ଭୁବନେଶ୍ବର: ରାଜ୍ୟରେ ସରକାର ବଦଳିବା ପରେ ଆରମ୍ଭ ହୋଇଛି ମହାନଦୀ ବଞ୍ଚାଅ ଅଭିଯାନ । ମହାନଦୀରେ 2ଟି ବ୍ରିଜ ସହ ବ୍ୟାରେଜ ନିର୍ମାଣ ଲାଗି ଯୋଜନା ହେଉଥିବା ଜଣାପଡିଛି । ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀଙ୍କ ପକ୍ଷରୁ ମହାନଦୀ ବେସିନର ମୁଖ୍ୟ ଯନ୍ତ୍ରୀଙ୍କୁ ଚିଠି ଲେଖାଯାଇଛି । ମହାନଦୀ ଉପରେ 2ଟି ବ୍ୟାରେଜ ଓ ସହରର ଅଯୋଧ୍ୟା ସରୋବରକୁ ବିକଶିତ ପାଇଁ ସର୍ଭେ କରିବାକୁ ଚିଠିରେ ନିର୍ଦ୍ଦେଶ ଦିଆଯାଇଛି ।
ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଭକ୍ତ ରଞ୍ଜନ ମହାନ୍ତି ଗତକାଲି ବୁର୍ଲା ସ୍ଥିତ ମହାନଦୀ ବେସିନର ମୁଖ୍ୟ ଯନ୍ତ୍ରୀଙ୍କୁ ଚିଠି ଲେଖିଛନ୍ତି । ଚିଠିରେ ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଭକ୍ତ ରଞ୍ଜନ ମହାନ୍ତି ସମ୍ବଲପୁରର ସମଲେଶ୍ବରୀ ମନ୍ଦିର ସମ୍ମୁଖରେ ଉନ୍ନୟନ ଲାଗି ସର୍ଭେ କରିବାକୁ ନିର୍ଦ୍ଦେଶ ଦେଇଛନ୍ତି । ସେହିପରି ମହାନଦୀରେ ବ୍ରିଜ ସହ ବ୍ୟାରେଜ ନିର୍ମାଣ ପାଇଁ ସର୍ଭେ କରିବାକୁ ନିର୍ଦ୍ଦେଶ ଦିଆଯାଇଛି । ମହାନଦୀର ରେଲୱେ ବ୍ରିଜ ବା ମହାନଦୀ ବ୍ରିଜ-1 ନିକଟରୁ ଦେଓଗାଁ ପର୍ଯ୍ୟନ୍ତ ଏହି ସର୍ଭେ ହେବ । ଏଥିରେ 2ଟି ବ୍ରିଜ ସହ ବ୍ୟାରେଜ ନିର୍ମାଣ ହେବ । ମାନେଶ୍ବର ଓ ଦେଓଗାଁରେ ବ୍ରିଜ କମ ବ୍ୟାରେଜ ହେବାର ସମ୍ଭାବନା ଅଧିକ ରହିଛି । ମାନେଶ୍ବର ଓ ଦେଓଗାଁରେ ବ୍ରିଜ କମ ବ୍ୟାରେଜ ନିର୍ମାଣ ହେଲେ କୌଣସି ପରିବାର ବିସ୍ଥାପିତ ହେବେ ନାହିଁ ।
ସେହିଭଳି ସମ୍ବଲପୁର ଅଯୋଧ୍ୟା ସରୋବରକୁ ବିକାଶିତ କରାଯିବ ବୋଲି ଦର୍ଶାଯାଇଛି । ଏଠାରେ ବ୍ୟାରେଜ ନିର୍ମାଣ ହେଲେ ପର୍ଯ୍ୟଟନର ବିକାଶ ହୋଇପାରିବ । ଅଣ-ମୌସୁମୀ ସମୟରେ ମହାନଦୀରେ ଜଳ ସଙ୍କଟ ସୃଷ୍ଟି ହୋଇଥାଏ । ଉପର ମୁଣ୍ଡରେ ଅର୍ଥାତ ଛତିଶଗଡ଼ରେ 32ରୁ ଅଧିକ ବ୍ୟାରେଜ ନିର୍ମାଣ ହୋଇଥିବାରୁ ଓଡିଶା ଅସୁବିଧାର ସମ୍ମୁଖୀନ ହେଉଥିବା ଓଡିଶା ସରକାର ଅଭିଯୋଗ କରିଆସୁଛନ୍ତି । ଯାହାକୁ ନେଇ ଓଡିଶା ଓ ଛତିଶଗଡ଼ ମୁହାଁମୁହିଁ ହୋଇ ରହିଛନ୍ତି । ଏନେଇ ହୋଇଥିବା ମାମଲା ଏବେ ବିଚାରାଧୀନ ରହିଛି । ଓଡିଶା ସରକାରଙ୍କ ପକ୍ଷରୁ ହୀରାକୁଦ ପରେ ମହାନଦୀ ତଳ ମୁଣ୍ଡରେ କୌଣସି ସ୍ଥାନରେ ଡ୍ୟାମ କିମ୍ବା ବ୍ୟାରେଜ ନିର୍ମାଣ କରିନାହାନ୍ତି । ସମ୍ବଲପୁର ସହରରେ ବ୍ରିଜ ସହ ବ୍ୟାରେଜ ନିର୍ମାଣ ପାଇଁ ଦୀର୍ଘ ଦିନ ହେଲା ଦାବି ହୋଇଆସୁଛି । ଯାହା ଫଳରେ ଜଳ ସମସ୍ୟା ସମାଧାନ ସହ ପର୍ଯ୍ୟଟନର ବିକାଶ ପାଇଁ ବାରମ୍ବାର ଏହି ଦାବି ହେଉଛି ।
