ବଲାଙ୍ଗୀର: ସ୍ୱପ୍ନର ପ୍ରକଳ୍ପ ‘ଲୋୟର ସୁକତେଲ’ ଉଦଘାଟନକୁ ଦୀର୍ଘ ସାତ ମାସ ବିତିଲାଣି । ମାତ୍ର ନାହିଁନଥିବା ମସସ୍ୟା ମଧ୍ୟରେ ଅସ୍ଥାୟୀ ଥଇଥାନ କେନ୍ଦ୍ରରେ କାଳତିପାତ କରୁଛନ୍ତି ପ୍ରକଳ୍ପ ପାଇଁ ନିଜ ଭିଟାମାଟି ହରାଇ ବିସ୍ଥାପିତ ହୋଇଥିବା ବଂଛୋର ପାଳି ଗ୍ରାମର 32ଟି ଭୂମିହୀନ ପରିବାର । ଏମାନଙ୍କ କଥା ଯେପରି ପ୍ରଶାସନ ଓ ସରକାର ଭୁଲିଯାଇଛି । ଟିଣ ସିଟ୍ସ ଅସ୍ଥାୟୀ ଥଇଥାନ କ୍ୟାମ୍ପରେ ଅତି ଅସହାୟ ଭାବରେ ଏମାନେ ଦୁର୍ଦ୍ଦିନରେ କାଳତିପାତ କରୁଥିବା ବେଳେ, ପ୍ରଶାସନ ଓ ସରକାରଙ୍କଠାରୁ ମିଳିଛି କେବଳ ମାତ୍ର ପ୍ରତିଶୃତି ।
- ଦୁର୍ଦ୍ଦିନରେ ବଂଛୋର ପାଳିର 32 ପରିବାର:-
ବଲାଙ୍ଗୀରର ଜୀବନରେଖା କୁହାଯାଉଥିବା ‘ଲୋୟର ସୁକତେଲ ଜଳସେଚନ ପ୍ରକଳ୍ପ’ ଚଳିତବର୍ଷ ଜାନୁୟାରୀ 3 ତାରିଖରେ ଉଦ୍ଘାଟିତ ହୋଇଥିଲା । ଏହାକୁ ଇତିମଧ୍ୟରେ ସାତ ମାସ ବିତି ସାରିଲାଣି । ସେପଟେ ଗତ ଶ୍ରାବଣରୁ ପ୍ରକଳ୍ପ ପାଇଁ ବିସ୍ଥାପିତ ହୋଇଥିବା ଏକ ଗାଁର ଭୂମିହୀନ ପାରିବାର ଏପର୍ଯ୍ୟନ୍ତ ଥଇଥାନ ହୋଇପାରି ନାହାନ୍ତି । ସେମାନଙ୍କୁ ଗତବର୍ଷ ଜୁଲାଇ ମାସରେ ପ୍ରକଳ୍ପ ପାଇଁ ରାତାରାତି ସ୍ଥାନାନ୍ତର କରାଯାଇଥିଲା । ଯେଉଁଥିରେ ପ୍ରକଳ୍ପରେ ସମ୍ପୂର୍ଣ ବୁଡିଥିବା ଅଞ୍ଚଳ ମଧ୍ୟରେ ଥିବା ବଂଛୋର ପାଳି ଗ୍ରାମବାସୀ ମଧ୍ୟ ଥିଲେ । ସେମାନଙ୍କୁ ଅସ୍ଥାୟୀ କ୍ୟାମ୍ପରେ ରଖାଯାଇଥିବା ବେଳେ ଶୀଘ୍ର ଥଇଥାନର ପ୍ରତିଶ୍ରୁତି ଦିଆଯାଇଥିଲା । ହେଲେ ଏହା ମଧ୍ୟରେ ବର୍ଷେ ବିତିଛି । ଥଇଥାନ ଆଶାରେ ଏବେ ବି ଦୁର୍ଦ୍ଦିନରେ ଜୀବନ ବିତାଉଛନ୍ତି ବଂଛୋର ପାଳି ଗ୍ରାମର ଏହି 32 ପରିବାର ।
- ଟିଣ ସିଟ୍ସ ଅସ୍ଥାୟୀ କ୍ୟାମ୍ପରେ ବିତୁଛି ଜୀବନ
ଟିଣ ସିଟରେ ନିର୍ମାଣ ହୋଇଥିବା ଅସ୍ଥାୟୀ ଥଇଥାନ ଶିବିର କଥା ନକହିବା ଭଲ । ପିଇବା ପାଣିଠାରୁ ନେଇ ସବୁ ସମସ୍ୟାରେ ଜର୍ଜରିତ ହେଉଛନ୍ତି ବିସ୍ଥାପିତ । ପ୍ରଶାସନିକ ଅଧିକାରୀ, ନେତା ଓ ମନ୍ତ୍ରୀ ସମସ୍ତେ ଆସି ଥଇଥାନର କଥା କହୁଥିଲେ ସୁଦ୍ଦା ତାହା ଏମାନଙ୍କ ପାଇଁ ଯେପରି ପାଣିର ଗାର ପାଳିଟିଛି ।ବଂଛୋର ପାଳିର ଜଣେ ବ୍ୟକ୍ତି ମଧୁ ପଟଣିଆ କହିଛନ୍ତି ଯେ,‘‘ଦିନ ଥିଲା ଆମେ ଆମ ଗାଆଁରେ ସ ପରିବାର ହସ ଖୁସିରେ ରହୁଥିଲୁ । ବାଡ଼ି, ବଗିଚା ଓ କ୍ଷେତରେ ଚାଷ କରି ନିଜ ଘରେ ରହି ଆସୁଥିଲୁ । ହେଲେ ପ୍ରକଳ୍ପ ପାଇଁ ଆମକୁ ରାତାରାତି ସେଠାରୁ ତଡି ଦିଆଯାଇଥିଲା । ସେଠୁ ଆଣି ଏଠି ଟିଣ ଘରେ ରଖା ଯାଇଥିଲା। ଆମକୁ ଘର ଜମି ସହ କ୍ଷତିପୂରଣ ଦିଆଯିବ ବୋଲି କୁହାଯାଇଥିଲା । ଯାହା ପାଇଁ ଆମେ ଛାତିରେ ପଥର ରଖି ଗାଁ ମାଟି ଘରଦ୍ୱାର ଛାଡିଥିଲୁ । ହେଲେ ଶ୍ରାବଣ ଯାଇ ପୁଣି ଶ୍ରାବଣ ଆସି ବର୍ଷେ ବିତିଥିଲେ ସୁଦ୍ଧା ଆମକୁ କିଛି ମିଳିଲା ନାହିଁ । ଆମେ ଏଠି ଅତି ଅସହାୟ ଅବସ୍ଥାରେ ମାଛି ମଶା ଓ ଗରମରେ ରହୁଥିବା ବେଳେ କେହି ଆମ ଦୁଃଖ ଦେଖିବାକୁ ମଧ୍ୟ ଆସୁ ନାହାନ୍ତି । "
ସମାନ ଭାବରେ ଏହି ଗ୍ରାମର ଆଉ ଜଣେ ବାସିନ୍ଦା ସୁଭାଷ ଚିନ୍ଦା କହିଛନ୍ତି ଯେ ‘‘ଗତ ଶ୍ରାବଣରେ ଆମକୁ ସେଠାରୁ ବିସ୍ଥାପିତ କରା ଯାଇଥିଲା । ସେଠି ଆମର ଘର, ଦ୍ୱାର, କ୍ଷେତ ଓ ବାଡି ସବୁ ଥିଲା । ଜଙ୍ଗଲରୁ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ଦୁଇ ପଇସା ରୋଜଗାର ହେଉଥିଲା । ହେଲେ ସେଠୁ ରାତାରାତି ଆଣି ଏଠି ଟିଣ ଡବା ଘରେ ରଖି ଆମକୁ ସମସ୍ତେ ଭୁଲି ଯାଇଛନ୍ତି । ଏଠି ପିଇବା କିମ୍ବା ଗାଧୋଇବା ପାଇଁ ପାଣି ନାହିଁ । ଅନ୍ୟ ଗାଁକୁ ଗଲେ ଯାଇ ସେଠି ପାଣି ମିଳୁଛି ।’’
- କ୍ଷେତ ବାଡି ସହ ଜୀବିକା ମଧ୍ୟ ହରାଇଲେ 29 ଖଣ୍ ଗ୍ରାମବାସୀ :-
ତେବେ ଏହି ବଂଛୋର ପାଳି ହେଉ ବା ପ୍ରକଳ୍ପ ପାଇଁ ବିସ୍ଥାପିତ ହୋଇଥିବା ଅନ୍ୟ 29 ଖଣ୍ଡ ଗାଁ ସବୁ ହେଉ, ସମସ୍ତେ ସେଠି ପିଢ଼ି ପିଢ଼ି ଧରି ରହି ଆସୁଥିଲେ । କ୍ଷେତ ଓ ଘର ସବୁ ଥିଲା । ଚାଷ କରି ପରିବାର ପ୍ରତିପୋଷଣ କରୁଥିଲେ । ସେହିପରି ଭୂମିହୀନ ଓ ଗରିବ ଲୋକ ମଧ୍ୟ ସେଠାରେ କାମ ପାଉଥିଲେ । ଏହାସହ ସେମାନେ ମହୁଲ, ଚାର, କେନ୍ଦୁ ଭଳି ଫଳ ସଂଗ୍ରହ ସହିତ ଝାଡୁ, ବାଉଁଶ ପରି ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ଦୁଇ ପଇସା ରୋଜଗାର ମଧ୍ୟ କରିପାରୁଥିଲେ । ତେବେ ଏମାନେ ସେଠୁ ବିସ୍ଥାପିତ ହୋଇ ଏବେ କିଛି ସହରରେ, ତ ଆଉ କିଛି ଅସ୍ଥାୟୀ ଶିବିରରେ ଅଛନ୍ତି ।
- ତରବରିଆ ଉଦଘାଟନ କରାଯାଇଥିଲା କହିଲେ ନରସିଂହ:-
ତେବେ ପୂର୍ବତନ ବିଧାୟକ ତଥା ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର କହିଛନ୍ତି," ବହୁତ ଲୋକ ଥଇଥାନ ହୋଇ ପାରିନାହାନ୍ତି । ସେମାନେ ମଣିଷ ରହିବା ପରି ସ୍ଥିତିରେ ରହୁନାହାନ୍ତି । ତାଙ୍କୁ କୌଣସି ମୌଳିକ ସୁବିଧା ଯୋଗାଇ ଦିଆଯାଇ ନାହିଁ । ତତ୍କାଳୀନ ମୁଖ୍ୟମନ୍ତ୍ରୀ ତରବରିଆ ଭାବରେ ଅସମ୍ପୂର୍ଣ୍ଣ ପ୍ରକଳ୍ପକୁ ଉଦଘାଟନ କରିଦେଲେ । ରାତାରାତି ସମସ୍ତଙ୍କୁ ବିସ୍ଥାପିତ କରାଗଲା । ଏପଟେ ଏହି ପ୍ରକଳ୍ପ 2026 ପର୍ଯ୍ୟନ୍ତ ସମ୍ପୂର୍ଣ୍ଣ ହେବ ନାହିଁ । ତେଣୁ ଏହାରି ମଧ୍ୟରେ ସେମାନଙ୍କ ଥଇଥାନ କରିବା ଜରୁରୀ ।’’
ଏହା ମଧ୍ୟ ପଢନ୍ତୁ:- କଂଗ୍ରେସର ଗୁମର ଖୋଲିଲେ ତାରା, କହୁ କହୁ କହିଦେଲେ ଏମିତି... - TARA ON ODISHA CONGRESS
ସେପଟେ ସରକାର ଏହି ପ୍ରକଳ୍ପ ପାଇଁ ବିସ୍ଥାପିତଙ୍କୁ ଉଚିତ ଥଇଥାନ କରିବେ ବୋଲି କହିଥିଲେ ସୁଦ୍ଧା ତାହା ବାସ୍ତବତାରେ ପରିଣତ ହୋଇପାରିନି । ଶତାଧିକ ପରିବାର ଏବେ ଦୁର୍ଦ୍ଦିନରେ । ତଥାପି ଏହି ପ୍ରସଙ୍ଗରେ ଲୋୟର ସୁକତେଲ ପ୍ରକଳ୍ପ ବିଭାଗ, ସ୍ଥାନୀୟ ପ୍ରଶାସନ କିମ୍ବା ସରକାର ମୁହଁ ଖୋଲୁ ନାହାନ୍ତି ।
ଇଟିଭି ଭାରତ, ବଲାଙ୍ଗୀର
