ନବରଙ୍ଗପୁର: ଦିନକ ପରେ ନବରଙ୍ଗପୁର ଲୋକସଭା ଓ ଉମରକୋଟ ବିଧାନସଭା ଆସନରେ ପଡିବ ଭୋଟ । ପ୍ରଥମ ପର୍ଯ୍ୟାୟରେ ଏହି ନିର୍ବାଚନ ମଣ୍ଡଳୀ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ଭୋଟର । ତେବେ ଏଥର ନବରଙ୍ଗପୁର ନିର୍ବାଚନରେ ବଙ୍ଗୀୟ ଭୋଟରଙ୍କ ନିର୍ଣ୍ଣାୟକ ଭୂମିକା ରହିବ । କାରଣ ଆଦିବାସୀ ଅଧ୍ଯୁଷିତ ନବରଙ୍ଗପୁର ଜିଲ୍ଲାର ଉମରକୋଟ ଓ ଝରିଗାଁ ନିର୍ବାଚନ ମଣ୍ଡଳୀରେ ବଙ୍ଗୀୟ ଭୋଟରଙ୍କ ଦବଦବା ରହିଛି । ଏହି ଅଞ୍ଚଳରେ ପ୍ରାୟ ୮୦ ହଜାର ବଙ୍ଗୀୟ ଭୋଟର ରହୁଥିବା ଅନୁମାନ କରାଯାଉଛି । ତେଣୁ ଏହି ଭୋଟରଙ୍କ ଉପରେ ଏବେ ନଜର ରଖିଛି ବିଜେପି ଓ ବିଜେଡି । ବଙ୍ଗୀୟ ଭୋଟ ହାତେଇବା ପାଇଁ ଗତ ପଞ୍ଚାୟତ ନିର୍ବାଚନରୁ ଉଭୟ ଦଳ ରଣକୌଶଳ ଜାରି ରଖିଛନ୍ତି । ଏହି ପରିପ୍ରେକ୍ଷୀରେ କିଛି ଦିନ ପୂର୍ବେ କେନ୍ଦ୍ରମନ୍ତ୍ରୀ ଶାନ୍ତୁନୁ ଠାକୁର ରାଇଘର ଗସ୍ତ କରି ବିଜେପିର ଏକ ଜନସଭାରେ ବଙ୍ଗୀୟ ଭୋଟରଙ୍କ ଉଦ୍ଦେଶ୍ୟରେ ଭାଷଣ ଦେଇଥିଲେ ।
ନବରଙ୍ଗପୁର ଜିଲ୍ଲାର ଉମରକୋଟ ନିର୍ବାଚନ ମଣ୍ଡଳୀ ଅନ୍ତର୍ଗତ ଉମରକୋଟ ବ୍ଲକର ୧୩ଟି, ଉମରକୋଟ ସହର ଓ ରାଇଘର ବ୍ଲକର ୩୦ଟି ଗାଁ ଏଭଳି ମୋଟ ୪୩ଟି ଗାଁରେ ବସବାସ କରୁଛନ୍ତି ବଙ୍ଗୀୟ ଭୋଟର । କେବଳ ଉମରକୋଟ ନିର୍ବାଚନ ମଣ୍ଡଳୀରେ ଏହି ଭୋଟରଙ୍କ ସଂଖ୍ୟା ପ୍ରାୟ ୫୫ ହଜାର ରହିଛି । ଝରିଗାଁ ନିର୍ବାଚନ ମଣ୍ଡଳୀର ୧୭ଟି ଗାଁରେ ପ୍ରାୟ ୨୫ ହଜାର ବଙ୍ଗୀୟ ଭୋଟର ରହୁଛନ୍ତି । ଉମରକୋଟ ନିର୍ବାଚନ ମଣ୍ଡଳୀରେ ମୋଟ ୧ଲକ୍ଷ ୯୬ହଜାର ୧୯୦ଜଣ ଭୋଟର ରହିଥିବା ବେଳେ ସେମାନଙ୍କ ମଧ୍ୟରୁ ବଙ୍ଗୀୟ ଭୋଟର ସଂଖ୍ୟା ପ୍ରାୟ ୫୫ ହଜାର । କହିବାକୁ ଗଲେ ମୋଟ ଭୋଟରଙ୍କର ଏହା ପ୍ରାୟ ୨୫ ପ୍ରତିଶତ ।
ଉମରକୋଟ, ରାଇଘର ଓ ଝରିଗାଁ ବ୍ଳକର ୬୦ଟି ଗାଁରେ ଏମାନେ ବସବାସ କରିଆସୁଛନ୍ତି । ତେବେ ସେମାନଙ୍କର ବିଭିନ୍ନ ସମସ୍ୟା ରହିଛି । ବିଶେଷ କରି ବଙ୍ଗାଳୀ ଭାଷାରେ ଶିକ୍ଷାଦାନ ପାଇଁ ସେମାନେ ଦାବି କରିଆସୁଛନ୍ତି । ଏପ ରିସ୍ଥଳେ ଆଗାମୀ ନିର୍ବାଚନରେ ବଙ୍ଗୀୟ ଭୋଟରଙ୍କୁ ହାତେଇବା ପାଇଁ ବିଜେଡି, ବିଜେପି ଓ କଂଗ୍ରେସ କି ପ୍ରକାର ରଣନୀତି ଆପଣାଇବେ ଏବଂ କେଉଁ ଦଳ ସଫଳତା ପାଇବ ତାହା ଦେଖିବା ରହିଲା । ତେବେ ଆସନ୍ତା ନିର୍ବାଚନକୁ ନେଇ ବଙ୍ଗୀୟ ଭୋଟରଙ୍କ ମୁଡ୍ ପରଖିଛନ୍ତି ଆମ ଇଟିଭି ଭାରତ ପ୍ରତିନିଧି ।
ଇଟିଭି ଭାରତ, ନବରଙ୍ଗପୁର
