ଭୁବନେଶ୍ବର: ଆଜି ବହୁ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବିଜେଡି ସରକାର ଉପରେ ବର୍ଷିଛି ରାଜ୍ୟ ବିଜେପି । ରାଜ୍ୟରେ ଆଜି ପ୍ରଥମ ପର୍ଯ୍ୟାୟ ମତଦାନ ଜାରି ରହିଥିବା ବେଳେ ରାଜ୍ୟ ବିଜେପିର ତମାମ ଶୀର୍ଷ ନେତା ଭୁବନେଶ୍ବରରେ ଏକ ପ୍ରେସମିଟ୍ କରି ବିଜେଡି ସରକାରକୁ ଘେରିଛନ୍ତି । ପ୍ରେସମିଟରେ ଦଳର 4 ସାଂସଦ ପ୍ରାର୍ଥୀ ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଅପରାଜିତା ଷଡଙ୍ଗୀ, ପୂର୍ବତନ କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀ ଓ ଦଳର ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କ ସମେତ ରାଜ୍ୟ ବିଜେପି ସଭାପତି ମନମୋହନ ସାମଲ ଉପସ୍ଥିତ ରହି ବିଜେଡି ସରକାରକୁ ଘେରିଛନ୍ତି । ଓଡ଼ିଶା ରାଜନୀତିରେ ପ୍ରଧାନମନ୍ତ୍ରୀ ମୋଦିଙ୍କ ଏଜେଣ୍ଡା ସେଟ୍ ହେବାକୁ ଯାଉଛି ଓ ଅଦ୍ଭୂତପୂର୍ବ ପରିବର୍ତ୍ତନ ଆଡ଼କୁ ଓଡ଼ିଶା ଯାଉଛି ବୋଲି ଦୃଢ଼ୋକ୍ତି ବାଢ଼ିଛନ୍ତି ଧର୍ମେନ୍ଦ୍ର ।
ଧର୍ମେନ୍ଦ୍ର କହିଛନ୍ତି, "ପ୍ରଧାନମନ୍ତ୍ରୀ ଏଜେଣ୍ଡା ସେଟ୍ କରିଛନ୍ତି । ଓଡ଼ିଶାରେ ସରକାର ପରିବର୍ତ୍ତନ ହେବା ଦରକାର । ୨୫ ବର୍ଷରେ ଓଡ଼ିଶା ଯେଉଁ ସ୍ଥାନରେ ପହଞ୍ଚିବା କଥା ତାହା ହୋଇପାରୁନାହିଁ । କିନ୍ତୁ ଅନେକ ରାଜ୍ୟ ଆମଠୁ ଉପରେ ଅଛନ୍ତି । ପ୍ରଧାନମନ୍ତ୍ରୀ ଗୁଜରାଟ କଥା କହିଲେ । ଓଡ଼ିଶାକୁ ଏକ ନମ୍ବର କରିବା ପାଇଁ ମୋଦି ସୁଯୋଗ ଦେଇଛନ୍ତି । ବିଗତ ୨୫ ବର୍ଷରେ ଓଡ଼ିଶାରେ ପିଇବା ପାଣି ନାହିଁ, ହଇଜା ହେଉଛି, ଜଳସେଚନର ଘୋର ଅଭାବ । ଶିକ୍ଷା ବ୍ୟବସ୍ଥା ବିପର୍ଯ୍ୟୟ, ସ୍ବାସ୍ଥ୍ୟସେବା ବିପର୍ଯ୍ୟୟ । ଏନ୍ସିଆର୍ବି ତଥ୍ୟ ଅନୁସାରେ ରାଜ୍ୟରେ ମହିଳା ଅତ୍ୟାଚାର ଅଧିକ । ଓଡିଶାରୁ ଏକ ତୃତୀୟାଂଶ ଲୋକ ବାହାର ରାଜ୍ୟକୁ ଯାଉଛନ୍ତି ଦାଦନ ଖଟିବାକୁ । ବିକାଶ ଓ ଓଡ଼ିଆ ଅସ୍ମିତା ଏବେ ପ୍ରସଙ୍ଗ । ଗତକାଲି ପ୍ରଧାନମନ୍ତ୍ରୀଙ୍କୁ ଜବାବ ଦେଇ ପୁରୁଣା ତଥ୍ୟ ରଖିଲେ । ଓଡ଼ିଶାରେ ଶିଶୁ ମୃତ୍ୟୁହାର 36 ଅଛି । ରାଷ୍ଟ୍ରୀୟ ସ୍ଥିତି 28 । ଗୁଜରାଟରେ 23 । ଶିଶୁ ମୃତ୍ୟୁହାର ଓଡ଼ିଶାରେ ତୃତୀୟ ସର୍ବାଧିକ । ଓଡ଼ିଶାରେ ମୁଣ୍ଡ ପିଛା ସ୍ବାସ୍ଥ୍ୟ ଖର୍ଚ୍ଚ କେତେ ହେଉଛି । ଜାତୀୟ ସ୍ତରରେ 2014 ଟଙ୍କା ହେଉଛି । 1861 ଟଙ୍କା ଗୁଜରାଟରେ, 1449 ଟଙ୍କା ଓଡ଼ିଶାରେ । ଓଡ଼ିଆ ଅସ୍ମିତା କେଉଁଠି ବନ୍ଧା ପଡ଼ୁଛି । ଓଡ଼ିଶା ପିଲାଙ୍କ ଶିକ୍ଷା, ସ୍ବାସ୍ଥ୍ୟ କେଉଁଠି ଥିବ । ମାଟ୍ରିକ୍ ପରୀକ୍ଷାରୁ 49.9 ପ୍ରତିଶତ ପିଲା ଡ୍ରପ ଆଉଟ୍ ହେଉଛନ୍ତି । ଗୁଜରାଟରେ 28 ପ୍ରତିଶତ । ଜାତୀୟସ୍ତରରେ 20 ପ୍ରତିଶତ । ଓଡ଼ିଶା 100 ବର୍ଷ ପୂରିଲା ବେଳକୁ ବିକାଶ କେତେ ହେବ ନା ନଅଙ୍କ ଦୁର୍ଭିକ୍ଷ ଆଡ଼କୁ ଯିବ ? ଗୁଜରାଟକୁ ହିଞ୍ଜିଳିରୁ କାହିଁକି ଅଧିକ ଲୋକ କାମ କରିବାକୁ ଯାଉଛନ୍ତି ? ମୁଖ୍ୟମନ୍ତ୍ରୀ ଶାସ୍ତ୍ରୀୟ ଭାଷା, ନୃତ୍ୟ ସଙ୍ଗୀତ କଣ ଜାଣିନାହାନ୍ତି । ଯିଏ ଯାହା ଲେଖିଲା କହି ଦେଉଛନ୍ତି ମୁଖ୍ୟମନ୍ତ୍ରୀ ।" ବିଜେଡି ହାତରେ ଓଡ଼ିଶା ଶାସନକୁ ମାଙ୍କଡ ହାତରେ ଶାଳଗ୍ରାମ ବୋଲି ତୁଳନା କରିଛନ୍ତି ଧର୍ମେନ୍ଦ୍ର ।
ସେ ଆହୁରି କହିଛନ୍ତି, "ଓଡ଼ିଶାକୁ ମୁଁ କେବେ ଅପବାଦ ଆଣିନାହିଁ । ରାଜମିସ୍ତ୍ରୀ ହେବି ବୋଲି କହିଲା ବିଜେଡି । ଡାକ ପିଅନ ହେବି ବୋଲି କହିଲେ । ସେଥିପାଇଁ କୃତଜ୍ଞତା ଜଣାଉଛି । କାରଣ ମୁଁ ଡାକ ପିଅନ ହୋଇ ଓଡ଼ିଶାର କଥାକୁ ପ୍ରଧାନମନ୍ତ୍ରୀଙ୍କ ପାଖରେ ପହଞ୍ଚାଇବାକୁ ଗୌରବ ଅନୁଭବ କରେ । ସେହିଭଳି ବିଜେଡି ମୋତେ ରାଜମିସ୍ତ୍ରୀର ଆଖ୍ୟା ଦେଲା, ସେଥିରେ ବି ମୁଁ ଖୁସି । ଆମେ ସବୁ ରାଜମିସ୍ତ୍ରୀ ମିଶି ଓଡ଼ିଶାକୁ ଏକ ନମ୍ବର କରିବୁ । ଓଡିଶା ନିର୍ମାଣରେ ଆମେ ସବୁ ସାମିଲ ହେବା ଉଚିତ । ବିଜେଡି ଏଠି ଗୋଟେ ନେତା ସୃଷ୍ଟି କରିପାରିଲେ ନାହିଁ, ଏଠି ଆଉଟସୋର୍ସରୁ ଆଣି ସରକାର କରିବାକୁ ଯାଉଛନ୍ତି । ୨୫ ବର୍ଷରେ ଗୋଟେ ପୀଢି ପରିବର୍ତ୍ତନ ହେବା କଥା ।" ବିଜେଡିକୁ ୨୫ ବର୍ଷ ଧରି ସୁଯୋଗ ଦେଲେ, ଏଥର ଆମକୁ ସେବା କରିବାକୁ ସୁଯୋଗ ଦିଅନ୍ତୁ ବୋଲି ଧର୍ମେନ୍ଦ୍ର ଓଡ଼ିଶାବାସୀଙ୍କୁ ଅନୁରୋଧ କରିଛନ୍ତି ।"
ଇଟିଭି ଭାରତ, ଭୁବନେଶ୍ବର
