ଭୁବନେଶ୍ବର: ରାଜ୍ୟ ଅତିଥି ଭବନସ୍ଥିତ ମୁଖ୍ୟମନ୍ତ୍ରୀଙ୍କ ଅସ୍ଥାୟୀ କାର୍ଯ୍ୟାଳୟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଭେଟିଲେ ରଣପୁରର ନିର୍ବାଚିତ ବିଧାୟିକା ସୁରମା ପାଢ଼ୀ । ମୁଖ୍ୟମନ୍ତ୍ରୀଙ୍କୁ ଦେଖା କରିବା ପରେ ଗଣମାଧ୍ୟମରେ ପ୍ରତିକ୍ରିୟା ରଖିଛନ୍ତି ବିଧାୟିକା ସୁରମା ପାଢ଼ୀ । ପୂର୍ବତନ ମନ୍ତ୍ରୀ ସୁରମା ପାଢ଼ୀ ପୁଣିଥରେ ବିଧାନସଭାକୁ ନିର୍ବାଚିତ ହେବାପରେ ତାଙ୍କୁ ବାଚସ୍ପତି ଚୟନ କରାଯିବା ନେଇ ଚର୍ଚ୍ଚା ହେଉଛି । ଏନେଇ ମଧ୍ୟ ସେ ପ୍ରତିକ୍ରିୟା ରଖିଛନ୍ତି ।
ସୁରମା ପାଢ଼ୀ କହିଛନ୍ତି, "ଆସନ୍ତା ୧୮ରୁ ୧୯ ତାରିଖରେ ବିଧାୟକମାନେ ଶପଥ ଗ୍ରହଣ କରିବେ । ଏଥିପାଇଁ କାମଚଳା ବାଚସ୍ପତି ମଧ୍ୟ ଶପଥ ନେଇ ସାରିଛନ୍ତି । ବିଧାୟକମାନେ ଶପଥ ନେଇ ସାରିବା ପରେ ବିଜେପି ସରକାରର ଆଗାମୀ କାର୍ଯ୍ୟପନ୍ଥା ସ୍ଥିର ହେବ ।" ବାଚସ୍ପତି ହେବା ନେଇ ଚର୍ଚ୍ଚା ସମ୍ପର୍କରେ ସୁରମା କହିଛନ୍ତି, "ଚର୍ଚ୍ଚା ତ ଅନେକ କଥା ହୁଏ । ଚର୍ଚ୍ଚାକୁ ନେଇ କିଛି କୁହାଯାଇ ପାରିବ ନାହିଁ । ରାଜନୀତିରେ 'ଯଦି' ଏବଂ 'କିନ୍ତୁ'ର ସ୍ଥାନ ନଥାଏ । ଯାହା ହେବା କଥା ସ୍ପଷ୍ଟ କଥାରେ ହୋଇଥାଏ ।" ପୂର୍ବତନ ମନ୍ତ୍ରୀଙ୍କୁ ଏଥର କୌଣସି ମଧ୍ୟ ମନ୍ତ୍ରୀପଦ ମିଳିନାହିଁ । ମନ୍ତ୍ରୀପଦ ପାଇଁ ଆଶା ଥିଲା କି ନାହିଁ, ପ୍ରଶ୍ନରେ ସେ କହିଛନ୍ତି, "ଆଶା ଥିଲା, ଲୋକଙ୍କ ସେବା କରିବା । ଭଗବାନଙ୍କ ଆଶୀର୍ବାଦରୁ ରଣପୁରବାସୀଙ୍କ ସେବା କରିବା ପାଇଁ ମୁଁ ନିର୍ବାଚିତ ହୋଇଛି । ରାଜ୍ୟରେ ସରକାର ଗଢ଼ିବା ପାଇଁ ଭାରତୀୟ ଜନତା ପାର୍ଟି ଉପରେ ମଧ୍ୟ ଭଗବାନଙ୍କ ଆଶିଷ ମିଳିଛି । ରାଜ୍ୟରେ ବିଜେପି ସରକାର ଗଢ଼ିଥିବାରୁ ମୁଁ ବହୁତ ଖୁସି ।"
