ହାଇଦ୍ରାବାଦ: ଭାରତ ଏବଂ ଶ୍ରୀଲଙ୍କା ମଧ୍ୟରେ 3 ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଆରମ୍ଭ ହୋଇଯାଇଛି । ଏହି ସିରିଜର ପ୍ରଥମ ମ୍ୟାଚ୍ 2 ଅଗଷ୍ଟ ଶୁକ୍ରବାର ଦିନ କଲମ୍ବୋରେ ଖେଳାଯାଇଥିଲା । ଅତ୍ୟନ୍ତ ରୋମାଞ୍ଚକର ମ୍ୟାଚ୍ର ଫଳାଫଳ କିନ୍ତୁ ଆସିପାରିନଥିଲା । ଉଭୟ ଦଳ 230 ରନ ଲେଖାଏଁ କରିବାରୁ ମ୍ୟାଚ୍ ଡ୍ର' ରହିଥିଲା । ଅର୍ଥାତ ସିରିଜ ଜିତିବା ପାଇଁ ଅବଶିଷ୍ଟ ଦୁଇଟି ଯାକ ମ୍ୟାଚ୍ ଜିତିବାକୁ ଚେଷ୍ଟା କରିବେ ଉଭୟ ଦଳ । ହେଲେ ଆପଣ ଜାଣନ୍ତି କି, ଶ୍ରୀଲଙ୍କା ଶେଷ ଥର ଭାରତ ବିପକ୍ଷରେ କେବେ ଦ୍ବିପାକ୍ଷିକ ଦିନିକିଆ ସିରିଜ ଜିତିଥିଲା ? ଶ୍ରୀଲଙ୍କା ଶେଷଥର ତିନି ଦଶନ୍ଧି ପୂର୍ବରୁ ଭାରତ ବିପକ୍ଷରେ ଏକ ଦ୍ବିପାକ୍ଷିକ ଦିନିକିଆ ସିରିଜ୍ ଜିତିଥିଲା । କୌତୁହଳର ବିଷୟ ହେଉଛି, ଭାରତୀୟ ଦଳର ବର୍ତ୍ତମାନର ଉପ-ଅଧିନାୟକ ଶୁବମନ ଗିଲ ସେତେବେଳେ ଜନ୍ମ ମଧ୍ୟ ହୋଇନଥିଲେ । ଅଧିନାୟକ ରୋହିତ ଶର୍ମା ଏବଂ ବିରାଟ ସେତେବେଳେ ସ୍କୁଲ ଯାଉଥିଲେ ।
27 ବର୍ଷ ପୂର୍ବରୁ ଶ୍ରୀଲଙ୍କା ଜିତିଥିଲା ସିରିଜ :-
ଭାରତ ବିପକ୍ଷରେ ଶ୍ରୀଲଙ୍କାର ଶେଷ ଦିନିକିଆ ସିରିଜ୍ ବିଜୟ ପ୍ରାୟ 27 ବର୍ଷ ପୂର୍ବେ, ଅର୍ଥାତ୍ 1997 ମସିହାରେ ହୋଇଥିଲା । ସେବେଠାରୁ ଶ୍ରୀଲଙ୍କା ଦଳ ଗୋଟିଏ ମଧ୍ୟ ଦିନିକିଆ ସିରିଜରେ ଭାରତକୁ ପରାସ୍ତ କରିପାରି ନାହିଁ । 1997ରେ ଭାରତ ଏବଂ ଶ୍ରୀଲଙ୍କା ମଧ୍ୟରେ 3 ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଖେଳାଯାଇଥିଲା । ଏହି ସିରିଜରେ ଶ୍ରୀଲଙ୍କା ଭାରତକୁ ପରାସ୍ତ କରିଥିଲା । ସେହି ସିରିଜ୍ ପରେ ଏବେ ପର୍ଯ୍ୟନ୍ତ ଭାରତ ଏବଂ ଶ୍ରୀଲଙ୍କା ମଧ୍ୟରେ ମୋଟ 10ଟି ODI ସିରିଜ୍ ଖେଳାଯାଇଛି, କିନ୍ତୁ ଶ୍ରୀଲଙ୍କା ଦଳ ଗୋଟିଏ ବି ସିରିଜ୍ ଜିତିବାରେ ସଫଳ ହୋଇନାହିଁ ।
ସ୍କୁଲ ଯାଉଥିଲେ ରୋହିତ-ବିରାଟ :-
ଶେଷଥର ଶ୍ରୀଲଙ୍କା ଯେତେବେଳେ ଭାରତ ବିପକ୍ଷ ODI ସିରିଜ ଜିତିଥିଲା, 100 ଶତକ ଲଗାଇଥିବା 'ଗଡ୍ ଅଫ୍ କ୍ରିକେଟ୍' ସଚିନ୍ ତେନ୍ଦୁଲକର ସେତେବେଳେ ମାତ୍ର 25 ଶତକ ହାସଲ କରିଥିଲେ । ସେତେବେଳେ ସୌରଭ ଗାଙ୍ଗୁଲି ଅଧିନାୟକ ଭାବରେ ଡେବ୍ୟୁ ମଧ୍ୟ କରିନଥିଲେ । ସବୁଠାରୁ ବଡ଼ କଥା ହେଉଛି, ରୋହିତ ଶର୍ମା ଏବଂ ବିରାଟ କୋହଲି ସେତେବେଳେ ବିଦ୍ୟାଳୟକୁ ପଢ଼ିବାକୁ ଯାଉଥିଲେ । ଏବଂ ବର୍ତ୍ତମାନର ଉପ-ଅଧିନାୟକ ଶୁବମନ ଗିଲ ସେତେବେଳେ ଜନ୍ମ ମଧ୍ୟ ହୋଇନଥିଲେ ।
ପରାଜୟ ଧାରା ଭାଙ୍ଗିବା ଲକ୍ଷ୍ୟରେ ଶ୍ରୀଲଙ୍କା :-
ଚଳିତ ଦିନିକିଆ ସିରିଜ୍ ଜିତି ତିନି ଦଶନ୍ଧି ପୂରୁଣା ପରାଜୟ ଧାରା ଭାଙ୍ଗିବାକୁ ଚେଷ୍ଟା କରିବ ଶ୍ରୀଲଙ୍କା । 3 ମ୍ୟାଚ୍ ବିଶିଷ୍ଟ ଦିନିକିଆ ସିରିଜରୁ ପ୍ରଥମଟି ଡ୍ର' ହୋଇଥିବାରୁ ଏବେ ସିରିଜ ଜିତିବାକୁ ହେଲେ ଯେକୌଣସି ଦଳକୁ ଅବଶିଷ୍ଟ 2ଟି ଯାକ ମ୍ୟାଚ୍ ଜିତିବାକୁ ପଡ଼ିବ । ତେଣୁ ଉଭୟ ଭାରତ ଓ ଶ୍ରୀଲଙ୍କା କ୍ରିକେଟ ଦଳ ଅବଶିଷ୍ଟ ମ୍ୟାଚ୍ ଜିତି ସିରିଜ ଜିତିବା ଲକ୍ଷ୍ୟରେ ରହିବେ । ODI ସିରିଜର ପ୍ରଥମ ମ୍ୟାଚ୍ ଡ୍ର ହେବାପରେ ଦ୍ବିତୀୟ ମ୍ୟାଚ୍ ରବିବାର 4 ଅଗଷ୍ଟରେ ଏବଂ ତୃତୀୟ ତଥା ଶେଷ ମ୍ୟାଚ୍ 7 ଅଗଷ୍ଟରେ ଖେଳାଯିବ । ଏଭଳି ପରିସ୍ଥିତିରେ ଶ୍ରୀଲଙ୍କା ଉଭୟ ଅବଶିଷ୍ଟ ମ୍ୟାଚ୍ ଜିତି ଭାରତ ବିପକ୍ଷରେ 27 ବର୍ଷ ପରେ ଦ୍ବିପାକ୍ଷିକ ସିରିଜ୍ ଜିତିବ, ନା ଭାରତୀୟ ଦଳ ଏହାର ବିଜୟଧାରା ବଜାୟ ରଖିବ, ତାହା ଦେଖିବାକୁ ବାକି ରହିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
