ନୂଆଦିଲ୍ଲୀ : ଆଇସିସିର ନୂଆ ବସ ହୋଇଛନ୍ତି ଜୟ ଶାହ । ଅନ୍ତର୍ଜାତୀୟ କ୍ରିକେଟ ପରିଷଦ ନୂଆ ଅଧ୍ୟକ୍ଷ ଭାବେ ନିର୍ଦ୍ବନ୍ଦ୍ବରେ ନିର୍ବାଚିତ ହୋଇଛନ୍ତି ଶାହ । ମାତ୍ର 36 ବର୍ଷ ବୟସରେ ସର୍ବକନିଷ୍ଠ ଆଇସିସି ଅଧ୍ୟକ୍ଷ ହେବାର ଗୌରବ ଅର୍ଜନ କରିଛନ୍ତି ଜୟ ଶାହ । ଆସନ୍ତା ଡିସେମ୍ବର 1 ତାରିଖରୁ ଶାହ ଆଇସିସି ଚେୟାରମ୍ୟାନ ଭାବେ କାର୍ଯ୍ୟଭାର ସମ୍ଭାଳିବେ । କୁହାଯାଉଥିଲା ଏଥିପାଇଁ ଆଇସିସିର 16 ସଦସ୍ୟଙ୍କ ମଧ୍ୟରୁ ପ୍ରାୟ 15 ସଦସ୍ୟଙ୍କ ସମର୍ଥନ ଜୟ ଶାହଙ୍କ ପ୍ରତି ଥିଲା । ବିସିସିଆଇ ସଚିବ ଏବେ ଆଇସିସି ଅଧ୍ୟକ୍ଷ ନିର୍ବାଚିତ ହେବାପରେ ପୂରା ଦେଶରେ କ୍ରିକେଟପ୍ରେମୀଙ୍କ ମଧ୍ୟରେ ଉତ୍ସାହର ମାହୋଲ । ଏଭଳି ସ୍ଥିତିରେ ପାକିସ୍ତାନରେ କିନ୍ତୁ ଭାଳେଣି ପଡ଼ିଲାଣି ।
କ'ଣ ହେବ ଆଇସିସି ଚାମ୍ପିୟନ୍ସ ଟ୍ରଫିର ଭବିଷ୍ୟତ ? :-
ଜୟ ଶାହ ଆଇସିସି ଚେୟାରମ୍ୟାନ ଭାବେ ଦାୟିତ୍ବ ନେବା ପରେ ପାକିସ୍ତାନ ଚିନ୍ତାରେ ପଡ଼ିବାର ମୁଖ୍ୟ କାରଣ ହେଉଛି ଚାମ୍ପିୟନ୍ସ ଟ୍ରଫି 2025 । କାରଣ ଆଗାମୀ ଚାମ୍ପିୟନ୍ସ ଟ୍ରଫି ଆୟୋଜନ ଅଧିକାର ପାକିସ୍ତାନକୁ ମିଳିଛି । ଏହାର ପ୍ରସ୍ତୁତିରେ ପିସିବି ଏବେ ଜୋରଦାର ପ୍ରୟାସ ଚଳାଇଛି । ହେଲେ ଜୟ ଶାହ ଆଇସିସି ଅଧ୍ୟକ୍ଷ ହେବା ପରେ ଚାମ୍ପିୟନ୍ସ ଟ୍ରଫି ଆୟୋଜନ କରିବାର ଅଧିକାର ହାତରୁ ଖସିଯିବାର ଭୟ ଏବେ ପାକିସ୍ତାନକୁ ଘାରିଛି । ଏହାର ଅନେକ କାରଣ ମଧ୍ୟ ରହିଛି । ଏହା ପୂର୍ବରୁ ପାକିସ୍ତାନ ଏସିଆ କପ୍ 2023 ଆୟୋଜନ କରିଥିଲା । ହେଲେ ପାକିସ୍ତାନ ଯାଇ ଖେଳିବାକୁ ଭାରତ ରାଜି ନହେବାରୁ ଶେଷରେ ହାଇବ୍ରିଡ ମୋଡରେ ପାକିସ୍ତାନ ଓ ଶ୍ରୀଲଙ୍କାରେ ଆୟୋଜନ ହୋଇଥିଲା ଏସିଆ କପ୍ ।
ଏସିଆ କପ୍ 2023କୁ ହାଇବ୍ରିଡ ମୋଡରେ କରାଇଥିଲେ ଶାହ :-
ଏସିଆ କପ୍ 2023 ସମୟରେ ଜୟ ଶାହ ବିସିସିଆଇ ସଚିବ ଥିବା ସହିତ ଏସିସି (ଏସୀୟ କ୍ରିକେଟ ପରିଷଦ)ର ଅଧ୍ୟକ୍ଷ ମଧ୍ୟ ରହିଥିଲେ । ସେହି ସମୟରେ ଭାରତୀୟ ଦଳ କୌଣସି ବି ପରିସ୍ଥିତିରେ ପାକିସ୍ତାନ ଯାଇ ଖେଳିବାକୁ ଆଗ୍ରହ ଦେଖାଇ ନଥିଲା । ଫଳରେ ବିସିସିଆଇ ସଚିବ ତଥା ଏସିସି ଅଧ୍ୟକ୍ଷ ଜୟ ଶାହଙ୍କ ନେତୃତ୍ବରେ ଏସିଆ କପ୍ କେବଳ ପାକିସ୍ତାନରେ ଆୟୋଜନ ନହୋଇ ହାଇବ୍ରିଡ ମୋଡରେ ପାକିସ୍ତାନ ଓ ଶ୍ରୀଲଙ୍କାରେ ଆୟୋଜନ ହେବ ବୋଲି ନିଷ୍ପତ୍ତି ହୋଇଥିଲା । ଅର୍ଥାତ ଭାରତର ମ୍ୟାଚ ଗୁଡିକ ଶ୍ରୀଲଙ୍କାରେ ଖେଳାଯାଇଥିଲା । ଏବେ କୌଣସି ପରିସ୍ଥିତିରେ ଆଇସିସି ଅଧ୍ୟକ୍ଷ ହେବା ପରେ ଶାହ ଚାମ୍ପିୟନ୍ସ ଟ୍ରଫି 2025 ନେଇ ଶାହଙ୍କ ଆଭିମୁଖ୍ୟ କ'ଣ ହେବ, ତାହା ଉପରେ ଭାରତ ଓ ପାକିସ୍ତାନ ସମେତ ସମଗ୍ର ବିଶ୍ବର କ୍ରିକେଟପ୍ରେମୀଙ୍କ ନଜର ।
ବ୍ୟୁରୋ ରିପୋର୍ଟ, ଇଟିଭି ଭାରତ
