ଝାରସୁଗୁଡ଼ା: ଟ୍ରେଡିଂ ନେଲା ଜୀବନ । ଲକ୍ଷାଧିକ ଟଙ୍କା ଟ୍ରେଡିଂରେ ଲଗାଇ ଜୀବନ ହାରିଲେ ଜଣେ ଯୁବକ । ଟ୍ରେନ ଲାଇନରୁ ଯୁବକଙ୍କ କ୍ଷତବିକ୍ଷତ ମୃତଦେହ ଠାବ । ଏଭଳି ଏକ ଅଘଟଣ ଘଟିଛି ଝାରସୁଗୁଡ଼ା ଜିଲ୍ଲା ବାଲିଜୁରୀ ଅଞ୍ଚଳରେ । ମୃତ ଯୁବକ ଜଣକ ହେଲେ କେନ୍ଦ୍ରାପଡ଼ା ଜିଲ୍ଲା ଲଙ୍କାପଡ଼ାର ଅଚ୍ୟୁତାନନ୍ଦ ସାହୁ । ପୋଲିସ ରେଳ ଧାରଣାରୁ ମୃତଦେହ ଉଦ୍ଧାର କରିବା ସହ ଅଧିକ ତଦନ୍ତ ଆରମ୍ଭ କରିଛି ।
ଟ୍ରେଡିଂ ନେଲା ଜୀବନ :
ପୋଲିସ ସୂଚନା ଅନୁସାରେ, ମୃତ ଅଚ୍ୟୁତାନନ୍ଦ ସାହୁ ଝାରସୁଗୁଡ଼ାର ଏକ ଘରୋଇ ହୋଟେଲରେ ମୁଖ୍ୟ କ୍ୟାସ ମ୍ୟାନେଜର ଭାବେ କାର୍ଯ୍ୟ କରୁଥିଲେ । ଟ୍ରେଡିଂ ଆପରେ ଲକ୍ଷାଧିକ ଟଙ୍କା ହରାଇବା ପରେ ସେ ଗତ ୧୦ ତାରିଖ ବିଳମ୍ବିତ ରାତିରେ ଜୀବନ ହାରିଥିଲେ । ସେ ମୃତ୍ୟୁ ପୂର୍ବରୁ ହ୍ୱାଟସପ ମାଧ୍ୟମରେ ମେସେଜ କରି ନିଜ ପରିବାର ଲୋକଙ୍କୁ ମୃତ୍ୟୁର କାରଣ ଦର୍ଶାଇଥିଲେ ।
ସପ୍ତାହକ ପରେ ପଡ଼ିଥାନ୍ତା ହାତଗଣ୍ଠି !
ଆସନ୍ତା ୧୭ ତାରିଖରେ ମୃତ ଅଚ୍ୟୁତାନନ୍ଦଙ୍କ ବାହାଘର ସ୍ଥିର ହୋଇଥିଲା । ଏହାର ସପ୍ତାହେ ପୂର୍ବରୁ ସେ ଜୀବନ ହାରିବା ଘଟଣା ସମସ୍ତଙ୍କୁ ଚକିତ କରିଛି । କଲର ଟ୍ରେଡିଂ ଗେମ୍ବଲିଂ ଆପ୍ରେ ସବୁ ପଇସା ହରାଇ ଥିଲେ ସେ । ସେ ୨୦ରୁ ୨୫ ଲକ୍ଷ ଟଙ୍କା ଋଣ କରି ଟ୍ରେଡିଂ କରିଥିବା ଜଣାପଡ଼ିଛି । ତେବେ ଋଣ ସୁଝିବା ପାଇଁ ସେ ଅନେକ ଚେଷ୍ଟା କରିଥିଲେ ମଧ୍ୟ ଅସଫଳ ହୋଇଥିଲେ । ଏତେ ପରିମାଣର ଋଣ ବୋଝ ସହି ନପାରି ଜୀବନ ହାରିଥିବା ଜଣାପଡ଼ିଛି ।
ଏହା ମଧ୍ୟ ପଢନ୍ତୁ ...ନିଶା ନିବାରଣ କେନ୍ଦ୍ରରେ ଯୁବକଙ୍କ ମୃତ୍ୟୁ, DCP କହିଲେ ଖୁବଶୀଘ୍ର ଜାରି ହେବ SOP ଏହା ମଧ୍ୟ ପଢନ୍ତୁ ... ମେଡିକାଲ ପାଇଁ କରୁଥିଲେ NEET ପ୍ରସ୍ତୁତି, ପରୀକ୍ଷା ପୂର୍ବରୁ କୋଚିଂ ସେଣ୍ଟରରେ ହାରିଲେ ଜୀବନ |
ଏମିିତି କହିଲା ପୋଲିସ:
ଏନେଇ ହୋଟେଲ ମ୍ୟାନେଜର ପ୍ରଦୀପ୍ତ କୁମାର ସାହୁ କହିଛନ୍ତି,"ସେ ଟ୍ରେଡିଂ ଆପ୍ରେ ଲକ୍ଷାଧିକ ଟଙ୍କା ହରାଇବା ବିଷୟରେ ଅବଗତ ନଥିଲୁ । ସେ ବହୁତ ଭଲ କର୍ମଚାରୀ ଥିଲେ । ନିଜ କାମରେ କେବେ ହେଲେ ହେଳା କରୁନଥିଲେ । ଯେତେବେଳେ ସେ ନିଜ ରୁମକୁ ଦୀର୍ଘ ସମୟ ଧରି ଆସିଲେ ନାହିଁ । ସେନେଇ ପୋଲିସକୁ ଜଣାଇଥିଲୁ ।"
ଜିଆରପି ପୋଲିସ ଅଧିକାରୀ ସନ୍ତୋଷ ମିର୍ଦ୍ଧା କହିଛନ୍ତି," ମୃତକ ଜଣକ ହେଲେ କେନ୍ଦ୍ରାପଡ଼ା ଜିଲ୍ଲା ଲଙ୍କାପଡ଼ାର ଅଚ୍ୟୁତାନନ୍ଦ ସାହୁ । ସେ କଲର ଟ୍ରେଡିଂ ଗେମ୍ବଲିଂ ଆପ୍ରେ ଟଙ୍କା ଲଗାଉଥିଲେ । ଅଚ୍ୟୁତାନନ୍ଦ ନିଖୋଜ ଥିବା ନେଇ ହୋଟେଲ ମ୍ୟାନେଜର ପୋଲିସକୁ ଜଣାଇଥିଲେ । ଏହାପରେ ଆମେ ଲୋକେସନ ଜରିଆରେ ତାଙ୍କ ଠାବ କରିଥିଲୁ ।"
ଇଟିଭି ଭାରତ,ଝାରସୁଗୁଡ଼ା
