ଭୁବନେଶ୍ବର: ଆଉ ନିର୍ବାଚନ ଲଢ଼ିବେ ନାହିଁ ଜୁଏଲ । ପ୍ରତ୍ୟକ୍ଷ ରାଜନୀତିରୁ ଓହରିବେ ସେ । ଏନେଇ ସୂଚନା ଦେଇଛନ୍ତି କେନ୍ଦ୍ର ଆଦିବାସୀ କଲ୍ୟାଣ ମନ୍ତ୍ରୀ ଜୁଏଲ ଓରାମ । ଜୁଏଲ ଓରାମ ଜଣେ ବିଜେପିର ବରିଷ୍ଠ ନେତା ତଥା କେନ୍ଦ୍ର ଆଦିବାସୀ କଲ୍ୟାଣ ମନ୍ତ୍ରୀ । ଖାଲି ଓଡିଶା ନୁହେଁ ସମଗ୍ର ଭାରତରେ ଆଦିବାସୀ ସମ୍ପ୍ରଦାୟର ଜଣେ ପ୍ରମୁଖ ନେତା ଭାବେ ସୁପରିଚିତ । ଦୀର୍ଘ 3 ଦଶନ୍ଧି ଧରି ଓଡ଼ିଶା ରାଜନିତୀରେ ସକ୍ରିୟ ଥିବା ଏହି ହେଭିୱେଟ୍ ନେତା ଜଣଙ୍କ ଆଉ ନିର୍ବାଚନ ଲଢ଼ିବେ ନାହିଁ ବୋଲି କହିଛନ୍ତି ।
'ମୁଁ ନିର୍ବାଚନ ଲଢ଼ିବେ ନାହିଁ':
ଆଜି ଭୁବନେଶ୍ୱରରେ ଓଡିଶା ଅନୁସୂଚିତ ଜାତି ଓ ଅନୁସୂଚିତ ଜନଜାତି କର୍ମଚାରୀ କଲ୍ୟାଣ ସମନ୍ୱୟ ପରିଷଦର ସମ୍ବର୍ଦ୍ଧନା ସମାରୋହରେ ଯୋଗଦେଇ ଜୁଏଲ ଓରାମ କହିଛନ୍ତି," ଆଗରୁ କହିଥିଲି ,ଆଉ ଆଜି ବି କହୁଛି ସିଧାସଳଖ ଆଉ ନିର୍ବାଚନ ଲଢ଼ିବି ନାହିଁ । ସନ୍ୟାସ ନେବି ନାହିଁ, ରାଜନୀତିରେ ରହିବି ହେଲେ ସକ୍ରିୟ ରାଜନୀତିରେ ରହିବି ନାହିଁ ।"
ଜୁଏଲଙ୍କ ରାଜନୈତିକ କ୍ୟାରିୟର:
1989ରେ ଜୁଏଲ ଓରାମ ଭାରତୀୟ ଜନତା ପାର୍ଟିରେ ଯୋଗଦେଇଥିଲେ । ସେ ବଣାଇ ନିର୍ବାଚନ ବିଧାନସଭା ନିର୍ବାଚନ ମଣ୍ଡଳୀରୁ ଦୁଇ ଥର ନିର୍ବାଚିତ ହୋଇଥିଲେ । 1997ରେ ଜୁଏଲ ଭାରତୀୟ ଜନତା ପାର୍ଟିର ରାଜ୍ୟ ସଭାପତି ଭାବେ ନିଯୁକ୍ତ ହୋଇଥିଲେ । ପରେ 1998ରେ ସୁନ୍ଦରଗଡ଼ ଲୋକସଭା କ୍ଷେତ୍ରରୁ ଜୁଏଲ ନିର୍ବାଚିତ ହୋଇଥିଲେ । ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ମନ୍ତ୍ରୀମଣ୍ଡଳରେ ଆଦିବାସୀ କଲ୍ୟାଣ ମନ୍ତ୍ରୀ ଭାବେ ଦାୟିତ୍ୱରେ ଅଭିଷିକ୍ତ ହୋଇଥିଲେ ।
ସୁନ୍ଦରଗଡର ଟାଣୁଆ ନେତା ଜୁଏଲ:
ପୁନର୍ବାର 2004ରେ ଜୁଏଲ ଓରାମ ଓଡିଶା ରାଜ୍ୟ ବିଜେପିର ସଭାପତି ଭାବେ ନିଯୁକ୍ତ ହୋଇଥିଲେ । ପୁଣି 2004ରେ ସୁନ୍ଦରଗଡ଼ ସଂସଦୀୟ କ୍ଷେତ୍ରରୁ ନିର୍ବାଚିତ ହୋଇଥିଲେ । 2006 ରୁ 2009 ପର୍ଯ୍ୟନ୍ତ ଜୁଏଲ ବିଜେପିର ଜାତୀୟ ଉପସଭାପତି ଦାୟିତ୍ୱରେ ରହିଲେ । 2014 ଲୋକସଭା ନିର୍ବାଚନରେ ଜୁଏଲ ବିଜେଡି ପ୍ରତିପକ୍ଷ ଦିଲ୍ଲୀପ ତିର୍କୀଙ୍କୁ ହରାଇ ମୋଦିଙ୍କ ମନ୍ତ୍ରୀମଣ୍ଡଳରେ ଆଦିବାସୀ କଲ୍ୟାଣ ମନ୍ତ୍ରୀ ଭାବେ ଦାୟିତ୍ୱ ନେଲେ । 2024ରେ ଜୁଏଲ ସୁନ୍ଦରଗଡ଼ ଲୋକସଭା କ୍ଷେତ୍ରରୁ ଜିତି ମୋଦିଙ୍କ ମନ୍ତ୍ରୀମଣ୍ଡଳରେ ଆଦିବାସୀ କଲ୍ୟାଣ ମନ୍ତ୍ରୀ ଭାବେ ସ୍ଥାନ ପାଇଛନ୍ତି ।
ଇଟିଭି ଭାରତ,ଭୁବନେଶ୍ବର
