ଭୁବନେଶ୍ବର: ଶପଥ ନେବା ପରେ କାର୍ଯ୍ୟ ଆରମ୍ଭ କରିଛନ୍ତି ମୋହନ ସରକାର । ଲୋକସେବା ଭବନ ନୁହେଁ ରାଜ୍ୟ ଅତିଥି ଭବନରୁ କାର୍ଯ୍ୟ କରୁଛି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ । ସେହିପରି ବିଭାଗୀୟ ମନ୍ତ୍ରୀମାନେ ନିଜ ନିଜ ବିଭାଗର ସମୀକ୍ଷା, ଆଲୋଚନା ଓ ନିର୍ଦ୍ଦେଶ ଦେଉଛନ୍ତି । ବିଜେପିର ବିଜୟ ଓ ରାଜ୍ୟରେ ସରକାର ଗଠନରୁ ଆଜି ପର୍ଯ୍ୟନ୍ତ ନିଆଯାଇଥିବା ଅନେକ ନିଷ୍ପତ୍ତିରେ ଦ୍ଵନ୍ଦ ସୃଷ୍ଟି ହୋଇଛି । ଯାହାକୁ ନେଇ ଲୋକେ ଆଶା ଆଶଙ୍କାରେ ଥିବା ଦେଖାଦେଇଛି ।
ବିଜେପିର ବିଜୟ ପରେ ରାଜ୍ୟ ସଭାପତି ମନମୋହନ ସାମଲ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାକୁ ନେଇ ମନ୍ତବ୍ୟ ରଖିଥିଲେ । ଯୋଜନା ବନ୍ଦ ହେବା ସହ ଆୟୁଷ୍ମାନ ଯୋଜନା ଲାଗୁ ନେଇ ଜୋର ଦେଇଥିଲେ । ଏ ନେଇ ଜନସାଧାରଣରେ ପ୍ରତିକ୍ରିୟା ପ୍ରକାଶ ପାଇବା ପରେ ୟୁ-ଟର୍ଣ୍ଣ ମାରିଥିଲେ ମନମୋହନ । ଗଣମାଧ୍ୟମକୁ ଦୋଷ ଦେଇ ନିଜକୁ ଖସେଇବାକୁ ଚେଷ୍ଟା କରିଥିଲେ ସେ । ରତ୍ନଭଣ୍ଡାର ସହ ଓଡିଶାର ଅସ୍ମିତା ଯୋଡି ଜୋରଦାର ପ୍ରଚାର କରିଥିଲା ବିଜେପି । ସରକାର ଆସିଲେ ରତ୍ନଭଣ୍ଡାର ଖୋଲିବ ବୋଲି ବିଜେପି କହିଥିଲା । ବିଜେପି ବିଜୟର ଏହା ଏକ ବଡ଼ କାରଣ ବୋଲି କୁହାଯାଉଛି । ଆସନ୍ତା ମାସରେ ରତ୍ନଭଣ୍ଡାର ଖୋଲିବା ନେଇ ପ୍ରତିକ୍ରିୟା ରଖିଥିଲେ ଏଏସଆଇ ଅଧିକାରୀ । ଏହାକୁ ନେଇ ଉତକ୍ଷିପ୍ତ ହୋଇଥିଲେ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ରତ୍ନଭଣ୍ଡାର ଖୋଲିବା ନେଇ ଅଧିକାରୀ ଦେଇଥିବା ମନ୍ତବ୍ୟକୁ ମନ୍ତ୍ରୀ ବଦଳେଇଥିଲେ । ଯାହାକୁ ନେଇ ରତ୍ନଭଣ୍ଡାର ଖୋଲିବା ନେଇ ପୁନର୍ବାର ଦ୍ଵନ୍ଦ ସୃଷ୍ଟି ହୋଇଛି ।
ବିଜେପିର ଘୋଷଣା ଅନୁସାରେ ଶ୍ରୀମନ୍ଦିରର 4 ଦ୍ୱାର ଖୋଲିଛି ସତ । କିନ୍ତୁ ବ୍ୟବସ୍ଥିତ ହୋଇପାରିନାହିଁ ଶୃଙ୍ଖଳିତ ଦର୍ଶନ । ଦଳା ଚକଟା ପରି ପରିସ୍ଥିତି ଏବେ ବି ବଳବତ୍ତର ରହିଛି । ସେହିପରି ଧାନର ସର୍ବନିମ୍ନ ସହାୟକ ମୂଲ୍ୟ 3100 ଟଙ୍କା କରାଯିବା ନେଇ ମୋହନ ସରକାର ପ୍ରଥମ କ୍ୟାବିନେଟ ବୈଠକରେ ଘୋଷଣା କରିଛନ୍ତି । କେନ୍ଦ୍ର କ୍ୟାବିନେଟ ଧାନର ସର୍ବନିମ୍ନ ସହାୟକ ମୂଲ୍ୟ 117 ବୃଦ୍ଧି କରିବା ପରେ ଏହା 2300 ଟଙ୍କା ହୋଇଛି । ଅନେକ ଲୋକେ ଏହାକୁ ରାଜ୍ୟ ସରକାରଙ୍କ ନିଷ୍ପତ୍ତି ବୋଲି ଗ୍ରହଣ କରିବାରେ ଲାଗିଛନ୍ତି । କେନ୍ଦ୍ର ସରକାରଙ୍କୁ ଆଳ କରି ରାଜ୍ୟ ସରକାର ଖସି ଯିବାକୁ ଚେଷ୍ଟା କରୁଥିବା ସୋସିଆଲ ମିଡ଼ିଆରେ ଚର୍ଚ୍ଚା ହେଉଛି । ଯାହାକୁ ନେଇ ସରକାର କିମ୍ବା ଦଳୀୟ ସ୍ତରରେ କୌଣସି ସ୍ପଷ୍ଟୀକରଣ ମିଳୁନି ।
ସେହିପରି ଗତକାଲି ବଡ଼ ଘୋଷଣା କରିଥିଲେ ମୋହନ ସରକାର । ପ୍ରତ୍ୟେକ ଦିନ 2 ଘଣ୍ଟା ଅଭିଯୋଗ ଶୁଣିବେ ମୁଖ୍ୟମନ୍ତ୍ରୀ । ପ୍ରତିଦିନ ଅପରାହ୍ନ 3ଟାରୁ 5ଟା ପର୍ଯ୍ୟନ୍ତ ମୁଖ୍ୟମନ୍ତ୍ରୀ ଲୋକଙ୍କ ଅଭିଯୋଗ ଶୁଣିବେ । ଲୋକଙ୍କ ସମସ୍ୟା ଶୁଣିବା ସହ ଅଭିଯୋଗ ପତ୍ର ଗ୍ରହଣ କରି ସମସ୍ୟା ସମାଧାନ ପାଇଁ ପଦକ୍ଷେପ ନେବେ । କଥା ପ୍ରଚାର ହେବାର କିଛି ସମୟ ମଧ୍ୟରେ ସରକାର ନିଷ୍ପତ୍ତି ବଦଳେଇଲେ । ଆଜି ନୁହେଁ ଅଭିଯୋଗ ଶୁଣାଣୀ ଲାଗି ବ୍ୟବସ୍ଥା ପରେ ସାନି ତାରିଖ ଘୋଷଣା ହେବ ବୋଲି କୁହାଗଲା । ମୁଖ୍ୟମନ୍ତ୍ରୀଙ୍କୁ ଅଭିଯୋଗ ଜଣାଇବାକୁ ପଳେଇ ଆସିଥିବା ଲୋକେ ସମସ୍ୟାରେ ପଡିଲେ ।
