ନୂଆଦିଲ୍ଲୀ: ସାଧାରଣ ନିର୍ବାଚନ ଶେଷ ହେବା ପରେ ଆଜିଠାରୁ ଆରମ୍ଭ ହେବାକୁ ଯାଉଛି ନବଗଠିତ ଅଷ୍ଟାଦଶ ଲୋକସଭାର ପ୍ରଥମ ଅଧିବେଶନ । ଏହି ଅଧିବେଶନର ପ୍ରାରମ୍ଭରେ ଏକାଧିକ ସଂସଦୀୟ ପ୍ରକ୍ରିୟା ଥିବା ବେଳେ ଆରମ୍ଭରୁ ଗୃହ ସରଗରମ ହେବା ନେଇ ସ୍ଥିତି ବାରିହୋଇ ପଡିଲାଣି । କୌଣସି ପ୍ରସଙ୍ଗ, ପ୍ରସ୍ତାବ କିମ୍ବା ବିଲ୍ ନୁହେଁ ବରଂ ସଂସଦୀୟ ପ୍ରକ୍ରିୟା ନେଇ ସରକାରଙ୍କୁ ଘେରିବାକୁ ବିରୋଧୀ ପ୍ରସ୍ତୁତ ।
କାମଚଳା ବାଚସ୍ପତିଙ୍କ ନିଯୁକ୍ତି ପ୍ରକ୍ରିୟା ନେଇ ପ୍ରଶ୍ନ ଉଠାଇଥିବା ବିରୋଧୀ ‘ଇଣ୍ଡିଆ’ ମେଣ୍ଟର କୌଣସି ସାଂସଦ କାମଚଳା ବାଚସ୍ପତିଙ୍କୁ ସହାୟତା କରିବା ପାଇଁ ଉଦ୍ଦିଷ୍ଟ ଚେୟାରରେ ଅଂଶଗ୍ରହଣ କରିବେ ନାହିଁ । ବିଜେପିର ବରିଷ୍ଠ ନେତା ତଥା ଚଳିତଥର ନିମ୍ନସଦନକୁ କ୍ରମାଗତ 7ମ ଥର ନିର୍ବାଚିତ ହୋଇଥିବା ଭର୍ତ୍ତୃହରି ମହତାବଙ୍କୁ କାମଚଳା ବାଚସ୍ପତି ଭାବେ ଚୟନ କରାଯାଇଛି । କଂଗ୍ରେସ ସାଂସଦ କେ.ସୁରେଶ ଓ ଅନ୍ୟ କିଛି ବିରୋଧୀ ସାଂସଦଙ୍କୁ ଭର୍ତ୍ତୃହରିଙ୍କୁ ଗୃହ ପରିଚାଳନାରେ ସହଯୋଗ କରିବା ପାଇଁ ଉଦ୍ଦିଷ୍ଟ ପ୍ୟାନେଲରେ ମଧ୍ୟ ରାଷ୍ଟ୍ରପତି ଚୟନ କରିଥିଲେ । ହେଲେ ଏହି ପ୍ରକ୍ରିୟାରେ ‘ଇଣ୍ଡିଆ’ ମେଣ୍ଟର କୌଣସି ସଦସ୍ୟ ଅଂଶଗ୍ରହଣ କରିବେ ନାହିଁ ବୋଲି ଜଣାପଡିଛି ।
ଆଜି ଅଧିବେଶର ଉଦଘାଟନୀ କାର୍ଯ୍ୟ ଦିବସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଅନ୍ୟ ମନ୍ତ୍ରୀ ଓ ସମସ୍ତ ସାଂସଦମାନେ ଶପଥ ଗ୍ରହଣ କରିବେ । ପୂର୍ବାହ୍ନ ପ୍ରାୟ 10ଟାରେ ଭର୍ତ୍ତୃହରି ମହତାବଙ୍କୁ ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୋପଦୀ ମୁର୍ମୁ କାମଚଳା ବାଚସ୍ପତି ଭାବେ ଶପଥ ପାଠ କରାଇବେ । କିନ୍ତୁ ଏହି ନିଷ୍ପତ୍ତିରେ ତୀବ୍ର ଅସନ୍ତୋଷ ବ୍ୟକ୍ତ କରିଥିବା ବିରୋଧୀ ଆଜି ଗୃହରେ ହଟ୍ଟଗୋଳ କରିପାରନ୍ତି । ଏବେ ଦେଶରେ ନିଟ୍ ଓ ନେଟ୍ ପରୀକ୍ଷାରେ ଅନିୟମିତତା ପ୍ରସଙ୍ଗ ଗଣମାଧ୍ୟମର ଶିରୋନାମାରେ ରହିଛି । ତେଣୁ ଏହି ପ୍ରସଙ୍ଗରେ ମଧ୍ୟ ବିରୋଧୀ ଗୃହରେ ସରକାରକୁ ଘେରିପାରନ୍ତି । ବିଜେପି ନେତୃତ୍ବାଧୀନ ‘ଏନଡିଏ’ ମେଣ୍ଟ କେନ୍ଦ୍ରରେ ତୃତୀୟ ଥର ସରକାର ଗଠନ କରିବାରେ ସଫଳ ହୋଇଥିଲେ ସୁଦ୍ଧା ପୂର୍ବପେକ୍ଷା ଦୁର୍ବଳ ସ୍ଥିତିକୁ ଖସିଛି । ଅନୁରୂପ ଭାବେ ବିରୋଧୀ ମଧ୍ୟ ପୂର୍ବାପେକ୍ଷା ଶକ୍ତିଶାଳୀ ଭୂମିକାକୁ ଆସିଛନ୍ତି । ତେଣୁ ଆରମ୍ଭରୁ ବିଭିନ୍ନ ଚର୍ଚ୍ଚାରେ ବିରୋଧୀ ପ୍ରଭାବୀ ଭାବେ ଅଂଶଗ୍ରହଣ କରିବା ସହ ସରକାରକୁ ଘେରିବା ନେଇ ଅନୁମାନ କରାଯାଉଛି ।
କାମଚଳା ବାଚସ୍ପତି ଚୟନକୁ ନେଇ ଦ୍ବନ୍ଦ୍ବ କାହିଁକି:-
ଭାରତୀୟ ସମ୍ବିଧାନର ମୂଳଖଣ୍ଡରେ କାମଚଳା ବାସସ୍ପତି ପଦ, ଏହାର ଚୟନ ପ୍ରକ୍ରିୟା ଓ କ୍ଷମତା ନେଇ କୌଣସି ସ୍ପଷ୍ଟ ଉଲ୍ଲେଖ ନାହିଁ । ମାତ୍ର ସଂସଦୀୟ ପ୍ରକ୍ରିୟା ଆଧାରରେ ଏହା ପରବର୍ତ୍ତୀ ସମୟରେ ସୃଷ୍ଟି ହୋଇଥିବା ଏକ ବ୍ୟବସ୍ଥା । ନୂତନ ଲୋକସଭା କାର୍ଯ୍ୟ ଆରମ୍ଭ କରିବା ପୂର୍ବରୁ ପୂର୍ବତନ ବାଚସ୍ପତିଙ୍କୁ ଇସ୍ତଫା ଦେବାକୁ ହୋଇଥାଏ । ନୂଆ ବାଚସ୍ପତି ନିର୍ବାଚିତ ହେବା ପୂର୍ବରୁ ସ୍ବଳ୍ପକାଳୀନ ଅବଧି ଓ କିଛି ନିର୍ଦ୍ଦିଷ୍ଟ ଗୃହକାର୍ଯ୍ୟ ପାଇଁ କାମଚଳା ବାଚସ୍ପତି ନିଯୁକ୍ତ ହୁଅନ୍ତି । ସଂସଦୀୟ ବ୍ୟାପାର ମନ୍ତ୍ରଣାଳୟ ଓ ପ୍ରଧାନମନ୍ତ୍ରୀଙ୍କ ସୁପାରିଶ କ୍ରମେ ରାଷ୍ଟ୍ରପତି ଲୋକସଭାର ଜଣେ ବରିଷ୍ଠ ସଦସ୍ୟଙ୍କୁ ଏହି ପଦବୀରେ ନିଯୁକ୍ତି ଦିଅନ୍ତି ।
ବାଚସ୍ପତି ନିର୍ବାଚନ ଶେଷ ହେବା ପର୍ଯ୍ୟନ୍ତ କାମଚଳା ବାଚସ୍ପତି ହିଁ ଗୃହ ପରିଚାଳନା କରନ୍ତି ଓ ପରେ ବାଚସ୍ପତିଙ୍କୁ ଦାୟିତ୍ବ ହସ୍ତାନ୍ତର କରନ୍ତି । ବର୍ତ୍ତମାନ ଏହି ପଦବୀ ପାଇଁ ଚୟନ ହୋଇଥିବା ଭର୍ତ୍ତୃହରି ମହତାବ 7ଥର ନିର୍ବାଚିତ ହୋଇଛନ୍ତି । କଂଗ୍ରେସ ଓ ‘ଏନଡିଏ’ ମେଣ୍ଟ ଦାବି ଅନୁସାରେ, କେ.ସୁରେଶ 8ଥ ନିର୍ବାଚିତ ହୋଇଛନ୍ତି ଓ ସେ ବରିଷ୍ଠତା ଭିତ୍ତିରେ ଏହି ପଦବୀ ପାଇଁ ଯୋଗ୍ୟ । ଏହାକୁ ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜଜୁ ଖଣ୍ଡନ କରିବା ସହ ସୁରେଶ 1998 ଓ 2004 ରେ ନିର୍ବାଚନ ହାରିଥିବା ବେଳେ ଭର୍ତ୍ତୃହରି କ୍ରମାଗତ 7ଥର ସଦନକୁ ନିର୍ବାଚିତ ହୋଇଛନ୍ତି ବୋଲି କହି ସରକାରଙ୍କ ନିଷ୍ପତ୍ତିକୁ ସଠିକ ବୋଲି ଦର୍ଶାଇଛନ୍ତି ।
ପ୍ରଥମ ଦିନରେ କିପରି ରହିବ ସଂସଦୀୟ ପ୍ରକ୍ରିୟା:-
- 1. ପୂର୍ବାହ୍ନରେ ବିଜେପି ସାଂସଦ ଭର୍ତ୍ତୃହରି ମହତାବ ରାଷ୍ଟ୍ରପତି ଭବନରେ କାମଚଳା ବାଚସ୍ପତି ପଦର ଶପଥ ନେବେ
- 2. 11ଟା ସମୟରେ ସମସ୍ତ ନିର୍ବାଚିତ ସଦସ୍ୟ ଗୃହରେ ପହଞ୍ଚିବେ ।
- 3. ଲୋକସଭା ମହାସଚିବ ନିର୍ବାଚିତ ସଦସ୍ୟଙ୍କ ବିବରଣୀ ଗୃହରେ ଆଗତ କରିବେ
- 4. ଦିବଙ୍ଗତ ସଦସ୍ୟଙ୍କ ଉଦ୍ଦେଶ୍ୟରେ ଶ୍ରଦ୍ଧାଞ୍ଜଳି ଓ ନୀରବ ପ୍ରାର୍ଥନା ହେବ
- 5. ପ୍ରଧାନମନ୍ତ୍ରୀ ମୋଦି ସାଂସଦ ପଦର ଶପଥ ଗ୍ରହଣ କରିବେ
- 6. କେନ୍ଦ୍ର ମନ୍ତ୍ରୀମାନେ ଓ ପରେ ସାଂସଦମାନେ ଶପଥ ଗ୍ରହଣ କରିବେ ।
ଏହା ମଧ୍ୟ ପଢନ୍ତୁ :- ଆଜିଠୁ ଅଷ୍ଟାଦଶ ଲୋକସଭାର ପ୍ରଥମ ଅଧିବେଶନ, ପ୍ରଧାନମନ୍ତ୍ରୀ ଓ ଅନ୍ୟ ସାଂସଦ ନେବେ ଶପଥ
ବ୍ୟୁରୋ ରିପୋର୍ଟ, ଇଟିଭି ଭାରତ
