ନିମାପଡା:ସବୁଠି ନିର୍ବାଚନ ତାତି । ଗୁରୁବାର ଦିନ ପୁରୀ ଜିଲ୍ଲା କାକଟପୁର ନିର୍ବାଚନ ମଣ୍ଡଳୀରେ ବିଜେପି ଶକ୍ତି ପ୍ରଦର୍ଶନ କରିଛି । ହଜାର ହଜାର କର୍ମୀଙ୍କ ସହ ବିଶାଳ ରୋଡ ସୋ କରି କାକଟପୁର ବିଜେପି ବିଧାୟକ ପ୍ରାର୍ଥୀ ବାଇଧର ମଲ୍ଲିକ ଓ ଜଗତସିଂହପୁର ସାଂସଦ ପ୍ରାର୍ଥୀ ବିଭୁ ପ୍ରସାଦ ତରାଇ ପ୍ରଚାର କରିଛନ୍ତି । ବିଜେପିକୁ ଭୋଟ ଦେଇ ମୋଦିଙ୍କ ହାତମୁଠାକୁ ଆହୁରୀ ଟାଣ କରିବା ପାଇଁ ଅପିଲ କରିଛନ୍ତି ପ୍ରାର୍ଥୀ ।
ଗୁରୁବାର କାକଟପୁରରେ ବିଜେପି ତାର ଶକ୍ତି ପ୍ରଦର୍ଶନ କରିଛି । କାକଟପୁର ବିଜେପି ବିଧାୟକ ପ୍ରାର୍ଥୀ ବାଇଧର ମଲ୍ଲିକ ପ୍ରଥମେ କାକଟପୁର ମାଆ ମଙ୍ଗଳାଙ୍କ ମନ୍ଦିର ଆସି ଆଶିଷ ଭିକ୍ଷା କରି ପ୍ରଚାର ଆରମ୍ଭ କରିଥିଲେ । ନୟାହାଟ ଆଳୁଦଣ୍ଡାପାଟଣା ସାଇ ମନ୍ଦିରରୁ ବାଇଧର ମଲ୍ଲିକ ନିଜର ହଜାର ହଜାର ସଂଖ୍ୟାର କର୍ମୀଙ୍କ ଏକ ବିଶାଳ ବାଇକ ଶୋଭାଯାତ୍ରାରେ ବାହାରିଥିଲେ । ଏହି ଶୋଭାଯାତ୍ରାରେ ଜଗତସିଂହପୁର ସାଂସଦ ପ୍ରାର୍ଥୀ ବିଭୁ ପ୍ରସାଦ ତରାଇ ମଧ୍ୟ ସାମିଲ ହୋଇଥିଲେ ।
ଏହି ଅବସରରେ ପ୍ରାର୍ଥୀମାନେ କାକଟପୁରରେ ଦୀର୍ଘ ଦିନ ଧରି ଲାଗିରହିଥିବା ବିଭିନ୍ନ ସମସ୍ୟା ପ୍ରସଙ୍ଗ ଉଠାଇବା ସହ ବିଜେପି ସରକାର ଆସିଲେ ଏହି ସମସ୍ୟାର ସମାଧାନ କରାଯିବା ନେଇ କହିଥିଲେ । ଆଉମଧ୍ୟ ବିଜେଡି ଓ କଂଗ୍ରେସ ଉପରେ ଜନତା ଆସ୍ଥା ହରାଇ ସାରିଥିବା ବେଳେ ଏବେ କେବଳ ବିଜେପି ଉପରେ ଭରସା କରୁଥିବା କଥା କହିଛନ୍ତି କାକଟପୁର ବିଧାୟକ ପ୍ରାର୍ଥୀ ।
ସାଂସଦ ପ୍ରାର୍ଥୀ ବିଭୁ ପ୍ରସାଦ ତରାଇ କହିଛନ୍ତି, "ସାଂସଦ ଥିବା ବେଳେ ଲୋକମାନଙ୍କର ବିଭିନ୍ନ ମୌଳିକ ସମସ୍ୟାକୁ ନେଇ ସଂସଦରେ ଉପସ୍ଥାପିତ କରିଥିଲି । ସାଗରମାଳା ପ୍ରୋଜେକ୍ଟ କାହିଁକି ବନ୍ଦ ରହିଛି । ମୋଦିଜୀ ଏହି ପ୍ରୋଜେକ୍ଟ କରିବାକୁ ଚାହୁଁଥିଲେ । କାକଟପୁର ଠାରୁ ପାରାଦ୍ୱୀପ ସମୁଦ୍ର କୂଳେ କୂଳେ ରାସ୍ତା ତିଆରି କରିବା ପାଇଁ ମୋଦିଜୀ ସମସ୍ତ ଅର୍ଥ ଦେବାକୁ ଚାହୁଁଥିଲେ । ହେଲେ ଓଡ଼ିଶା ସରକାରଙ୍କ ଉଦାସୀନ ତଥା ଉପେକ୍ଷା ମନୋଭାବ ପାଇଁ ସାଗରମାଳା ରାସ୍ତା ତିଆରି ହୋଇପାରିଲା ନାହିଁ । ପିଇବା ପାଣିର ଉତ୍କଟ ସମସ୍ୟା ଏବେଯାଏଁ ସମାଧାନ ହୋଇପାରିଲା ନାହିଁ ।"
ଅନ୍ୟପଟେ ବିଧାୟକ ପ୍ରାର୍ଥୀ ବାଇଧର ମଲ୍ଲିକ କହିଛନ୍ତି, " ଏଠି ପଇସା ନଦେଲେ କାମ ନହୁଏ । ଜନସାଧାରଣମାନେ ଅତିଷ୍ଟ ହେଲେଣି , ଦୀର୍ଘ ଦିନ ଧରି ଯେଉଁ ଶାସନ ଚାଲିଛି ତାକୁ ଜନତା ପରିବର୍ତ୍ତନ କରିବାକୁ ଚାହୁଁଛନ୍ତି । କଂଗ୍ରେସର ସ୍ଥିତି ମଧ୍ୟ ମଜଭୂତ ନାହିଁ । ଏକମାତ୍ର ବିକଳ୍ପ ଭାବେ ବିଜେପିକୁ ବାଛି ନେଇଛନ୍ତି ଲୋକେ ।"
ଇଟିଭି ଭାରତ, ନିମାପଡା
