କଟକ: ସରିଛି ନିର୍ବାଚନ, ପ୍ରକାଶ ପାଇଛି ଫଳାଫଳ । ଓଡ଼ିଶାରେ ଦେଖିବାକୁ ମିଳିଛି ଅପ୍ରତ୍ୟାଶିତ ଏବଂ ବଡ଼ ପରିବର୍ତ୍ତନ । ବିଭିନ୍ନ ଲୋକସଭା ଓ ବିଧାନସଭା ଆସନର ଫଳାଫଳ ଅନେକଙ୍କୁ ଆଶ୍ଚର୍ଯ୍ୟ କରିଛି । ଏହାରି ଭିତରେ ଚର୍ଚ୍ଚାରେ ରହିଛି କଟକ ବାରବାଟୀ ଆସନ । ଏଠାରୁ କଂଗ୍ରେସ ପ୍ରାର୍ଥୀ ତଥା ପୂର୍ବତନ ବିଧାୟକ ମହମ୍ମଦ ମୋକିମଙ୍କ ଝିଅ ସୋଫିଆ ଫିର୍ଦୋସ ବିଜୟୀ ହୋଇଛନ୍ତି । ୨୦୧୯ରେ ନିଜ ବାପାଙ୍କର ରହିଥିବା ବିଜୟ ବ୍ୟବଧାନଠାରୁ ମଧ୍ୟ ଅଧିକ ବ୍ୟବଧାନରେ ବିଜୟୀ ହୋଇଥିବା ସୋଫିଆଙ୍କର ଏହି ବିଜୟକୁ କଟକ-ବାରବାଟୀରେ ଐତିହାସିକ ବୋଲି କୁହାଯାଇପାରେ । ଜାଣନ୍ତୁ କାରଣ,
ବାରବାଟୀ ଜିତିଲେ ସୋଫିଆ: ସୋଫିଆ ଫିର୍ଦୋସ ଚଳିତ ଥର ପ୍ରଥମ ଥର ପାଇଁ ନିର୍ବାଚନ ଲଢ଼ି ୮୦୦୧ ଖଣ୍ଡ ଭୋଟରେ ନିଜର ନିକଟତମ ପ୍ରତିଦ୍ବନ୍ଦ୍ବୀ ଡାକ୍ତର ପୂର୍ଣ୍ଣଚନ୍ଦ୍ର ମହାପାତ୍ରଙ୍କଠାରୁ ବିଜୟୀ ହୋଇଛନ୍ତି । ରେଭେନ୍ସାରେ ବିଜ୍ଞାନରେ ଯୁକ୍ତ ଦୁଇ ପାସ କରିଥିଲେ ସୋଫିଆ । ୨୦୧୩ରେ କିଟ୍ ବିଶ୍ବବିଦ୍ୟାଳୟରୁ ବିଟେକ୍ରେ ସିଭିଲ୍ ଇଞ୍ଜିନିଅରିଂ ପାସ କରିଛନ୍ତି । ପରେ ୨୦୨୨ ମସିହାରେ ବାଙ୍ଗାଲୋରର IIMBରେ 'Executive General Management Programme' କୋର୍ସ କରିଛନ୍ତି । ପରେ ମେଟ୍ରୋ କମ୍ପାନୀର ନିର୍ଦେଶିକା ଭାବରେ କାମ କରୁଛନ୍ତି ସୋଫିଆ । ସେ ଯଦିଓ ସାମାଜିକ କାର୍ଯ୍ୟକ୍ରମରେ ଲିପ୍ତ ରୁହନ୍ତି, ମାତ୍ର ବାପାଙ୍କ ପାଇଁ ନିର୍ବାଚନରେ ମଧ୍ୟ ସାହାଯ୍ୟ କରୁଥିଲେ ।
ମୋକିମଙ୍କଠୁ ଅଧିକ ମାର୍ଜିନରେ ଜିତିଲେ: ଚଳିତ ନିର୍ବାଚନ ସମୟରେ ବାପା (ମହମ୍ମଦ ମୋକିମ)ଙ୍କୁ ନିର୍ବାଚନ ଲଢ଼ିବାରେ ସମସ୍ୟା ସୃଷ୍ଟି ହେବାରୁ ସେ ବାପାଙ୍କ ସ୍ଥାନରେ ନିର୍ବାଚନ ଲଢ଼ିବା ପାଇଁ ମନସ୍ଥ କରିଥିଲେ । କଂଗ୍ରେସ ଟିକଟରୁ ସେ ନିର୍ବାଚନ ଲଢ଼ିଥିଲେ । ଗତକାଲି ଫଳାଫଳ ଘୋଷଣା ହୋଇଥିବାବେଳେ ନିକଟତମ ପ୍ରତିଦ୍ବନ୍ଦ୍ବୀ ତଥା ବିଜେପି ପ୍ରାର୍ଥୀ ଡାକ୍ତର ପୂର୍ଣ୍ଣଚନ୍ଦ୍ର ମହାପାତ୍ରଙ୍କୁ ପରାଜିତ କରିଛନ୍ତି ସୋଫିଆ । ୮୦୦୧ ଖଣ୍ଡ ଭୋଟ ବ୍ୟବଧାନରେ ସେ ବିଜୟୀ ହୋଇଛନ୍ତି । ଏହି ନିର୍ବାଚନ ମଣ୍ଡଳୀରେ ଅନେକ ହେଭିୱେଟ ପ୍ରଚାର କରିଥିଲେ । ଏପରିକି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଅମିତ ଶାହାଙ୍କ ସମେତ ଅନେକ କେନ୍ଦ୍ରମନ୍ତ୍ରୀ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ଭିକେ ପାଣ୍ଡିଆନଙ୍କ ଭଳି ଅନେକ ହେଭିୱେଟ୍ ପ୍ରଚାର କରିବା ସତ୍ତ୍ବେ ସୋଫିଆ ବିଜୟୀ ହୋଇଛନ୍ତି । ଏପରିକି ତାଙ୍କ ବାପାଙ୍କ ଠାରୁ ଅଧିକ ମାର୍ଜିନରେ ବିଜୟୀ ହୋଇଛନ୍ତି ସୋଫିଆ ।
