ନୂଆଦିଲ୍ଲୀ : ସବୁ ଚର୍ଚ୍ଚାରେ ଲାଗିଲା ବିରାମ । ବିଧିବଦ୍ଧ ଭାବେ କଂଗ୍ରେସରେ ଯୋଗଦେଲେ ଷ୍ଟାର ରେସଲର ଭିନେଶ ଫୋଗାଟ ଓ ବଜରଙ୍ଗ ପୁନିଆ । ହରିୟାଣା ବିଧାନସଭା ନିର୍ବଚନ ପୂର୍ବରୁ କଂଗ୍ରେସରେ ଯୋଗ ଦେଇଛନ୍ତି ଦୁଇ କୁସ୍ତିଯୋଦ୍ଧା । ଉଭୟ ଭିନେଶ ଫୋଗାଟ ଓ ବଜରଙ୍ଗ ପୁନିଆ କଂଗ୍ରେସ ଟିକଟରେ ହରିୟାଣା ବିଧାନସଭା ନିର୍ବାଚନ ଲଢ଼ିପାରନ୍ତି ବୋଲି ବହୁ ଦିନରୁ ଚର୍ଚ୍ଚା ହେଉଥିଲା । ଏହା ଭିତରେ କିଛିଦିନ ପୂର୍ବରୁ ଉଭୟ ଯାଇ କଂଗ୍ରେସ ନେତା ତଥା ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଭେଟିଥିଲେ । ଆଜି ପ୍ରଥମେ ଦଳର ସଭାପତି ମଲ୍ଲିକାର୍ଜୁନ ଖଡ୍ଗେଙ୍କୁ ଭେଟିବା ପରେ ଦଳୀୟ ମୁଖ୍ୟାଳୟରେ ଉଭୟ କଂଗ୍ରେସର ହାତ ଧରିଛନ୍ତି ।
चक दे इंडिया, चक दे हरियाणा!
— Mallikarjun Kharge (@kharge) September 6, 2024
दुनिया में भारत का नाम रौशन करने वाले हमारे प्रतिभाशाली चैंपियन विनेश फोगाट और बजरंग पुनिया से 10 राजाजी मार्ग पर मुलाक़ात।
हमें आप दोनों पर गर्व है। pic.twitter.com/aFRwfFeeo1
କଂଗ୍ରେସ ଅଧ୍ୟକ୍ଷ ଖଡ୍ଗେଙ୍କୁ ଭେଟିଲେ :-
କଂଗ୍ରେସରେ ଯୋଗ ଦେବା ପୂର୍ବରୁ ଉଭୟ ଭିନେଶ ଓ ବଜରଙ୍ଗ ପ୍ରଥମେ ଦଳର ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍ଗେଙ୍କୁ ଭେଟିଥିଲେ । ଖଡ୍ଗେଙ୍କ ବାସଭବନରେ ଏହି ସାକ୍ଷାତ ସମୟରେ ଦଳର ସଂଗଠନ ମହାସଚିବ କେସି ବେଣୁଗୋପାଳ ମଧ୍ୟ ଉପସ୍ଥିତ ଥିଲେ । 'ଚକ୍ ଦେ ଇଣ୍ଡିଆ, ଚକ୍ ଦେ ହରିୟାଣା' କ୍ୟାପ୍ସନ ସହିତ ଏହି ସମୟର ଫଟୋ ନିଜେ ଖଡ୍ଗେ ନିଜ ଏକ୍ସ ହ୍ୟାଣ୍ଡେଲରେ ପୋଷ୍ଟ କରିଥିଲେ । ଏହାକୁ କଂଗ୍ରେସ ଦଳର ଆଧିକାରୀକ ଏକ୍ସ ହ୍ୟାଣ୍ଡେଲରେ ମଧ୍ୟ ରି-ପୋଷ୍ଟ କରାଯାଇଛି । ଏହାପରେ ଦଳର ଦିଲ୍ଲୀ ମୁଖ୍ୟାଳୟରେ ଉଭୟ ବିଦ୍ଧିବଦ୍ଧ ଭାବେ କଂଗ୍ରେସର ହାତ ଧରିଛନ୍ତି ।
आज @Phogat_Vinesh जी और @BajrangPunia जी भारतीय राष्ट्रीय कांग्रेस में शामिल हुए।
— Congress (@INCIndia) September 6, 2024
आपको बधाई और भविष्य के लिए शुभकामनाएं।
📍 नई दिल्ली pic.twitter.com/KZAW552hwm
'କଂଗ୍ରେସ ବିଚାରଧାରାରେ ଆସି ଗର୍ବିତ' :-
କଂଗ୍ରେସରେ ସାମିଲ ହେବାପରେ ଭିନେଶ ଫୋଗାଟ କହିଛନ୍ତି, "କଥାରେ ଅଛି ଖରାପ ସମୟରେ ହିଁ ଜଣାପଡ଼େ ନିଜର କିଏ । ଯେତେବେଳେ ଆମେ ନ୍ୟାୟ ପାଇଁ ଲଢ଼ୁଥିଲୁ, ସେତେବେଳେ ବିଜେପିକୁ ଛାଡ଼ି ଅନ୍ୟ ସମସ୍ତ ଦଳ ଆମ ସହ ଥିଲେ । ସମସ୍ତଙ୍କୁ ଆମେ ଧନ୍ୟବାଦ ଦେଉଛୁ । ନ୍ୟାୟର ଲଢ଼େଇ ଜାରି ରହିବ । କଂଗ୍ରେସ ଦଳ ମହିଳାଙ୍କ ଉପରେ ହେଉଥିବା ଅତ୍ୟାଚାର ଓ ହିଂସା ବିରୋଧରେ ସବୁବେଳେ ରାଜରାସ୍ତାରୁ ସଂସଦ ପର୍ଯ୍ୟନ୍ତ ଲଢେଇ କରିଛି । ଏଭଳି ବିଚାରଧାରାକୁ ଆସି ମୁଁ ଗର୍ବିତ ।"
'କଂଗ୍ରେସକୁ ଓ ଦେଶକୁ ମଜଭୁତ କରିବୁ' :-
ଅନ୍ୟପଟେ ରେସଲର ବଜରଙ୍ଗ ପୁନିଆ କହିଛନ୍ତି, "ଜନ୍ତରମନ୍ତରରେ ଆନ୍ଦୋଳନ ସମୟରେ ଆମ ସହିତ ଆସିବା ପାଇଁ ବିଜେପିର ମହିଳା ସାଂସଦମାନଙ୍କୁ ମଧ୍ୟ ଆମେ ଚିଠି ଲେଖିଥିଲୁ । ହେଲେ ସେମାନେ ଆମ ସହ ଆମ ଝିଅମାନଙ୍କ ସହ ଛିଡ଼ା ହୋଇନଥିଲେ । ଯେତେବେଳେ ଭିନେଶ ଫାଇନାଲକୁ ଗଲେ ସାରା ଦେଶ ଉତ୍ସାହିତ ହୋଇଥିଲା । ତା'ପରେ ଯାହା ଘଟିଲା, ସେଥିରେ ସାରାଦେଶ ଦୁଃଖିତ ଥିଲା । ହେଲେ କିଛି ଆଇଟି ସେଲ୍ ହିଁ ଉତ୍ସବ ମନେଇଥିଲେ । ତେଣୁ ଆମେ ଏହି ଲଢ଼େଇ ଜାରି ରଖିବୁ । କଂଗ୍ରେସ ଦଳକୁ ଓ ଦେଶକୁ ଆହୁରି ମଜଭୁତ କରିବାକୁ କାମ କରିବୁ ।"
नेता विपक्ष श्री @RahulGandhi से विनेश फोगाट जी और बजरंग पुनिया जी ने मुलाकात की। pic.twitter.com/UK7HW6kLEL
— Congress (@INCIndia) September 4, 2024
ଦୁଇଦିନ ପୂର୍ବେ ରାହୁଲ ଗାନ୍ଧୀଙ୍କୁ ଭେଟିଥିଲେ :-
କୁସ୍ତିଯୋଦ୍ଧା ଭିନେଶ ଫୋଗାଟ ଓ ବଜରଙ୍ଗ ପୁନିଆ କଂଗ୍ରେସରେ ଯୋଗ ଦେଇ ନିର୍ବାଚନ ଲଢ଼ିପାରନ୍ତି ବୋଲି ଲାଗି ରହିଥିବା ଚର୍ଚ୍ଚା ମଧ୍ୟରେ 4 ସେପ୍ଟେମ୍ବରରେ ଉଭୟ ରାହୁଲ ଗାନ୍ଧୀ ଓ କେସି ବେଣୁଗୋପାଳଙ୍କ ଭଳି ଦଳର ହାଇକମାଣ୍ଡଙ୍କୁ ଭେଟିଥିଲେ । ହରିୟାଣା ବିଧାନସଭା ନିର୍ବାଚନ ପୂର୍ବରୁ କଂଗ୍ରେସ ଦିନେ କିମ୍ବା ଦୁଇଦିନ ଭିତରେ ଏହାର ପ୍ରାର୍ଥୀ ତାଲିକା ଘୋଷଣା କରିବାକୁ ଯାଉଛି । ଏହା ପୂର୍ବରୁ ଉଭୟ ଭିନେଶ ଓ ବଜରଙ୍ଗ ପୁନିଆ ରାହୁଲ ଗାନ୍ଧୀ ଓ ଦଳର ସଂଗଠନ ସଚିବ କେସି ବେଣୁଗୋପାଳଙ୍କୁ ଭେଟିବା ସୂଚାଇ ଦେଇଥିଲା ଯେ ଉଭୟ କୁସ୍ତିଯୋଦ୍ଧା କଂଗ୍ରେସ ଟିକଟରେ ହରିୟାଣା ବିଧାନସଭା ନିର୍ବାଚନ ଲଢ଼ିପାରନ୍ତି । ଏହା ପୂର୍ବରୁ ସେମାନଙ୍କୁ ଅନେକ ଥର ହରିୟାଣାର ବରିଷ୍ଠ କଂଗ୍ରସ ନେତା ଦୀପେନ୍ଦ୍ର ସିଂ ହୁଡା ଓ ଭୁପିନ୍ଦର ସିଂ ହୁଡାଙ୍କ ସହିତ ଦେଖିବାକୁ ମିଳିଛି ।
ପ୍ୟାରିସ ଅଲିମ୍ପିକ୍ସ 2024ରେ ଭାଗ୍ୟ ଦେଲାନି ସାଥ :-
ଅଲିମ୍ପିକ୍ସରେ ମହିଳା 50 କିଲୋଗ୍ରାମ ଫ୍ରିଷ୍ଟାଇଲ ରେସ୍ଲିଂରେ ସେମିଫାଇାନଲରେ ବିଜୟୀ ହେବାପରେ ଫାଇାନଲରେ ପ୍ରବେଶ କରିଥିଲେ ଷ୍ଟାର ରେସଲର ଭିନେଶ ଫୋଗାଟ । ଏହା ପରଦିନ ତାଙ୍କର ଫାଇନାଲ ମ୍ୟାଚ୍ ରହିଥିଲା । କିନ୍ତୁ ଏହା ପୂର୍ବରୁ ସେ ଅଯୋଗ୍ୟ ଘୋଷିତ ହୋଇଥିଲେ । 50 କିଲୋଗ୍ରାମରୁ ତାଙ୍କର ଓଜନ ମାତ୍ର 100 ଗ୍ରାମ ଅଧିକ ହେବାରୁ ଫାଇନାଲରୁ ବଞ୍ଚିତ ହେବା ସହ ପଦକ ମଧ୍ୟ ହାତରୁ ଚାଲିଯାଇଥିଲା । ଏହି ଖବର ଶୁଣିବା ପରେ ପୁରା ଭାଙ୍ଗି ପଡିଥିଲେ ଭିନେଶ । ଭିନେଶଙ୍କ ସମେତ ଭାରତୀୟ ଅଲିମ୍ପିକ୍ସ ଆସୋସିଏସନ କୋର୍ଟ ଅଫ୍ ଆର୍ବିଟ୍ରେସନ ଫର ସ୍ପୋର୍ଟ୍ସ (CAS)ରେ ସଂଯୁକ୍ତ ରୌପ୍ୟ ପଦକ ପାଇଁ ଆବେଦନ କରିଥିଲେ । କିନ୍ତୁ ଏହାକୁ ଖାରଜ କରିଦେଇଥିଲେ CAS । ଫଳରେ ଭିନେଶଙ୍କ ପଦକ ଆଶା ମଉଳି ଯାଇଥିଲା ।
ଭାରତରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲେ ଭିନେଶ :-
ପ୍ୟାରିସ ଅଲିମ୍ପିକ୍ସରେ ବିଫଳ ହେବାପରେ ସାରା ଦେଶରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲେ ଭିନେଶ ଫୋଗାଟ । ଦେଶବାସୀଙ୍କଠାରୁ ଭରପୁର ସମର୍ଥନ ପାଇଥିଲେ ରେସଲର । ଏପରିକି ପ୍ରଧାନମନ୍ତ୍ରୀ ମୋଦି ମଧ୍ୟ ଭିନେଶଙ୍କ ସମର୍ଥନରେ ଟ୍ବିଟ କରି ଯାହା ସମ୍ଭବ ଭିନେଶଙ୍କ ପାଇଁ କରିବାକୁ ଭାରତୀୟ ଅଲିମ୍ପିକ୍ସ ସଂଘକୁ ନିର୍ଦ୍ଦେଶ ଦେଇଥିଲେ । ତେବେ ଭିନେଶ ଫେରିବା ପରେ ଦିଲ୍ଲୀ ବିମାନବନ୍ଦରରେ ଭିନେଶଙ୍କୁ ଭବ୍ୟ ସ୍ବାଗତ କରିଥିଲେ ହରିୟାଣା କଂଗ୍ରେସ ନେତା ତଥା ସାଂସଦ ଦୀପେନ୍ଦ୍ର ସିଂ ହୁଡା । ଏହାପରେ ଦିଲ୍ଲୀରୁ ହରିୟାଣା ଭିନେଶଙ୍କ ଗାଁ ପର୍ଯ୍ୟନ୍ତ ଭିନେଶଙ୍କୁ ରୋଡ ଶୋ'ରେ ନିଆଯାଇଥିଲା । ସେତେବେଳେ ମଧ୍ୟ କଂଗ୍ରେସ ନେତା ଭିନେଶଙ୍କ ସମର୍ଥନରେ ଯାଇଥିଲେ । ସେହି ସମୟରେ ଭିନେଶ କଂଗ୍ରେସରେ ମିଶି ରାଜନୀତିରେ ଯୋଗ ଦେଇ ପାରନ୍ତି ବୋଲି ଚର୍ଚ୍ଚା ହୋଇଥିଲା ।
ବିଜେପି ସାଂସଦଙ୍କ ବିରୋଧରେ ଦୀର୍ଘ ଦିନ ଧରି କରିଥିଲେ ଆନ୍ଦୋଳନ :-
ଭାରତୀୟ କୁସ୍ତି ମହାସଂଘର ତତ୍କାଳୀନ ଅଧ୍ୟକ୍ଷ ତଥା ପୂର୍ବତନ ବିଜେପି ସାଂସଦ ବ୍ରିଜଭୂଷଣ ଶରଣ ସିଂହଙ୍କ ବିରୋଧରେ ମହିଳା ରେସଲର ଯୌନ ଉତ୍ପୀଡ଼ନ ଅଭିଯୋଗ ଆଣିଥିଲେ । ଦିଲ୍ଲୀ ଜନ୍ତରମନ୍ତରରେ ସେହି ଆନ୍ଦୋଳନର ସଦସ୍ୟ ଥିଲେ ଭିନେଶ ଫୋଗାଟ ଓ ବଜରଙ୍ଗ ପୁନିଆ । ଏହି ଆନ୍ଦୋଳନ ମଧ୍ୟ ସାରା ଦେଶର ଦୃଷ୍ଟି ଆକର୍ଷଣ କରିଥିଲା । କଂଗ୍ରସ ସମେତ ବିଭିନ୍ନ ବିରୋଧୀ ଦଳ ସେହି ସମୟରୁ କୁସ୍ତିଯୋଦ୍ଧାଙ୍କ ସମର୍ଥନରେ ରହିଆସିଛନ୍ତି । ଏହାରି ଭିତରେ ବ୍ରିଜଭୂଷଣଙ୍କ ଘନିଷ୍ଠ ସହଯୋଗୀ ସଞ୍ଜୟ ସିଂହ କୁସ୍ତି ମହାସଂଘର ଅଧ୍ୟକ୍ଷ ଭାବେ ନିର୍ବାଚିତ ହୋଇଥିଲେ । ଏହାକୁ ବିରୋଧ କରି କୁସ୍ତିଯୋଦ୍ଧା ସାକ୍ଷୀ ମଲିକ କୁସ୍ତି ଛାଡ଼ିବା ନେଇ ଘୋଷଣା କରିବା ସହ ଅଲିମ୍ପିକ ବିଜେତା ବଜରଙ୍ଗ ପୁନିଆ ସମ୍ମାନଜନକ ପଦ୍ମଶ୍ରୀ ପୁରସ୍କାର ଫେରାଇଥିଲେ । ସଞ୍ଜୟ ବ୍ରିଜଭୂଷଣ ଶରଣ ସିଂହଙ୍କ ଘନିଷ୍ଠ ସହଯୋଗୀ ହୋଇଥିବାରୁ ସେ ଅଧ୍ୟକ୍ଷ ନିର୍ବାଚିତ ହେବାକୁ ନେଇ ତୀବ୍ର ବିରୋଧ କରାଯାଇଥିଲା । ଏହି ସମୟରେ ଭିନେଶ ମଧ୍ୟ ନିଜର ଖେଳରତ୍ନ ଓ ଅର୍ଜୁନ ପୁରସ୍କାର ଫେରାଇଥିଲେ ।
ଏହା ମଧ୍ୟ ପଢ଼ନ୍ତୁ :-
- କଂଗ୍ରେସରୁ ନିର୍ବାଚନ ଲଢ଼ିବେ ରେସଲର ଭିନେଶ ଫୋଗାଟ ଓ ବଜରଙ୍ଗ ପୁନିଆ ! ପାର୍ଟି ହାଇକମାଣ୍ଡଙ୍କୁ ଭେଟିଲେ - Vinesh Phogat and Bajrang Punia
- ରାଜନୀତିରେ ପାଦ ଦେବେ ଭିନେଶ ଫୋଗାଟ; ଭଉଣୀଙ୍କ ବିରୋଧରେ ଲଢିବେ ନିର୍ବାଚନ ! - Vinesh Phogat may join Politics
ବ୍ୟୁରୋ ରିପୋର୍ଟ, ଇଟିଭି ଭାରତ
