ଭୁବନେଶ୍ବର: ଟ୍ବିନସିଟିର ନୂଆ କମିଶନର ଭାବେ ଆଜି ଦାୟିତ୍ବ ଗ୍ରହଣ କରିବେ ଏଡିଜି ସଞ୍ଜୀବ ପଣ୍ଡା । ଡାଇରେକ୍ଟର ଅଫ ଇଣ୍ଟେଲିଜେନସରୁ ଏବେ ସିଧା ଟ୍ବିନସିଟି ଭାର ସମ୍ଭାଳିବେ ସଞ୍ଜୀବ ପଣ୍ଡା । ନୂତନ କମିଶନରଙ୍କ ପାଇଁ କଣ ରହିବ ଚ୍ୟାଲେଞ୍ଜ ସେନେଇ ପୂର୍ବତନ ପୋଲିସ ଡିଜି ସଞ୍ଜୀବ ମାରିକ ଦେଇଛନ୍ତି ବଡ ବୟାନ । ରାଜନୈତିକ ହିଂସା ରୋକିବା ନୂତନ କମିଶନରଙ୍କ ପାଇଁ ମୁଖ୍ୟ ଚାଲେଞ୍ଜ ହେବ ବୋଲି କହିଛନ୍ତି ସଞ୍ଜୀବ ମାରିକ ।
ସଞ୍ଜୀବ ମାରିକ କହିଛନ୍ତି, ''କିଛି ମାସ ପରେ ରାଜ୍ୟରେ ସାଧାରଣ ନିର୍ବାଚନ ହେବ । ଏବେଠୁ ପଡିଲାଣି ନିର୍ବାଚନର ପ୍ରଭାବ । କାରଣ ବିଭିନ୍ନ ରାଜନୈତିକ ଦଳ ଭିତରେ ଚାଲିଲାଣି ପଲଟିକାଲ ଓ୍ବାର ଓ ଛକାପଞ୍ଝା । କିଛି ଦିନ ତଳେ ଭୁବନେଶ୍ୱରରେ ସାଂସଦ ଅପରାଜିତା ଷଡଙ୍ଗୀଙ୍କୁ ରାସ୍ତାରେ ଅଟକାଇଥିଲେ କିଛି ବିରୋଧି ଗୋଷ୍ଠୀ । ଗତ ପୌର ନିର୍ବାଚନ ସମୟରେ ସେ ଏକ ଘର ଭିତରେ ଥିବା ବେଳେ ବାହାରେ ତାଲା ପକାଇ ଦିଆଯାଇଥିଲା । ଦୀର୍ଘ ସମୟ ଧରି ଦୁଇ ରାଜନୈତିକ ଗୋଷ୍ଠୀ ମଧ୍ୟରେ ଉତ୍ତେଜନା ମୂଳକ ପରିସ୍ଥିତି ଦେଖିବାକୁ ମିଳିଥିଲା ।
ଗତ କିଛି ଦିନ ତଳେ ମଞ୍ଚେଶ୍ବର ଥାନା ଇଞ୍ଜଣା ପଞ୍ଚାୟତରେ ରାଜନୈତିକ ଛକାପଞ୍ଝା ନେଇ ପଥର ମାଡ ସହ ଗୋଷ୍ଠୀ ସଂଘର୍ଷ ହୋଇଥିଲା । ଏଥିରେ ୫୪ଜଣ ମହିଳା ଓ ୮୯ଜଣ ପୁରୁଷଙ୍କୁ ଗିରଫ କରି ଏକ ପ୍ରକାର ଉକ୍ତ ଅଞ୍ଚଳକୁ ପୁରୁଷ ଶୂନ୍ୟ କରିଥିଲା ପୋଲିସ । ପୌର ନିର୍ବାଚନରେ ମଧ୍ୟ ଲକ୍ଷ୍ମୀସାଗର ଥାନା ଅଞ୍ଚଳରେ ଥାନା ସାମ୍ନାରେ ଦୁଇ ରାଜନୈତିକ ଦଳର କର୍ପୋରେଟର ଗୋଷ୍ଠୀ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ଯାହାକୁ ନେଇ ହୁଲୁସ୍ତୁଲ ହୋଇଥିଲା ଭୁବନେଶ୍ବର । ଏ ତମାମ ଘଟଣା ଦେଖିଲେ ବର୍ତ୍ତମାନ ରାଜନୈତିକ ମାହୋଲ ଗରମ ରହିଛି । ଏସବୁ ଭିତରେ ରାଜନୈତିକ ଦଳର ପ୍ରତିନିଧି ମାନଙ୍କୁ ଶାନ୍ତ୍ବନା ଓ ଆଶ୍ବାସନା ସହ ପରିସ୍ଥିତି ଅଣାୟତ୍ତ ହେଲେ ଏହାକୁ ନିୟନ୍ତ୍ରଣ କରି ଉଚିତ ସମୟରେ ନିଷ୍ପତ୍ତି ସହ ଭଲ ସମ୍ପର୍କ ବଜାୟ ରଖିବା ନୂଆ କମିଶନରଙ୍କ ପାଇଁ ବଡ ଚାଲେଞ୍ଜ ହେବ।''
ସେ ଆହୁରି ମଧ୍ୟ କହିଛନ୍ତି ଯେ, ଆଗକୁ ନିର୍ବାଚନ ଆସୁଥିବା ବେଳେ ରାଜନୈତିକ ବ୍ୟକ୍ତି ବା ହେବିୱେଟଙ୍କ ଗସ୍ତ ସମୟରେ ସେମାନଙ୍କ ସୁରକ୍ଷା ଓ ପରିଚାଳନା ସହ ସହରର ଅପରାଧ ନିୟନ୍ତ୍ରଣ ମଧ୍ୟ ବଡ ଚ୍ୟାଲେଞ୍ଜ ରହିଛି । ବିଶେଷ କରି ଗଳି ଅପରାଧ ଓ ରାଜ୍ୟ ବାହାରର ଅପରାଧିଙ୍କ ପାଇଁ ବସ୍ତି ଉପରେ ନଜର ରଖିବା ହେବ ବଡ ଦାୟିତ୍ବ । ସେହିପରି ଟ୍ରାଫିକ ପରିଚାଳନା ସହ ସାଇବର କ୍ରାଇମ ଆଦି ବିଭିନ୍ନ ଦିଗ ଏକ ବଡ ଚାଲେଞ୍ଜ ରହିବ ନୂତନ ପୋଲିସ କମିଶନର ସଞ୍ଜୀବ ପଣ୍ଡାଙ୍କ ପାଇଁ । ପୂର୍ବରୁ ସେ ଇଣ୍ଟେଲିଜେନସ ଡାଇରେକ୍ଟର ଥିବା ବେଳେ ଏବେ ସେ ସ୍ଥାନରେ ଯୋଗଦେବେ ବର୍ତ୍ତମାନର ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ।
ଇଟିଭି ଭାରତ, ଭୁବନେଶ୍ବର
