ହାଇଦ୍ରାବାଦ: ଚଳିତ ପ୍ୟାରିସ ଅଲିମ୍ପିକ୍ସରେ ଭାରତ ହାତରୁ ଏକ ନିଶ୍ଚିତ ପଦକ ଖସିଯାଇଛି । ମହିଳା 50 କେଜି ବର୍ଗ ଫ୍ରି-ଷ୍ଟାଇଲ କୁସ୍ତି ଫାଇନାଲ ଖେଳିବା ପୂର୍ବରୁ ଅଯୋଗ୍ୟ ଘୋଷିତ ହୋଇଥିଲେ ଷ୍ଟାର କୁସ୍ତିଯୋଦ୍ଧା ଭିନେଶ ଫୋଗତ । ଓଜନ ମାତ୍ର 100 ଗ୍ରାମ ବୃଦ୍ଧି କାରଣରୁ ଫାଇନାଲ ଇଭେଣ୍ଟ ପୂର୍ବରୁ ତାଙ୍କୁ ଅଯୋଗ୍ୟ ଘୋଷିତ କରାଯାଇଥିଲା । ଏଥିପାଇଁ ଭାରତ ହାତରେ ଏକ ସୁନିଶ୍ଚିତ ପଦକ ଖସିଯାଇଛି । ତେବେ ଏହା ପରେ ଭିନେଶ ତାଙ୍କ କୁସ୍ତି କ୍ୟାରିଅରରୁ ସନ୍ୟାସ ନେଇଥିବା ବେଳେ ଭାରତରେ ଏହାକୁ ନେଇ ବାଦ ବିବାଦ ଥମିବାର ନାଁ ଧରୁନି । ସୋସିଆଲ ମିଡିଆରେ ଫୋଗତ ନିଆଁ ଧିରେ ଧିରେ ବ୍ୟାପିବାରେ ଲାଗିଛି ।
ଏପଟେ ଏହି ମାମଲାରେ ନିଜର ମତାମତ ରଖିଛନ୍ତି ଷ୍ଟାର ବ୍ୟାଡମିଣ୍ଟନ ଖେଳାଳି ସାଇନା ନେହଓ୍ବାଲ । ଏକ ଜାତୀୟ ଗଣମାଧ୍ୟମକୁ ସାକ୍ଷାତକାର ଦେଇ ସାଇନା କହିଛନ୍ତି, କି ଏହା ଭିନେଶଙ୍କର ପ୍ରଥମ ଅଲିମ୍ପିକ୍ସ ନୁହେଁ । ତେଣୁ ସେ ନିଜେ ନିଜକୁ ଦାୟୀ କରିବା ଉଚିତ । ତାଙ୍କର ଏହା ବଡ ତୃଟି ।
"ଭିନେଶ ହିଁ କେବଳ ଏଥିପାଇଁ ନିଜେ ଦାୟୀ । ଅଲିମ୍ପିକ୍ସ ଭଳି କ୍ରୀଡା ମହାକୁମ୍ଭରେ ଏପରି ଘଟଣା ଘଟିବା ଉଚିତ ନୁହେଁ । ଏପରି କୌଣସି ଆଥଲେଟଙ୍କ ସହିତ ଘଟିବା ଉଚିତ ନୁହେଁ । ଏହା କିପରି ଘଟିଲା ତାହା ଏକ ବଡ ପ୍ରଶ୍ନ । କାରଣ ଭିନେଶ ବଡ ସ୍ବପ୍ନ ଦେଖି ଥିବେ ନିଶ୍ଚୟ । ତାଙ୍କ ନିକଟରେ ଅନେକ କୋଚ, ଫିଜିଓ, ଟ୍ରେନର ରହିଛନ୍ତି । ସେମାନେ ସମସ୍ତେ ଦୁଃଖିତ ଥିବେ ନିଶ୍ଚୟ । ମୁଁ ରେସଲିଂ ନିୟମ କାନୁନ ନେଇ ଅବଗତ ନୁହେଁ, କିନ୍ତୁ ଜଣେ ଆଥଲେଟ ଭାବେ ମୋତେ ବି ବହୁତ ଦୁଃଖ ଲାଗୁଛି," କହିଛନ୍ତି ସାଇନା ।
ସେ ପୁଣି କହିଛନ୍ତି, "ଏହା ତାଙ୍କର ପ୍ରଥମ ଅଲିମ୍ପିକ୍ସ ନୁହେଁ । ଏହା ଭିନେଶଙ୍କର 3ୟ ଅଲିମ୍ପିକ୍ସ । ଜଣେ ଆଥଲେଟ ଭାବେ ସେ ନିଜେ ନିୟମ କାନୁନ ନେଇ ଅବଗତ ଥିବେ । ଯଦି ଏହା ଗୋଟିଏ ବଡ ତୃଟି, ତାହାଲେ ଏହା କିପରି ଘଟିଲା ବୁଝା ପଡୁ ନାହିଁ । ଅଲିମ୍ପିକ୍ସ ଭଳି ଇଭେଣ୍ଟରେ ମୁଁ ଅନ୍ୟ କୌଣସି କୁସ୍ତିଯୋଦ୍ଧାଙ୍କୁ ନେଇ ଏଭଳି ଖବର ଶୁଣିନାହିଁ । ଯେ କୌଣସି କୁସ୍ତିଯୋଦ୍ଧା ଅଧିକା ଓଜନ ପାଇଁ ଅଯୋଗ୍ୟ ଘୋଷିତ ହୋଇଛନ୍ତି । ସେ ଜଣେ ଅଭିଜ୍ଞ ଖେଳାଳି ତେଣୁ କୋଉଠି ନା କୋଉଠି ତାଙ୍କ ପକ୍ଷରୁ ତୃଟି ରହିଛି ନିଶ୍ଚିତ । ସେ ଏଥିପାଇଁ ଦାୟୀ ହେବା ଉଚିତ । ଏତେ ବଡ ମ୍ୟାଚରେ ଏଭଳି ତୃଟି ଗ୍ରହଣୀୟ ନୁହେଁ ।"
