ନୂଆଦିଲ୍ଲୀ: ପାଖେଇ ଆସୁଛି ସାଧାରଣ ନିର୍ବାଚନ ୨୦୨୪ । ତେବେ ବିଭିନ୍ନ ପ୍ରକାର ସର୍ଭେ ଓ ପୂର୍ବାନୁମାନ ଅନୁସାରେ ଏଥର ମଧ୍ୟ ବିଜେପି ନେତୃତ୍ବାଧୀନ ଏନଡିଏ ମେଣ୍ଟ ପୂର୍ଣ୍ଣ ବହୁମତରେ ସରକାର ଗଠନ କରିବ । ତେବେ ବିଜେପିର ପଲା ଭାରି ରହିଥିବାର ଦେଖି ବିରୋଧୀ ମେଣ୍ଟର ଅନେକ ନେତା ବିଜେପିରେ ଯୋଗଦାନ କରିଛନ୍ତି । ନିକଟରେ ଗ୍ରାଣ୍ଡ ଓଲ୍ଡ ପାର୍ଟି କଂଗ୍ରେସର ଅନେକ ଟାଣୁଆ ନେତା ମାନେ ବିଜେପିରେ ଯୋଗ ଦେଇଛନ୍ତି ଓ ବିଜେପି ମଧ୍ୟ ସେମାନଙ୍କୁ ଶାନଦାର ଢଙ୍ଗରେ ଦଳକୁ ସ୍ବାଗତ କରିଛି । ତେବେ ଏହି ଭଳି ବିଜେପିକୁ ଡିଆଁ ମାରିଥିବା ଦଳ ବଦଳୁ ନେତାଙ୍କ ସମ୍ପର୍କରେ ନିମ୍ନରେ ସୂଚନା ଦିଆଯାଇଛି ।
ମହାରାଷ୍ଟ୍ର - ନାରାୟଣ ରାଣେ: ନାରାୟଣ ରାଣେ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଅଟନ୍ତି । ସେ ଶିବସେନାର ସଦସ୍ୟ ଭାବରେ ନିଜର ରାଜନୈତିକ କ୍ୟାରିଅର୍ ଆରମ୍ଭ କରିଥିଲେ ଏବଂ 2005ରେ ବିଧାନସଭାରେ ବିରୋଧୀ ଦଳର ନେତା ଥିଲେ । ଏହା ପରେ ସେ ଭାରତୀୟ ଜାତୀୟ କଂଗ୍ରେସ (INC)ରେ ଯୋଗ ଦେଇଥିଲେ । ରାଣେ 2017 ରେ କଂଗ୍ରେସ ଛାଡି ମହାରାଷ୍ଟ୍ର ସ୍ବାଭିମାନ ପକ୍ଷ ନାମକ ନୂଆ ଦଳ ଆରମ୍ଭ କରିଥିଲେ । ସେ 2018 ମସିହାରେ ଭାରତୀୟ ଜନତା ପାର୍ଟି (ବିଜେପି)କୁ ସମର୍ଥନ ଘୋଷଣା କରିଥିଲେ । ଏପରିକି 15 ଅକ୍ଟୋବର 2019 ରେ ରାଣେ ବିଜେପିରେ ଯୋଗ ଦେଇଥିଲେ ଏବଂ ତାଙ୍କ ଦଳ ମହାରାଷ୍ଟ୍ର ସ୍ବାଭିମାନ ପକ୍ଷକୁ ମଧ୍ୟ ବିଜେପିରେ ମିଶ୍ରଣ କରିଥିଲେ ।
ଅଶୋକ ଚୌହାନ: କଂଗ୍ରେସ ଦଳର ଜଣେ ଭେଟେରାନ ନେତା ତଥା ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଭାବରେ ଜଣାଶୁଣା ଅଶୋକ ଚୌହାନ ଫେବୃଆରୀ 2024 ରେ ଭାରତୀୟ ଜନତା ପାର୍ଟି ସହ ହାତ ମିଳାଇଥିଲେ । ଭେଟେରାନ କଂଗ୍ରେସ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଏସ.ବି ଚୌହାନଙ୍କ ପୁଅ ହେଉଛନ୍ତି ଅଶୋକ ଚୌହାନ । ଅଶୋକ ଚୌହାନ ଡିସେମ୍ବର 2008 ରୁ ନଭେମ୍ବର 2010 ପର୍ଯ୍ୟନ୍ତ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଥିଲେ ।
ଆନ୍ଧ୍ରପ୍ରଦେଶ - କିରଣ କୁମାର ରେଡ୍ଡୀ: ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ କିରଣ କୁମାର ରେଡ୍ଡୀ ଏପ୍ରିଲ 2023 ରେ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ । ଏହାପୂର୍ବରୁ ସେ କଂଗ୍ରେସର ଜଣେ ଆଗଧାଡିର ନେତା ଭାବରେ ଜଣାଶୁଣା ଥିଲେ । ଅବିଭାଜିତ ଆନ୍ଧ୍ରପ୍ରଦେଶର ଶେଷ ମୁଖ୍ୟମନ୍ତ୍ରୀ ରେଡ୍ଡୀ ରାଜ୍ୟର ବିଭାଜନକୁ ଦୃଢ଼ ବିରୋଧ କରିଥିଲେ ଏବଂ ଆନ୍ଧ୍ରପ୍ରଦେଶକୁ ବିଭାଜନ କରିବା ଏବଂ ତେଲେଙ୍ଗାନା ପରି ନୂଆ ରାଜ୍ୟ ସୃଷ୍ଟି କରିବାକୁ ତତ୍କାଳୀନ ୟୁପିଏ ସରକାରଙ୍କ ନିଷ୍ପତ୍ତିକୁ ବିରୋଧ କରି 2014 ରେ କଂଗ୍ରେସରୁ ଇସ୍ତଫା ଦେଇଥିଲେ ।
ପଞ୍ଜାବ - କ୍ୟାପଟେନ ଅମରିନ୍ଦର ସିଂ: ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ଦ୍ବାରା କଂଗ୍ରେସ ପାର୍ଟିରେ ସାମିଲ ହୋଇଥିବା କ୍ୟାପଟେନ ଅମରିନ୍ଦର ସିଂ ପଞ୍ଜାବର ମୁଖ୍ୟମନ୍ତ୍ରୀ ଦାୟିତ୍ବ ତୁଲାଇଛନ୍ତି । 1980 ମସିହାରେ ସେ ପ୍ରଥମ ଥର ପାଇଁ କଂଗ୍ରେସ ପକ୍ଷରୁ ଲୋକସଭା ସଦସ୍ୟ ଭାବରେ ନିର୍ବାଚିତ ହୋଇଥିଲେ । ସେ 2002ରୁ 2007 ପର୍ଯ୍ୟନ୍ତ ପଞ୍ଜାବର ମୁଖ୍ୟମନ୍ତ୍ରୀ ମଧ୍ୟ ଥିଲେ । ଏହା ପରେ ସେ 2017 ରେ ପୁଣି ଥରେ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ । ଅମରିନ୍ଦର ସିଂ 2021 ମସିହାରେ ପଞ୍ଜାବ ଲୋକ କଂଗ୍ରେସ ଗଠନ କରିଥିଲେ ଏବଂ ବିଧାନସଭା ନିର୍ବାଚନରେ ସମସ୍ତ 117 ଟି ଆସନରୁ ପ୍ରତିଦ୍ବନ୍ଦିତା କରିଥିଲେ । ଏହା ପରେ ସେ 2022 ମସିହାରେ ପିଏଲସି ପାର୍ଟି ଗଠନ କରିଥିଲେ ଏବଂ ପରେ ଏହାକୁ ଭାରତୀୟ ଜନତା ପାର୍ଟିରେ ବିଲୀନ କରିଥିଲେ ।
କର୍ଣ୍ଣାଟକ - ଏସଏମ କୃଷ୍ଣା: କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ଏସଏମ କୃଷ୍ଣା ମାର୍ଚ୍ଚ 2017 ରେ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ । କର୍ଣ୍ଣାଟକରେ ସେ କଂଗ୍ରେସ ଦଳର ଜଣେ ଟାଣୁଆ ନେତା ଭାବରେ ଜଣାଶୁଣା । ସେ ଅକ୍ଟୋବର 1999 ରୁ ମେ 2004 ମଧ୍ୟରେ କର୍ଣ୍ଣାଟକର ମୁଖ୍ୟମନ୍ତ୍ରୀ ଥିଲେ । କିନ୍ତୁ ବର୍ତ୍ତମାନ ସେ ବିଜେପିରେ ଆଉ ସକ୍ରିୟ ନାହାଁନ୍ତି ।
ଗୋଆ - ଦିଗମ୍ବର କାମତ: ଗୋଆର ପୂର୍ବତନ ମୁଖ୍ୟମନ୍ତ୍ରୀ ଦିଗମ୍ବର କାମତ କଂଗ୍ରେସ ପାର୍ଟିରୁ ନିଜର ରାଜନୈତିକ କ୍ୟାରିୟର ଆରମ୍ଭ କରିଥିଲେ । କିନ୍ତୁ 1994 ମସିହାରେ ସେ ପ୍ରଥମ ଥର ପାଇଁ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ । 2005 ରେ, ସେ ପୁଣିଥରେ କଂଗ୍ରେସ ପାର୍ଟିରେ ଯୋଗ ଦେଇଥିଲେ । କିନ୍ତୁ 2012 ମସିହାରେ ସେ ବିଜେପିର ବହୁମତ ସରକାରଙ୍କୁ ସମର୍ଥନ ଜଣାଇଥିଲେ ।
ଉତ୍ତରାଖଣ୍ଡ -ବିଜୟ ବହୁଗୁଣା: ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ବିଜୟ ବହୁଗୁଣା କଂଗ୍ରେସ ଦଳର ଜଣେ ଭେଟେରାନ୍ ନେତା ଥିଲେ, କିନ୍ତୁ ମେ 2016 ରେ ସେ ରାଜ୍ୟର ଆଠଜଣ ପୂର୍ବତନ ବିଧାୟକଙ୍କ ସହ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ । ସେ ମଧ୍ୟ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଥିଲେ ।
ନାରାୟଣ ଦତ୍ତ ତିୱାରୀ: କଂଗ୍ରେସ ଦଳର ରାଷ୍ଟ୍ରୀୟସ୍ତରର ନେତା ଥିଲେ ନାରାୟଣ ଦତ୍ତ ତିୱାରୀ । ସେ ଥରେ ଉତ୍ତରପ୍ରଦେଶର ତିନିଥର ଏବଂ ଥରେ ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ଥିଲେ । ସେ 1951 ମସିହାରେ ନିଜର ରାଜନୈତିକ କ୍ୟାରିଅର୍ ଆରମ୍ଭ କରିଥିଲେ ଏବଂ ପ୍ରଥମ ଥର ପାଇଁ ପ୍ରଜା ସମାଜବାଦୀ ଦଳର ପ୍ରାର୍ଥୀ ଭାବରେ ନିର୍ବାଚନରେ ଲଢିଥିଲେ । 1963 ମସିହାରେ ସେ କଂଗ୍ରେସ ପାର୍ଟିରେ ଯୋଗ ଦେଇଥିଲେ । 2017 ମସିହାରେ ନାରାୟଣ ଦତ୍ତ ତିୱାରୀ ତାଙ୍କ ପୁଅ ରୋହିତ ଶେଖର ଏବଂ ପତ୍ନୀ ଉଜ୍ବଳାଙ୍କ ସହ ବିଜେପିରେ ଯୋଗ ଦେଇଥିଲେ । ତେବେ ପରେ ତାଙ୍କର ମୃତ୍ୟୁ ହୋଇଥିଲା ।
ଉତ୍ତରପ୍ରଦେଶ - ଜଗଦମ୍ବିକା ପାଲ: ଜଗଦମ୍ବିକା ପାଲ 15 ତମ ଲୋକସଭା ନିର୍ବାଚନରେ କଂଗ୍ରେସ ପ୍ରାର୍ଥୀ ଭାବରେ ପ୍ରତିଦ୍ବନ୍ଦିତା କରିଥିଲେ, କିନ୍ତୁ 2014 ରେ ସେ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ । 1998 ରେ, ଯେତେବେଳେ ଉତ୍ତରପ୍ରଦେଶର ତତ୍କାଳୀନ ରାଜ୍ୟପାଳ କଲ୍ୟାଣ ସିଂଙ୍କ ସରକାରକୁ ବରଖାସ୍ତ କରିଥିଲେ, ଜଗଦମ୍ବିକା ପାଲ ତିନି ଦିନ ପାଇଁ ରାଜ୍ୟର ମୁଖ୍ୟମନ୍ତ୍ରୀ ହୋଇଥିଲେ ।
ଅରୁଣାଚଳ ପ୍ରଦେଶ - ପେମା ଖାଣ୍ଡୁ: ପେମା ଖାଣ୍ଡୁ ପିପୁଲ୍ସ ପାର୍ଟି ଅଫ୍ ଅରୁଣାଚଳ (ପିପିଏ) ର 32 ଜଣ ବିଧାୟକଙ୍କ ସହ ଡିସେମ୍ବର 2016 ରେ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ । ପେମା ଖାଣ୍ଡୁଙ୍କ ସରକାର ଅରୁଣାଚଳ ପ୍ରଦେଶରେ ଜୁଲାଇ 2016 ଠାରୁ କ୍ଷମତାରେ ଅଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
