ପ୍ୟାରିସ (ଫ୍ରାନ୍ସ): ଆରମ୍ଭ ହୋଇଛି ବହୁ ପ୍ରତିକ୍ଷିତ ଅଲିମ୍ପିକ୍ସ ମହାକୁମ୍ଭ । ଯାହା ଉପରେ କେବଳ ଭାରତ ସମେତ ସମଗ୍ର ବିଶ୍ବର ସମସ୍ତ କ୍ରୀଡ଼ାପ୍ରେମୀଙ୍କ ନଜର ରହିଛି । ହେଲେ ପ୍ରଥମ ଦିନରେ ଭାରତୀୟ କ୍ରୀଡ଼ାପ୍ରେମୀଙ୍କ ପାଇଁ ପ୍ୟାରିସ୍ରୁ ଆସିଛି ଏକ ବଡ଼ ନୈରାଶ୍ୟଜନକ ଖବର । ଶୁଟିଂରେ ପଦକ ଆଶା ରଖିଥିବା ଭାରତୀୟ ଟିମ୍କୁ ନିରାଶ ହେବାକୁ ପଡ଼ିଛି । ଫାଇନାଲ୍ରେ ପ୍ରବେଶ କରି ପାରିଲେନି ଭାରତୀୟ ଷ୍ଟାର ଶୁଟର ରମିତା ଜିନ୍ଦଲ ଓ ଅର୍ଜୁନ ବବୁତା ଯୋଡ଼ି ।
🇮🇳 Update: 10M AIR RIFLE MIXED TEAM QUALIFICATION Results 👇🏼
— SAI Media (@Media_SAI) July 27, 2024
- Ramita Jindal and Arjun Babuta finished 6th with a score of 628.7
- Elavenil Valarivan and Sandeep Singh finished 12th with a score of 626.3
Tune into DD Sports and Jio Cinema to watch LIVE!
Let’s #Cheer4Bharat pic.twitter.com/CemQHJ93rK
ମଉଳିଲା ଭାରତର ପଦକ ଆଶା:-
ଆଜି ପୂର୍ବ ନିର୍ଦ୍ଧାରିତ ସମୟ ଦିନ 12ଟା 30ରେ ପ୍ରଥମେ ଏୟାର ରାଇଫଲ (10 ମିଟର) ଯୁଗଳ ଟିମ୍ ଯୋଗ୍ୟତା ପର୍ଯ୍ୟାୟ ମ୍ୟାଚ୍ ଆରମ୍ଭ ହୋଇଥିଲା । ହେଲେ ଏଥିରେ କଡ଼ା ଟକ୍କର ସତ୍ତ୍ବେ ରମିତା ଜିନ୍ଦଲ ଓ ଅର୍ଜୁନ ବବୁତା ଯୋଡ଼ି ପଛରେ ପଡ଼ିଯାଇଥିଲେ । ଏହି ଯୋଡ଼ି 628.7 ସ୍କୋର ହାସଲ କରିବା ସହିତ ଷଷ୍ଠ ସ୍ଥାନରେ ରହିଥିଲେ । ହେଲେ ଏହି ପ୍ରତିଯୋଗିତାରେ ଶୀର୍ଷ 4ଟି ଯୋଡ଼ି ଯୋଗ୍ୟତା ଅର୍ଜନ କରି ଆଗକୁ ଯାଇଥିଲେ । ଅନ୍ୟପଟେ ଅନ୍ୟତମ ଭାରତୀୟ ଶୁଟର ଯୋଡ଼ି ଏଲାଭେନିଲ ଭଲାରିବନ ଓ ସନ୍ଦୀପ ସିଂହ ବିଫଳ ହୋଇ ଦ୍ବାଦଶ ସ୍ଥାନରେ ରହିଥିଲେ । ଫଳରେ ଉଭୟ ଭାରତୀୟ ଯୋଡ଼ି ଏୟାର ରାଇଫଲ (10 ମିଟର, ଯୁଗଳ)ରେ ବିଫଳ ହୋଇଛନ୍ତି । ଅର୍ଥାତ ଏହି ଇଭେଣ୍ଟରୁ ଭାରତର ପଦକ ଆଶା ମଉଳି ଯାଇଛି ।
ପ୍ରଥମ ଗୋଲ୍ଡ ଜିତିଲା ଚାଇନା:-
ଏହି ଇଭେଣ୍ଟରେ, ଅର୍ଥାତ ଏୟାର ରାଇଫଲ (10 ମିଟର) ଯୁଗଳରେ ପ୍ରଥମ ସ୍ବର୍ଣ୍ଣ ପଦକ ଜିତିଛି ଚାଇନା । ଚାଇନାର ହୁଆଙ୍ଗ ୱୁଟିଙ୍ଗ ଓ ଶେଙ୍ଗ ଲିହାଓ ଏହି ଇଭେଣ୍ଟରେ ନିଜ ଦେଶକୁ ପ୍ରଥମ ସ୍ବର୍ଣ୍ଣ ପଦକ ଭେଟି ଦେଇଛନ୍ତି । କୋରିଆର କିମ୍ ଜି ଓ ପାର୍କ ହାଉଜୁନଙ୍କୁ କଡ଼ା ମୁକାବିଲାରେ 16-12ରେ ମାତ ଦେଇ ଚୀନି ଯୋଡ଼ି ଏହି ଇଭେଣ୍ଟରେ ହାସଲ କରିଛନ୍ତି ଗୋଲ୍ଡ ମେଡାଲ । ଫଳରେ କୋରିଆନ ଯୋଡ଼ିକୁ ରୌପ୍ୟରେ ସନ୍ତୁଷ୍ଟ ହେବାକୁ ପଡ଼ିଛି । ଅନ୍ୟପଟେ ବ୍ରୋଞ୍ଜ ପଦକ ପାଇଁ ଜର୍ମାନୀକୁ 17-5ରେ ମାତ ଦେଇଛି କାର୍ଜଗିସ୍ତାନ । କାର୍ଜଗିସ୍ତାନ ଶୁଟର ଆଲେକ୍ଜାଣ୍ଡ୍ରା ଲେ ଏବଂ ଇସଲାମ ସତପେଭ ଜର୍ମାନ ଯୋଡ଼ିକୁ ମାତ ଦେଇ କାଂସ୍ୟ ପଦକ ନିଜ ଦେଶକୁ ନେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
