ହାଇଦ୍ରାବାଦ: ଓଡିଶାରେ ଭାଙ୍ଗିଲା ଗତ 24ବର୍ଷର ରାଜନୈତିକ ପରମ୍ପରା । ଦୀର୍ଘ ଅଢେଇ ଦଶନ୍ଧି ଧରି ରାଜ୍ୟରେ ଶାସନରେ ଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟଙ୍କ ନିରବଚ୍ଛିନ ବିଜୟଧାରାରେ ଲାଗିଲା ରୋକ । ଯାହା ଏକାଧିକ ଜାତୀୟ ଗଣମାଧ୍ୟମ ନିଜ ଏକଜିଟ ପୋଲରେ ଦର୍ଶାଇଥିଲେ, ଆଶ୍ଚର୍ଯ୍ୟଜନକ ଭାବେ ତାହା ବାସ୍ତବରେ ପରିଣତ ହେବାକୁ ଯାଉଛି । ଉତ୍ତର ଭାରତୀୟ ରାଜ୍ୟ ପରି ଓଡିଶାରେ ମଧ୍ୟ ଫୁଟିବାକୁ ଯାଉଛି ପଦ୍ମ । ହେବାକୁ ଯାଉଛି ଡବଲ ଇଞ୍ଜିନ ସରକାର । ଏବେ ସୁଦ୍ଧା ଆନୁଷ୍ଠାନିକ ଭାବେ ନିିର୍ବାଚନ କମିଶନଙ୍କ ଫଳାଫଳ ଘୋଷଣା ବାକି ଥିବା ବେଳେ ରାଜ୍ୟରେ ବିଜେପି ଏକକ ସଂଖ୍ୟା ଗରିଷ୍ଠତା ସହ ସରକାର ଗଠନ କରିବାର ଚିତ୍ର କ୍ରମଶଃ ସ୍ପଷ୍ଟ ହେବାରେ ଲାଗିଛି ।
ଏହା ସହ ରାଜ୍ୟର 21 ଲୋକସଭା ଆସନରେ ମଧ୍ୟ ଭାରତୀୟ ଜନତା ପାର୍ଟି ଶାସକ ଦଳ ବିଜେଡିକୁ ଧୂଳି ଚଟାଇ ବୃହତ୍ତ ବଜୟ ହାସଲ କରିବାକୁ ଯାଉଛି । ବିଜେପି ପ୍ରାର୍ଥୀମାନେ ପ୍ରାୟ 18 ରୁ 20 ଆସନରେ ଭଲ ବ୍ୟବଧାନରେ ଆଗରେ ରହିଛନ୍ତି । ଆଉ ଅଳ୍ପ କିଛି ରାଉଣ୍ଡ ଗଣତି ବାକି ଥିବା ବେଳେ ଏହି ଟ୍ରେଣ୍ଡ ବିଜୟ ଧାରାରେ ପରିବର୍ତ୍ତନ ହେବାର ଯଥେଷ୍ଟ ସମ୍ଭାବନା ରହିଛି ।
ରାଜ୍ୟର 21 ଆସନରୁ କେବଳ ଯାଜପୁରରେ ବିଜେଡି ପ୍ରାର୍ଥୀ ଶର୍ମିଷ୍ଠା ସେଠୀ ଆଗରେ ରହିଛନ୍ତି । ବର୍ତ୍ତମାନର ଟ୍ରେଣ୍ଡ ଅନୁସାରେ, ସେ ବିଜେପି ପ୍ରାର୍ଥୀ ରବିନ୍ଦ୍ର ଜେନାଙ୍କୁ ପରାସ୍ତ କରିପାରନ୍ତି । ସେହିପରି ଗତଥର କଂଗ୍ରେସ ଦଖଲରେ ଥିବା ଏକମାତ୍ର ଆସନ କୋରାପୁଟରେ ମଧ୍ୟ ଏଥର କଂଗ୍ରେସ ପ୍ରାର୍ଥୀ ତଥା ସାଂସଦ ସପ୍ତିଗିରି ଉଲକା ଆଗରେ ରହିଛନ୍ତି । ବ୍ୟବଧାନ ଓ ଗଣତି ପର୍ଯ୍ୟାୟକୁ ଦେଖିଲେ, ସେ ମଧ୍ୟ ବିଜୟ ଲାଭ କରିପାରନ୍ତି । ମୁକାବିଲା ଦୃଷ୍ଟିରୁ ସର୍ବାଧିକ ଚର୍ଚ୍ଚାରେ ଥିବା ସମ୍ବଲପୁରରେ ବିଜେପି ପ୍ରାର୍ଥୀ ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିପକ୍ଷରେ ପ୍ରାର୍ଥୀ ହୋଇଥିବା ବିଜେଡିର ଟାଣୁଆ ନେତା ପ୍ରଣବ ପ୍ରକାଶ ଦାସ (ବବି) ପରାଜୟର ନିକଟବର୍ତ୍ତୀ ହୋଇଛନ୍ତି । ଲକ୍ଷାଧିକ ଭୋଟ ବ୍ୟବଧାନରେ ଧର୍ମେନ୍ଦ୍ର ବବିଙ୍କ ଠାରୁ ଆଗରେ ରହିଥିବା ବେଳେ ଆଉ କିଛି ପର୍ଯ୍ୟାୟର ଗଣତି ବାକି ଅଛି । ତେଣୁ ଏଠାରେ ମଧ୍ୟ ଧର୍ମେନ୍ଦ୍ରଙ୍କ ବିଜୟରେ କେବଳ ଔପଚାରିକ ମୋହର ଲାଗିବା ବାକି ଅଛି ।
କେନ୍ଦ୍ରାପଡାର ଚର୍ଚ୍ଚିତ ଆସନ କେନ୍ଦ୍ରାପଡାରେ ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ବିଜେଡି ପ୍ରାର୍ଥୀ ଅଂଶୁମାନ ମହାନ୍ତିଙ୍କ ଠାରୁ ଆଗରେ ଅଛନ୍ତି । ସେହିପରି ଉତ୍ତର ଓଡିଶାର ବାଲେଶ୍ବରରେ ବିଜେପି ପ୍ରାର୍ଥୀ ପୂର୍ବତନ କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀ ମଧ୍ୟ ବିଜେଡି ପ୍ରାର୍ଥୀ ଲେଖାଶ୍ରୀ ସାମନ୍ତସିଂହାରଙ୍କ ଠାରୁ ବେଶ ଭଲ ବ୍ୟବଧାନରେ ଆଗରେ ରହିଛନ୍ତି । ବଲାଙ୍ଗୀରରେ ବିଜେପି ପ୍ରାର୍ଥୀ ସଙ୍ଗୀତା କୁମାରୀ ସିଂହଦେଓ, ବରଗଡରୁ ପ୍ରଦୀପ ପୁରୋହିତ, କଳାହାଣ୍ଡିରୁ ମାଳବିକା ଦେବୀ, ବ୍ରହ୍ମପୁରରୁ ପ୍ରଦୀପ ପାଣିଗ୍ରାହୀ, ଢେଙ୍କାନାଳରୁ ରୁଦ୍ର ପାଣି, ମୟୂରଭଞ୍ଜରୁ ନବ ମାଝୀ, ନବରଙ୍ଗପୁରରୁ ବଳଭଦ୍ର ମାଝୀ ପ୍ରମୁଖ ଆଗରେ ରହିଛନ୍ତି ।
ତେବେ ଆନୁଷ୍ଠାନିକ ଘୋଷଣା ବାକି ଥିଲେ ସୁଦ୍ଧା ଗଣତି ଶେଷ ପର୍ଯ୍ୟାୟରେ ପହଞ୍ଚିଛି । ବିଜେପି ଶିବିରରେ ବେଶ ଉତ୍ସାହ ଦେଖିବାକୁ ମିଳିଛି । ଦଳ ରାଜ୍ୟରେ ସରକାର ଗଠନ କରିବାକୁ ଯାଉଥିବା ବେଳେ ଲୋକସଭାରେ ମଧ୍ୟ ଐତିହାସିକ ବିଜୟ ହାସଲ କରିବାକୁ ଯାଉଛି । ଏହା ପୂର୍ବରୁ ନିଜେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିର୍ବାଚନୀ ସଭାରେ 4 ତାରିଖ ବିଜେଡି ସରକାରର ଏକ୍ସପାଏରୀ ଡେଟ ଓ 10 ତାରିଖରେ ଜଣେ ଓଡିଆ ଓଡିଶାର ବିଜେପି ସରକାରର ମୁଖ୍ୟମନ୍ତ୍ରୀ ଭାବେ ଶପଥ ନେବେ ବୋଲି ଘୋଷଣା କରିସାରିଛନ୍ତି । ଏବେ ଫଳାଫଳ ପରେ ବିଜେପିର ମୁଖ୍ୟମନ୍ତ୍ରୀ ପ୍ରାର୍ଥୀ କିଏ ହେବ, ସେନେଇ କଳ୍ପନା ଜଳ୍ପନା ଆରମ୍ଭ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
