ଚେନ୍ନାଇ : ଏବେଠାରୁ ଆରମ୍ଭ ହୋଇଗଲାଣି ଆଇପିଏଲ୍ 2025 ପାଇଁ କାଉଣ୍ଟ ଡାଉନ୍ । ଆସନ୍ତା ଡିସେମ୍ବରରେ ସମ୍ଭବତଃ ମେଗା ଅକ୍ସନ ହେବାକୁ ଥିବାବେଳେ କେଉଁ ଦଳ କେଉଁ କ୍ରିକେଟରଙ୍କୁ ରିଟେନ୍ କରିବେ ଓ କାହାକୁ ରିଲିଜ କରିବେ, ସେନେଇ ଜୋର ଧରିଲାଣି ଚର୍ଚ୍ଚା ଓ ଆଲୋଚନା । ଏହାରି ଭିତରେ ଭାରତୀୟ ଦଳର ପୂର୍ବତନ ଅଧିନାୟକ ତଥା ଆଇପିଏଲ୍ରେ ଚେନ୍ନାଇ ସୁପର କିଙ୍ଗସ୍ର ଭେଟେରାନ କ୍ରିକେଟର ମହେନ୍ଦ୍ର ସିଂହ ଧୋନୀ ହେଉଛନ୍ତି ବେଶ ଭାଇରାଲ । ସେ ଏଥର ଆଇପିଏଲ୍ ଖେଳିବେ କି ନାହିଁ ଏପର୍ଯ୍ୟନ୍ତ ସ୍ପଷ୍ଟ ହୋଇନଥିବାବେଳେ ଗୋଟିଏ ପରେ ଗୋଟିଏ ଖବର ତାଙ୍କ ପ୍ରଶଂସକଙ୍କୁ ବିଶ୍ବାସ ଆଣି ଦେଉଛି ଯେ, ଧୋନୀ ଆଇପିଏଲ୍ ଖେଳି ପାରନ୍ତି ।
Our Greatest of All Time! 🦁💛#WhistlePodu #ThalaThalaDhan pic.twitter.com/KmxtKgsKip
— Chennai Super Kings (@ChennaiIPL) August 18, 2024
ଆଇପିଏଲ୍ରେ ସଫଳତମ ଅଧିନାୟକ :-
2008ରୁ ଆରମ୍ଭ ହୋଇଥିବା ଆଇପିଏଲ୍ରେ ଏପର୍ଯ୍ୟନ୍ତ 17 ସିଜିନ ଖେଳ ସରିଲାଣି । ଏହାରି ଭିତରେ ଆଇପିଏଲ୍ କେବଳ ଭାରତ ନୁହେଁ, ବିଶ୍ବର ବିଭିନ୍ନ ଦେଶର କ୍ରିକେଟ ଦଳକୁ ଅନେକ ବଡ଼ ବଡ଼ ତାରକା ଭେଟି ଦେଇଛି । ତେବେ ଆଇପିଏଲ୍ ଇତିହାସ କଥା କହିବାକୁ ଗଲେ ଦୁଇଟି ଦଳକୁ ଆଇପିଏଲ୍ର ସଫଳତମ ଦଳ ଭାବେ ବିବେଚନା କରାଯାଏ । ଗୋଟିଏ ହେଉଛି ରୋହିତ ଶର୍ମାଙ୍କ ମୁମ୍ବାଇ ଇଣ୍ଡିଆନ୍ସ ଓ ଅନ୍ୟଟି ମହେନ୍ଦ୍ର ସିଂହ ଧୋନୀଙ୍କ ଚେନ୍ନାଇ ସୁପର କିଙ୍ଗସ୍ । ମୁମ୍ବାଇ ରୋହିତଙ୍କ ନେତୃତ୍ବରେ ଓ ଚେନ୍ନାଇ ଧୋନୀଙ୍କ ନେତୃତ୍ବରେ 5 ଥର ଲେଖାଏଁ ଆଇପିଏଲ୍ ଟାଇଟଲ ଜିତିଛନ୍ତି । ତେଣୁ ଧୋନୀ ଓ ରୋହିତଙ୍କୁ ମଧ୍ୟ ଆଇପିଏଲ୍ ଇତିହାସରେ ସବୁଠାରୁ ସଫଳ ଅଧିନାୟକ ଭାବେ ବିବେଚନା କରାଯାଏ ।
ଅନ୍କ୍ୟାପଡ୍ ପ୍ଲେୟାର ଭାବେ ଖେଳିବେ ଧୋନୀ :-
43 ବର୍ଷୀୟ ଧୋନୀ 2025 ଆଇପିଏଲ୍ ଖେଳିବେ କି ନାହିଁ, ତାହା ସ୍ପଷ୍ଟ ହୋଇନାହିଁ । ହେଲେ ତାଙ୍କୁ ଜଣେ ଅନ୍କ୍ୟାପଡ୍ ପ୍ଲେୟାର ଭାବେ ଚେନ୍ନାଇ ସୁପର କିଙ୍ଗସ୍ ଆଗାମୀ ସଂସ୍କରଣ ପାଇଁ ରିଟେନ କରିବ ବୋଲି ଆଲୋଚନା ହେଉଛି । ସାଧାରଣତଃ ଯେଉଁ ଖେଳାଳି ଅନ୍ତର୍ଜାତୀୟ କ୍ରିକେଟ୍ରେ ଡେବ୍ୟୁ କରନ୍ତି, ଦଳ ପକ୍ଷରୁ ସେମାନଙ୍କୁ ଟିମ୍ର ବରିଷ୍ଠ ଖେଳାଳିମାନେ ଏକ ଡେବ୍ୟୁ କ୍ୟାପ୍ ପ୍ରଦାନ କରିଥାନ୍ତି । ଏହାପରେ ସେମାନଙ୍କୁ ଜାତୀୟ ଦଳର କ୍ୟାପ୍ଡ୍ ବା ସଂରକ୍ଷିତ ଖେଳାଳି ଭାବେ ବିବେଚନା କରାଯାଏ । ଏହା ପୂର୍ବରୁ ସେମାନଙ୍କୁ ଅନ୍କ୍ୟାପଡ୍ ବା ଅଣସଂରକ୍ଷିତ ଖେଳାଳି ଭାବେ ଅକ୍ସନରେ ସ୍ଥାନ ଦିଆଯାଏ । ହେଲେ 2008ରୁ 2021 ପର୍ଯନ୍ତ ଆଇପିଏଲ୍ରେ ଏକ ନିୟମ ଥିଲା, ଯେଉଁଥିରେ 5 ବର୍ଷରୁ ଅଧିକ ସମୟ ଧରି ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିବା ଖେଳାଳିଙ୍କୁ ଅଣସଂରକ୍ଷିତ ବା ଅନ୍କ୍ୟାପଡ୍ ଖେଳାଳି ଭାବେ ଅକ୍ସନରେ ସାମିଲ କରାଯାଉଥିଲା । ଏହି ନିୟମ ପୁଣିଥରେ ଆଇପିଏଲ୍କୁ ଫେରାଇ ଆଣିବା ପାଇଁ ବିସିସିଆଇକୁ ଚେନ୍ନାଇ ସୁପର କିଙ୍ଗସ୍ ଅନୁରୋଧ କରିଥିବା ରିପୋର୍ଟ ପ୍ରକାଶ ପାଇଛି । ଯଦି ଏହାକୁ ବିଶ୍ବାସ କରାଯାଏ, ତେବେ ଧୋନୀ ଶେଷ ଥର ପାଇଁ 2019ରେ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ । ଅର୍ଥାତ ଆଗାମୀ ଆଇପିଏଲ୍ ସଂସ୍କରଣରେ ସିଏସ୍କେ ଧୋନୀଙ୍କୁ ଅନ୍କ୍ୟାପଡ୍ ପ୍ଲେୟର ଭାବରେ ରିଟେନ କରିବାକୁ ଚାହୁଁଛି । ଯାହା ପ୍ରଶଂସକଙ୍କ ମନରେ ଉତ୍ସାହ ଭରି ଦେଇଛି ।
Our Greatest of All Time! 🦁💛#WhistlePodu #ThalaThalaDhan pic.twitter.com/KmxtKgsKip
— Chennai Super Kings (@ChennaiIPL) August 18, 2024
ସ୍ପେଶାଲ ଭିଡିଓ ସେୟାର କଲା CSK :-
ଗତ ରବିବାର (18 ଅଗଷ୍ଟ) ଚେନ୍ନାଇ ସୁପର କିଙ୍ଗସ୍ ମାହିଙ୍କର ଏକ ଭିଡିଓ ସେୟାର କରିଛି । ଏହି ଭିଡିଓର କ୍ୟାପସନ୍ରପେ ଲେଖାଅଛି, 'ଆୱାର ଗ୍ରେଟେଷ୍ଟ ଅଫ୍ ଅଲ ଟାଇମ' । ଏହି ଭିଡିଓରେ ଧୋନୀଙ୍କୁ ଅଲଗା ଅଲଗା ରୂପରେ ଦେଖିବାକୁ ମିଳୁଛି । ସୋସିଆଲ ମିଡିଆରେ ୟୁଜର୍ସ ମଧ୍ୟ ଏଥିରେ ବହୁ ମଜାଦାର କମେଣ୍ଟ କରିବାରେ ଲାଗିଛନ୍ତି । 5 ଥର ଆଇପିଏଲ୍ ଟ୍ରଫି ହାସଲ କରିଥିବା ଚେନ୍ନାଇ ସୁପର କିଙ୍ଗସ୍ ଧୋନୀଙ୍କୁ ପୁଣି ଏକ ସିଜିନ ଖେଳାଇବା ପାଇଁ କେତେ ଆଗ୍ରହୀ, ତାହା ଏହି ଭିଡିଓରୁ ସ୍ପଷ୍ଟ ବାରି ହେଉଛି । ଏହା ଧୋନୀଙ୍କ ପ୍ରଶଂସକଙ୍କୁ ମଧ୍ୟ ବେଶ ସକାରାତ୍ମକ ଅନୁଭବ ଆଣି ଦେଇଛି ।
ଅବସର ସଂକେତ ଦେଇଛନ୍ତି ଧୋନୀ :-
କ୍ୟାପ୍ଟେନ କୁଲ ଅଗଷ୍ଟ 15, 2020ରେ ଅନ୍ତର୍ଜାତୀୟ କ୍ରିକେଟକୁ ଅଲବିଦା କହିଥିଲେ । ସେ ଇଂଲଣ୍ଡରେ ଅନୁଷ୍ଠିତ 2019 ବିଶ୍ବକପ୍ ସେମିଫାଇନାଲରେ ନ୍ୟୁଜିଲାଣ୍ଡ ବିପକ୍ଷ ମ୍ୟାଚ୍ରେ ନିଜର ଶେଷ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ । ଯଦିଓ ଏହାପରେ ମଧ୍ୟ ସେ ଆଇପିଏଲ୍ ମ୍ୟାଚ୍ ଖେଳିବା ଜାରି ରଖିଛନ୍ତି, ହେଲେ ଗତ ସଂସ୍କରଣରେ ସେ ନେତୃତ୍ବରୁ ଅବ୍ୟାହତି ନେଇଥିଲେ । ଧୋନୀଙ୍କ ସ୍ଥାନରେ ଯୁବ ଓପନର ଋତୁରାଜ ଗାଏକୱାଡ ଦଳର ନେତୃତ୍ବ ନେଇଥିଲେ । ଧୋନୀ ଅଧିନାୟକ ପଦରୁ ବାହାରି ଯୁବ ଖେଳାଳିଙ୍କୁ ସୁଯୋଗ ଦେବା ତାଙ୍କ ଅବସର ନେବାର ଏକ ସଂକେତ ହୋଇପାରେ ବୋଲି କୁହାଯାଉଛି । ହେଲେ ଧୋନୀଙ୍କ ପକ୍ଷରୁ ଏନେଇ କିଛି ସ୍ପଷ୍ଟ କରାଯାଇନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
