ନୂଆଦିଲ୍ଲୀ : ପ୍ୟାରିସ୍ ଅଲିମ୍ପିକ୍ସ 2024ରେ ଭାରତ ପାଇଁ ଶୁଟିଂରେ ଦୁଇ ଦୁଇଟି ବ୍ରୋଞ୍ଜ ପଦକ ଜିତି ଇତିହାସ ରଚିଛନ୍ତି ଷ୍ଟାର ଶୁଟର ମନୁ ଭାକର । ପ୍ୟାରିସ୍ ଅଲିମ୍ପିକ୍ସ 2024ରେ ଏଭଳି ଉତ୍କୃଷ୍ଟ ପ୍ରଦର୍ଶନ ପାଇଁ ମନୁ ଭାକରଙ୍କୁ ଦିଲ୍ଲୀରେ କେନ୍ଦ୍ରମନ୍ତ୍ରୀ ସର୍ବାନନ୍ଦ ସୋନୋୱାଲ ସମ୍ମାନିତ କରିଛନ୍ତି । ଏହା ସହିତ ତାଙ୍କୁ ପୁରସ୍କାର ସ୍ବରୂପ 10 ଲକ୍ଷ ଟଙ୍କାର ଚେକ୍ ମଧ୍ୟ ପ୍ରଦାନ କରିଛନ୍ତି କେନ୍ଦ୍ରମନ୍ତ୍ରୀ ସୋନୋୱାଲ ।
#WATCH | Delhi | Union Minister Sarbananda Sonowal says, " today, the people of the nation feel proud of manu bhaker...in the near future, she is going to win many more medals for the country. no doubt about it! she has the ability, potential, vision, dedication, devotion,… pic.twitter.com/D5FyxvabNv
— ANI (@ANI) August 16, 2024
ମନୁଙ୍କ ଫ୍ୟାନ ହେଲେ କେନ୍ଦ୍ରମନ୍ତ୍ରୀ :-
ମନୁଙ୍କୁ ସମ୍ମାନିତ କରିବା ସମୟରେ କେନ୍ଦ୍ରମନ୍ତ୍ରୀ ସର୍ବାନନ୍ଦ ସୋନୋୱାଲ କହିଛନ୍ତି, "ଆଜି ମନୁ ଭାକରଙ୍କ ପାଇଁ ଦେଶବାସୀ ଗର୍ବ ଅନୁଭବ କରୁଛନ୍ତି । ସେ ଭବିଷ୍ୟତରେ ଦେଶ ପାଇଁ ଆହୁରି ଅନେକ ପଦକ ଜିତିବାକୁ ଯାଉଛନ୍ତି, ଏଥିରେ କୌଣସି ସନ୍ଦେହ ନାହିଁ । ତାଙ୍କର ଯୋଗ୍ୟତା, କ୍ଷମତା, ଦୂରଦର୍ଶିତା, ସମର୍ପଣ, ନିଷ୍ଠା, ପ୍ରତିବଦ୍ଧତା ଏବଂ କଠିନ ପରିଶ୍ରମ କରିବାକୁ ଆଗ୍ରହ ଅଛି । ମୁଁ ନିଶ୍ଚିତ ଯେ ମନୁ ତାଙ୍କ ସଚ୍ଚୋଟତା ଏବଂ ପ୍ରତିବଦ୍ଧତାର ମନୋଭାବ ସହିତ ଆହୁରି ଅନେକ ସଫଳତା ହାସଲ କରିବେ ।
ଅଲିମ୍ପିକ୍ସ 2024ରେ ଇତିହାସ ରଚିଥିଲେ ମନୁ :-
ମନୁ ଭାକର ପ୍ୟାରିସ ଅଲିମ୍ପିକ୍ସ 2024ରେ ଇତିହାସ ରଚିଥିଲେ । ସେ ମହିଳା 10 ମିଟର ଏୟାର ପିସ୍ତଲ ଏକକ ଇଭେଣ୍ଟରେ ବ୍ରୋଞ୍ଜ ପଦକ ଜିତି ଦେଶକୁ ପ୍ୟାରିସରୁ ପ୍ରଥମ ମେଡାଲ ଦେଇଥିଲେ । ଏହାପରେ ସରବଜୋତ ସିଂହଙ୍କ ସହ ମିଶି ସେ 10 ମିଟର ଏୟାର ପିସ୍ତଲ ମିଶ୍ରିତ ବର୍ଗରେ ଦ୍ବିତୀୟ ବ୍ରୋଞ୍ଜ ମେଡାଲ ହାସଲ କରିଥିଲେ । ଏହା ସହିତ ଗୋଟିଏ ଅଲିମ୍ପିକ୍ସ ସଂସ୍କରଣରେ ଦୁଇଟି ପଦକ ଜିତିଥିବା ପ୍ରଥମ ଭାରତୀୟ ହେବାର ଗୌରବ ଅର୍ଜନ କରିଥିଲେ ମନୁ ଭାକର । ଏହାପରେ ପ୍ୟାରିସ ଅଲିମ୍ପିକ୍ସ 2024 ଉଦ୍ଯାପନୀ ସମାରୋହରେ ମନୁଙ୍କୁ ଭାରତୀୟ ଦଳର ଧ୍ବଜାବାହକ ଘୋଷଣା କରାଯାଇଥିଲା ।
ଏଭଳି ଉଚ୍ଚକୋଟୀର ପ୍ରଦର୍ଶନ କରି ସ୍ବଦେଶ ଫେରିବା ପରେ ମନୁଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବିରୋଧୀ ଦଳ ନେତା ରାହୁଲ ଗାନ୍ଧୀ, କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ ଏବଂ କ୍ରୀଡ଼ାମନ୍ତ୍ରୀ ମନସୁଖ ମାଣ୍ଡଭୀୟ ପ୍ରମୁଖଙ୍କ ସମେତ ଅନେକ ନେତା ଓ ରାଜନେତା ଭେଟିଛନ୍ତି । ପ୍ୟାରିସ ଅଲିମ୍ପିକ୍ସ ପରେ ପିଏମ୍ ମୋଦି ଆଥଲେଟମାନଙ୍କୁ ଭେଟିଥିଲେ, ଯେଉଁଥିରେ ସେ ମନୁ ଭାକରଙ୍କର ବହୁତ ପ୍ରଶଂସା କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
