ଭୁବନେଶ୍ବର: ଦିନକୁ ଦିନ ଉଗ୍ରରୂପ ଧାରଣ କରୁଛି ଓଡ଼ିଶା କଂଗ୍ରେସ କନ୍ଦଳ । ଲୋକେ କହୁଛନ୍ତି ଜାତୀୟସ୍ତରରେ ଦିନକୁ ଦିନ ପୁଣି ଶକ୍ତିଶାଳୀ ହେଉଥିବା କଂଗ୍ରେସ ରାଜ୍ୟରେ ଦିନକୁ ଦିନ ପାତାଳଗାମୀ ହେଉଛି । ଏହି ଆଲୋଚନାକୁ ଆହୁରି ବଳ ଯୋଗାଇଛି କଂଗ୍ରେସ ଭବନ ଆଗରେ ଆଜିର ବିକ୍ଷୋଭ । ଏହି ବିକ୍ଷୋଭ ଅନ୍ୟ କୌଣସି ଦଳ ନୁହେଁ, ଖୋଦ କଂଗ୍ରେସ ଦଳ ଭିତରେ ଥିବା ଅସନ୍ତୁଷ୍ଟଙ୍କ ଦ୍ବାରା କରାଯାଇଥିଲା । ନାରାବାଜି, ହୋ-ହଲ୍ଲାରେ କମ୍ପିଲା କଂଗ୍ରେସ ଭବନ । 'ଶରତ ହଟାଅ, କଂଗ୍ରେସ ବଞ୍ଚାଅ' ଦାବି ଜୋର ଧରିଲା । ଅନଶନରେ ବସିଥିବା ଦଳରୁ ବହିଷ୍କୃତ ନେତ୍ରୀ ଶ୍ରୀୟାସ୍ମିତା ପଣ୍ଡାଙ୍କ ସମର୍ଥକ କରିଛନ୍ତି ହୋ ହଲ୍ଲା । ଆନ୍ଦୋଳନକାରୀଙ୍କ ଦ୍ବାରା ପିସିସି ସଭାପତି ଶରତ ପଟ୍ଟନାୟକଙ୍କ ପୋଷ୍ଟର ମଧ୍ୟ ପୋଡ଼ାଯାଇଛି ।
ଧିରେ ଧିରେ କୁହୁଳୁଛି କଂଗ୍ରେସ କନ୍ଦଳ । ଏଆଇସିସି ନିର୍ଦ୍ଦେଶରେ ବହିଷ୍କୃତ ମହିଳା କଂଗ୍ରେସର ସାଧାରଣ ସମ୍ପାଦିକା ଶ୍ରୀୟାସ୍ମିତା ପଣ୍ଡାଙ୍କ ଅନଶନ ଅସନ୍ତୋଷର ଦାନା ବାନ୍ଧୁଛି । ଆଜିକୁ ୯ ଦିନ ହେବ ଶ୍ରୀୟାସ୍ମିତା କଂଗ୍ରେସ ଭବନ ମୁଖ୍ୟ ଫାଟକରେ ଅନଶନରେ ବସି ନ୍ୟାୟ ମିଳିବା ପର୍ଯ୍ୟନ୍ତ ଏମିତି ବିରୋଧ କରିବେ ବୋଲି ଅଡି ବସିଛନ୍ତି । ଆଜି ତାଙ୍କ ସହ ବହିଷ୍କୃତ ହୋଇଥିବା ପ୍ରକାଶ ମିଶ୍ର, ଶ୍ରୀଲିପି ଶ୍ରୀଚନ୍ଦନଙ୍କ ସହ ବହୁ କର୍ମୀ ବିକ୍ଷୋଭ ପ୍ରଦର୍ଶନ କରିଥିଲେ । 'ଶରତ ହଟାଅ, କଂଗ୍ରେସ ବଞ୍ଚାଅ' ନାରା ଦେଇ ବିକ୍ଷୋଭ ପ୍ରଦର୍ଶନ କରିଥିଲେ । କଂଗ୍ରେସ ଭବନ ସମ୍ମୁଖରେ ପିସିସି ସଭାପତି ଶରତ ପଟ୍ଟନାୟକଙ୍କ କୁଶପୁତ୍ତଳିକା ଦାହ କରି ପ୍ରତିବାଦ କରିଥିଲେ ଅସନ୍ତୁଷ୍ଟ କଂଗ୍ରେସ କର୍ମୀ ।
ଏନେଇ ବହିଷ୍କୃତ କଂଗ୍ରେସ ନେତା ପ୍ରକାଶ ମିଶ୍ର କହିଛନ୍ତି, "ପିସିସି ସଭାପତି ଦଳକୁ ଅଧିକ ଖରାପ ସ୍ଥିତି ନେଇଯାଇଛନ୍ତି । ନିର୍ବାଚନରେ ଟିକଟ ବିକ୍ରି କରି ଦଳକୁ ଅଧିକ ଦୁର୍ବଳ କରିଦେଇଛନ୍ତି । ଏହାସହ ଜଣେ ମହିଳା ଦୀର୍ଘ ୯ ଦିନ ହେବ ଧାରଣାରେ ବସିଥିଲେ ହେଁ ଏପର୍ଯ୍ୟନ୍ତ ପିସିସି ସଭାପତି ତାଙ୍କ ସହ ଆଲୋଚନା ପାଇଁ ମଧ୍ୟ ଆସିନାହାନ୍ତି । ତେଣୁ ଆମେ ଦାବି କରୁଛୁ, ଦଳ ତରଫରୁ ଆମ ସହ ଆଲୋଚନା କରାଯାଇ ଆମକୁ ନ୍ୟାୟ ପ୍ରଦାନ କରାଯାଉ ।"
