ନୂଆଦିଲ୍ଲୀ: ଅଷ୍ଟାଦଶ ଲୋକସଭା ଅଧିବେଶନରେ ବିରୋଧୀଙ୍କ ସଂଖ୍ୟା ପୂର୍ବାପେକ୍ଷ ଅଧିକ ରହିବା ସହ ଚଳିତ ଅଧିବେଶନ ପ୍ରଥମରୁ ବିଭିନ୍ନ ପ୍ରସଙ୍ଗରେ ସରଗରମ ରହିଛି । ପ୍ରଥମେ କାମଚଳା ବାଚସ୍ପତି ଓ ପରେ ବାଚସ୍ପତି ନିର୍ବାଚନ ପ୍ରସଙ୍ଗକୁ ନେଇ ବିରୋଧୀ, ସରକାରଙ୍କ ଉପରେ ବର୍ଷି ସାରିଥିବା ବେଳେ ଏବେ ନିଟ୍ ପରୀକ୍ଷା ବିଭ୍ରାଟ ପ୍ରସଙ୍ଗ ଗୃହକୁ ସରଗରମ କରିବାରେ ଲାଗିଛି । ଆଜି ଏହି ପ୍ରସଙ୍ଗରେ ଏକାଧିକ ବିରୋଧୀ ସାଂସଦ ମୁଲତବୀ ପ୍ରସ୍ତାବ ନୋଟିସ୍ ଦେଇଥିଲେ । ହେଲେ ଏହାକୁ ବାଚସ୍ପତି ଓମ ବିର୍ଲା ଗ୍ରହଣ କରିନଥିଲେ । ଗୃହକାର୍ଯ୍ୟରେ ପ୍ରବଳ ହଟ୍ଟଗୋଳ ଦେଖିବାକୁ ମିଳିଥିଲା ।
#WATCH | Amid Opposition protest in Lok Sabha, Speaker Om Birla says, " outside the house, some mps level allegations that the speaker switches off the mic. the control of the mic is not in the hands of the one who sits on the chair." pic.twitter.com/hAjCZsNxJg
— ANI (@ANI) July 1, 2024
ଏହା ପରେ ଦ୍ବିତୀୟ ଘଟଣାକ୍ରମରେ ଗୃହ ବାହାରେ ସଂସଦ ପରିସରରେ ବିରୋଧୀମାନେ ଏକାଠି ହୋଇ ନାରାବାଜୀ କରିଥିଲେ । ମକର ଦ୍ବାର ନିକଟରେ କିଛି ସମୟ ଧାରଣାରେ ବସିଥିଲେ । ମିଳିତ ବିରୋଧୀଙ୍କ ସମସ୍ତ ସାଂସଦ ହାତରେ ପ୍ଲାକାର୍ଡ ଧରି ମୋଦି ସରକାରରେ କେନ୍ଦ୍ରୀୟ ସଂସ୍ଥାର ଅପବ୍ୟବହାର ହେଉଥିବା ଅଭିଯୋଗ କରି ନାରାବାଜୀ କରିଥିଲେ । ପ୍ରବର୍ତ୍ତନ ନିର୍ଦ୍ଦେଶାଳୟ ଓ ‘ସିବିଆଇ’ କେନ୍ଦ୍ରୀୟ ତଦନ୍ତକାରୀ ସଂସ୍ଥାକୁ ରାଜନୈତିକ ଉଦ୍ଦେଶ୍ୟରେ ବ୍ୟବହାର କରାଯାଉଥିବା ଅଭିଯୋଗ କରିଥିଲେ । ବିରୋଧୀମାନେ ‘ଭାଜପା କୋ ଯାଓ ଭ୍ରଷ୍ଟାଚାର କି ଲାଇସେନ୍ସ ପାଓ’ ବୋଲି ନାରା ଦେଉଥିବା ଦେଖିବାକୁ ମିଳିଥିଲା ।
ସେହିପରି ଗୃହରେ ଆଲୋଚନା ଚାଲିଥିବା ବେଳେ ବିରୋଧୀ ସଦସ୍ୟଙ୍କୁ କହିବା ପାଇଁ ପର୍ଯ୍ୟାପ୍ତ ସମୟ ଓ ସୁଯୋଗ ମିଳୁ ନଥିବା ନେଇ ମଧ୍ୟ ବିରୋଧୀମାନେ ପୂର୍ବ ଅଭିଯୋଗକୁ ଦୋହରାଇଥିଲେ । ମୁଲତବୀ ପ୍ରସ୍ତାବକୁ ଅସ୍ବୀକାର କରିବା ସହ ବାଚସ୍ପତି ଓମ ବିର୍ଲା ମଧ୍ୟ ବିରୋଧୀଙ୍କ ଏହି ଅଭିଯୋଗକୁ ଖଣ୍ଡନ କରିଥିଲେ । ବାଚସ୍ପତିଙ୍କ ପୋଡିୟମରେ ସମୟେ ସମୟେ ସବୁ ଦଳର ସଦସ୍ୟ ପୀଠାସୀନ ହୋଇ ଗୃହ କାର୍ଯ୍ୟ ପରିଚାଳନା କରନ୍ତି । ସେଠାରେ ମାଇକ ବନ୍ଦ କରିବା ପାଇଁ କୌଣସି ସିଷ୍ଟମ ଅଛି କି, ବୋଲି ବିର୍ଲା ବିରୋଧୀଙ୍କୁ ପ୍ରଶ୍ନ କରିଥିଲେ ।
ଚଳିତ ବିଧାନସଭାରେ ଶାସକ ମେଣ୍ଟର ସଂଖ୍ୟା ହ୍ରାସ ସାଙ୍ଗକୁ ବିରୋଧୀଙ୍କ ସଂଖ୍ୟା ଅନୁରୂପ ଭାବେ ବୃଦ୍ଧି ପାଇଛି । ମୁଖ୍ୟ ବିରୋଧୀ ଦଳ କଂଗ୍ରେସ ନିକଟରେ 100 ଆସନ ସହ ଏହାର ନେତୃତ୍ବାଧୀନ ବିରୋଧୀ ମେଣ୍ଟ ଇଣ୍ଡିଆ ନିକଟରେ 244 ଆସନ ରହିଛି । ସେହିପରି ସଂଖ୍ୟା ବହୁମତ 272 ରୁ ଭାଜପା 240 ଆସନ ସହ ପଛରେ ରହିଛି । ଏନଡିଏ ମେଣ୍ଟର ଅନ୍ୟ ସହଯୋଗୀ ଦଳଙ୍କ ସମର୍ଥନରେ ତୃତୀୟ ଥର ଭାରତୀୟ ଜନତା ପାର୍ଟି ସରକାର ଗଠନ କରିଛି । ଏପରି ସମୟରେ ବିରୋଧୀ ପୂର୍ବାପେକ୍ଷା ଅଧିକ ପ୍ରଭାବୀ ଓ ଆକ୍ରାମକ ଭୂମିକାରେ ନଜର ଆସିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
