ନୂଆଦିଲ୍ଲୀ : ପ୍ୟାରିସ ଅଲିମ୍ପିକ୍ସ 2024 ଶେଷ ହେବାର କିଛି ଦିନ ବିଶ୍ରାମ ପରେ ଭାରତୀୟ ହକି ଦଳ ଖୁବଶୀଘ୍ର ପୁଣି ମୈଦାନକୁ ଫେରିବାକୁ ଯାଉଛି । ସେପ୍ଟେମ୍ବର 8ରୁ 17 ପର୍ଯ୍ୟନ୍ତ ଚୀନ୍ର ହୁଲୁନବୁଇରରେ ଅନୁଷ୍ଠିତ ହେବାକୁ ଥିବା ଏସୀୟ ଚାମ୍ପିୟନ୍ସ ଟ୍ରଫି ପାଇଁ ହକି ଇଣ୍ଡିଆ 18 ଜଣିଆ ଦଳ ଘୋଷଣା କରିଛି । ପ୍ୟାରିସ ଅଲିମ୍ପିକ୍ସ 2024ରେ ଭାରତକୁ ବ୍ରୋଞ୍ଜ ପଦକ ଜିତାଇଥିବା ଭାରତୀୟ ହକି ଦଳର କମାଣ ଏସୀୟ ଚାମ୍ପିୟନ୍ସ ଟ୍ରଫିରେ ମଧ୍ୟ ଭେଟେରାନ୍ ଡ୍ରାଗ୍ ଫ୍ଲିକର ହରମାନପ୍ରୀତ ସିଂହଙ୍କ ହାତରେ ରହିବ । ଏଥି ସହିତ ଅଭିଜ୍ଞ ମିଡଫିଲ୍ଡର ବିବେକ ସାଗର ପ୍ରସାଦ ଉପ-ଅଧିନାୟକ ଭାବରେ ଦଳରେ ଖେଳିବେ ।
Indian Men's team in BACK in action!
— Hockey India (@TheHockeyIndia) August 28, 2024
After a bronze medal winning performance at the Paris Olympics, 2️⃣0️⃣2️⃣4️⃣
Our Men's team is geared up to take their next challenge
Men’s Asian Champions Trophy 2024 starts from 8th, September 2024. Hulunbuir City, Inner Mongolia, China.
You… pic.twitter.com/NTAOx3qGYR
କାହାକୁ ସୁଯୋଗ, କାହାକୁ ବିଶ୍ରାମ ? :-
ଏହି ଟୁର୍ଣ୍ଣାମେଣ୍ଟରେ ଏସିଆର 7ଟି ଦେଶ ସାମିଲ ହେବେ, ଯେଉଁଥିରେ ଟପ୍ ଲେବୁଲ ହକି ଖେଳୁଥିବା ଦେଶ କୋରିଆ, ମାଲେସିଆ, ପାକିସ୍ତାନ, ଜାପାନ ଏବଂ ଆୟୋଜକ ଚୀନ୍ ସହିତ ପ୍ରତିଦ୍ବନ୍ଦ୍ବିତା କରିବ ଭାରତ । ପିଆର୍ ଶ୍ରୀଜେଶଙ୍କ ଅବସର ପରେ ତାଙ୍କ ସ୍ଥାନରେ ଗୋଲକିପର ଭାବେ ଦଳରେ କୃଷ୍ଣ ବାହାଦୂର ପଠକ ଏବଂ ସୁରଜ କରକେରାଙ୍କୁ ଦଳରେ ସୁଯୋଗ ମିଳିଛି । ଅନ୍ୟପଟେ ଓଡ଼ିଆ ହକି ଷ୍ଟାର ଅମିତ ରୋହିଦାସ, ଜରମାନପ୍ରୀତ ସିଂହ, ଅଧିନାୟକ ହରମାନପ୍ରୀତ ସିଂହ, ଯୁଗରାଜ ସିଂହ, ସଞ୍ଜୟ ଏବଂ ସୁମିତ ଡିଫେନ୍ସରେ ଖେଳିବେ । ରାଜ କୁମାର ପାଲ, ନୀଲକାନ୍ତ ଶର୍ମା, ମନପ୍ରୀତ ସିଂହ ଏବଂ ମହମ୍ମଦ ରାହିଲ ମିଡ୍ଫିଲ୍ଡର ଅଂଶ ହେବେ । ଅଭିଷେକ, ସୁଖଜିତ ସିଂହ, ଅରିଜିତ ସିଂହ ହୁନ୍ଦଲ, ଉତ୍ତମ ସିଂହ ଏବଂ ଡେବ୍ୟୁଟାଣ୍ଟ ଗୁରୁଜୋତ ସିଂହଙ୍କ ଭଳି ଯୁବ ଫରୱାର୍ଡ ଲାଇନ ବିରୋଧୀ ଦଳର ଆଟାକ୍ରୁ ଗୋଲ ରକ୍ଷା କରିବାର ଦାୟିତ୍ବ ଗ୍ରହଣ କରିବ ।
ପ୍ୟାରିସ୍ ଅଲିମ୍ପିକ୍ସ 2024ରେ ବ୍ରୋଞ୍ଜ ପଦକ ଜିତିଥିବା ହକି ଦଳର 10 ଜଣ ଖେଳାଳି ଏସୀୟ ଚାମ୍ପିୟନ୍ସ ଟ୍ରଫି ପାଇଁ ଭାରତୀୟ ଦଳର ଅଂଶ ଅଟନ୍ତି । ଏହି ଟୁର୍ଣ୍ଣାମେଣ୍ଟ ପାଇଁ ହାର୍ଦ୍ଦିକ ସିଂହ, ମନଦୀପ ସିଂହ, ଲଳିତ ଉପାଧ୍ୟାୟ, ଶମଶେର ସିଂହ ଏବଂ ଗୁରୁଜନ୍ତ ସିଂହଙ୍କ ଭଳି ଖେଳାଳିଙ୍କୁ ବିଶ୍ରାମ ଦିଆଯାଇଛି ।
'ଆମ ପାଇଁ ଏକ ଗୁରୁତ୍ୱପୂର୍ଣ୍ଣ ଅଭିଯାନ' :-
ଦଳର ଘୋଷଣା ପରେ ଭାରତୀୟ ହକି ଦଳର ମୁଖ୍ୟ ପ୍ରଶିକ୍ଷକ କ୍ରେଗ ଫୁଲଟନ୍ କହିଛନ୍ତି, "ଏହା ଆମ ପାଇଁ ଏକ ଗୁରୁତ୍ୱପୂର୍ଣ୍ଣ ଅଭିଯାନ, ଯାହାଦ୍ବାରା ଆମେ ଆମର ରାଙ୍କିଂ ପଏଣ୍ଟ ବୃଦ୍ଧି କରିପାରିବା । ପ୍ୟାରିସ୍ ଅଲିମ୍ପିକ୍ସ 2024ରେ ଆମର ଭଲ ପ୍ରଦର୍ଶନ ପରେ ସମସ୍ତେ ଉତ୍ସବ ପାଳନ କରି ସାରି ଏବେ କ୍ୟାମ୍ପକୁ ଫେରିଛନ୍ତି । ଗତ କିଛି ସପ୍ତାହରେ ଦଳ ପାଇଁ ସମସ୍ତଙ୍କ ଭଲ ପାଇବା ଏବଂ ପ୍ରଶଂସା ପ୍ରକୃତରେ ଅବିଶ୍ୱସନୀୟ ଥିଲା । ଆମର ଭବିଷ୍ୟତ ଅଭିଯାନ ସମୟରେ ମଧ୍ୟ ଏଭଳି ସମର୍ଥନ ଜାରି ରହିବ ବୋଲି ଆମେ ଆଶା କରୁଛୁ ।"
ଏମିତି ରହିଛି ଭାରତର ସୂଚୀ :
ଭାରତୀୟ ଦଳ ଏହାର ଅଭିଯାନ ସେପ୍ଟେମ୍ବର 8ରେ ଚୀନ୍ ବିପକ୍ଷରେ ଆରମ୍ଭ କରିବ । ତା’ପରେ 9 ସେପ୍ଟେମ୍ବରରେ ଜାପାନ ବିପକ୍ଷରେ ମ୍ୟାଚ୍ ଖେଳିବ ହରମାନପ୍ରୀତ ବାହିନୀ । ଗୋଟିଏ ଦିନର ବିଶ୍ରାମ ପରେ ସେପ୍ଟେମ୍ବର 11ରେ ମାଲେସିଆ ଏବଂ ସେପ୍ଟେମ୍ବର 12ରେ କୋରିଆ ସହିତ ମୁହାଁମୁହିଁ ହେବ ଭାରତ । ଏହାପରେ ପୁଣି ଗୋଟିଏ ଦିନ ବିରତି ପରେ ସେପ୍ଟେମ୍ବର 14ରେ ପାକିସ୍ତାନକୁ ଭେଟିବ ଭାରତ । ସେମିଫାଇନାଲ ଏବଂ ଫାଇନାଲ ଯଥାକ୍ରମେ 16 ଏବଂ 17ରେ ଅନୁଷ୍ଠିତ ହେବ ।
ଭାରତୀୟ ପୁରୁଷ ହକି ଟିମ :-
ଗୋଲକିପର : କୃଷ୍ଣ ବାହାଦୂର ପାଠକ, ସୂରଜ କରକେରା
ଡିଫେଣ୍ଡର : ଜରମନପ୍ରୀତ ସିଂହ, ଅମିତ ରୋହିଦାସ, ହରମନପ୍ରୀତ ସିଂହ (ଅଧିନାୟକ), ଜୁଗରାଜ ସିଂହ, ସଞ୍ଜୟ, ସୁମିତ
ମିଡ୍ଫିଲ୍ଡର : ରାଜକୁମାର ପାଲ, ନୀଲକାନ୍ତ ଶର୍ମା, ବିବେକ ସାଗର ପ୍ରସାଦ (ଉପଅଧିନାୟକ), ମନପ୍ରୀତ ସିଂହ, ମହମ୍ମଦ ରାହିଲ ମୌସିନ
ଫରୱାଡ : ଅଭିଷେକ, ସୁଖଜିତ ସିଂହ, ଅରିଜିତ ସିଂହ ହୁନ୍ଦଲ, ଉତ୍ତମ ସିଂହ, ଗୁରଜୋତ ସିଂହ
ବ୍ୟୁରୋ ରିପୋର୍ଟ, ଇଟିଭି ଭାରତ
