରେ ସୁଦାମଙ୍କୁ ସ୍ବାଗତ କରିଥିଲେ ବାରିପଦାବାସୀ । ଗତକାଲି (ଶନିବାର) ବିଜେଡି ସାଂସଦ ପ୍ରାର୍ଥୀ ସୁଦାମ ମାରାଣ୍ଡି ରାଇରଙ୍ଗପୁର ଆସିଛନ୍ତି । ତେବେ ରାଇରଙ୍ଗପୁର ପହଞ୍ଚିବା ପରେ ସୁଦାମ ମାରାଣ୍ଡିଙ୍କୁ ପୁଷ୍ପଗୁଚ୍ଛ ଦେଇ ସ୍ବାଗତ ଜଣାଇଥିଲେ ରାଇରଙ୍ଗପୁରବାସୀଙ୍କ ସହ ବିଜେଡି ବରିଷ୍ଠ ନେତା ଓ କର୍ମୀ । ପରେ ରାଇରଙ୍ଗପୁର ବିଜେଡି ପକ୍ଷରୁ ଏକ ବାଇକ ଶୋଭାଯାତ୍ରା କରାଯାଇଥିଲା । ଉକ୍ତ ଶୋଭାଯାତ୍ରାରେ ସୁଦାମ ବାଇକରେ ରାଇରଙ୍ଗପୁର ସହର ପରିକ୍ରମା କରିଥିଲେ । ପରେ ରାଇରଙ୍ଗପୁର ସହରରେ ଥିବା ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତି ଓ ପଣ୍ଡିତ ରଘୁନାଥ ମୁର୍ମୁଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ ସୁଦାମ ।
ସେପେଟ ମୟୂରଭଞ୍ଜ ଲୋକସଭା ଆସନ ପାଇଁ ବିଜେଡି ଦଳ ତରଫରୁ ତାଙ୍କୁ ପ୍ରାର୍ଥୀ ଘୋଷଣା କରାଯାଇ ଥିବାରୁ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ସହ ଜନ ସାଧାରଣଙ୍କୁ ଧନ୍ୟବାଦ ଜଣାଇଛନ୍ତି ସୁଦାମ । ଏଥି ସହିତ ମୟୂରଭଞ୍ଜର ବିକାଶ ପାଇଁ ସ୍ବର ଉତ୍ତୋଳନ କରିବେ ବୋଲି କହିବା ସହ ମୟୂରଭଞ୍ଜର ସ୍ବାର୍ଥ ପାଇଁ ଲୋକଙ୍କ ସ୍ବର ସହିତ ସ୍ବର ମିଶାଇ କାମ କରିବେ ବୋଲି କହିଛନ୍ତି ସୁଦାମ ମାରାଣ୍ଡି । ଗତକାଲି ସୁଦାମଙ୍କ ସହ ରାଜ୍ୟସଭା ସାଂସଦ ମମତା ମହାନ୍ତ, ରାଇରଙ୍ଗପୁର ପୌରପାଳିକାର ଅଧ୍ୟକ୍ଷ ଅଭିଷେକ ପଟ୍ଟନାୟକ, ବରିଷ୍ଠ ନେତା କାଶିନାଥ ହେମ୍ବ୍ରମ ପ୍ରମୁଖ ଉପସ୍ଥିତ ଥିଲେ।
ସୁଦାମ ମାରାଣ୍ଡିଙ୍କ ସମ୍ପର୍କରେ ସଂକ୍ଷେପରେ...
୧୯୬୨ ମସିହା ଜୁନ ମାସ ୧ ତାରିଖରେ ମୟୂରଭଞ୍ଜ ଜିଲ୍ଲାରେ ଜନ୍ମଗ୍ରହଣ କରିଥିଲେ ସୁଦାମ ମାରାଣ୍ଡି । ବାରିପଦା ସ୍ଥିତ ଏମପିସି ମହାବିଦ୍ୟାଳୟରୁ କଳାରେ ସ୍ନାତକ କରିଥିଲେ । ସୁଦାମ ମାରାଣ୍ଡି ଛାତ୍ର ଜୀବନରୁ ରାଜନୀତିରେ ରୁଚି ରଖିଥିଲେ । ୧୯୯୦ ମସିହାରେ ଓଡ଼ିଶା ବିଧାନସଭା ନିର୍ବାଚନରେ ଜଣେ ସ୍ୱାଧୀନ ପାର୍ଥୀ ଭାବରେ ପ୍ରଥମ ଥର ପାଇଁ ବାଙ୍ଗିରିପୋଷି ନିର୍ବାଚନ ମଣ୍ଡଳୀରୁ ନିର୍ବାଚିତ ହୋଇଥିଲେ । ପରେ ସୁଦାମ, ଝାଡ଼ଖଣ୍ଡ ମୁକ୍ତି ମୋର୍ଚ୍ଚାର ରାଜ୍ୟ ଉପସଭାପତି ଏବଂ ସଭାପତି ଭାବରେ କାର୍ଯ୍ୟ କରିଥିଲେ । ଏହାପରେ ଓଡ଼ିଶା ବିଧାନସଭାକୁ ଦୁଇ ଥର କୁଳିଅଣା ନିର୍ବାଚନ ମଣ୍ଡଳୀରୁ ଝାଡ଼ଖଣ୍ଡ ମୁକ୍ତି ମୋର୍ଚ୍ଚାର ପ୍ରତିନିଧି ଭାବରେ ନିର୍ବାଚିତ ହୋଇଥିଲେ ।
ସେହିପରି ୨୦୦୪ ମସିହା ସାଧାରଣ ନିର୍ବାଚନରେ ସୁଦାମ ମୟୂରଭଞ୍ଜ ଲୋକସଭା ନିର୍ବାଚନ ମଣ୍ଡଳୀରୁ ଝାଡ଼ଖଣ୍ଡ ମୁକ୍ତିମୋର୍ଚ୍ଚାର ପ୍ରତିନିଧି ଭାବରେ ଲୋକସଭାକୁ ନିର୍ବାଚିତ ହୋଇଥିଲେ । ଏହାପରେ ସୁଦାମ ମାରାଣ୍ଡି ବିଜୁ ଜନତା ଦଳରେ ଯୋଗ ଦେଇଥିଲେ । ୨୦୧୪ ଓ ୨୦୧୯ ଓଡ଼ିଶା ବିଧାନସଭା ନିର୍ବାଚନରେ ବାଙ୍ଗିରିପୋଷିରୁ ନିର୍ବାଚନ ଲଢ଼ି ନିର୍ବାଚିତ ହୋଇଥିଲେ । ଚଳିତ 2024 ନିର୍ବାଚନରେ ମୟୂରଭଞ୍ଜ ଲୋକସଭା ଆସନରୁ ସୁଦାମଙ୍କୁ ପ୍ରାର୍ଥୀ କରିଛି ବିଜେଡି ।
ଇଟିଭି ଭାରତ, ମୟୂରଭଞ୍ଜ
