ଭୁବନେଶ୍ବର: ବିଜେପି ଉପରେ ବର୍ଷିବା ସହ ବିଜେଡିର ବୃହତ୍ ବିଜୟ ନେଇ ଆଉଥରେ ଦୃଢୋକ୍ତି କଲେ ଭିକେ ପାଣ୍ଡିଆନ । ''ପ୍ରଥମ ପର୍ଯ୍ୟାୟ ନିର୍ବାଚନରେ ବିଜେଡି କ୍ଲିନ ସ୍ବିପ୍ କରୁଛି । ୨୮ ବିଧାନସଭା ଆସନରୁ ୨୪ ଆସନରେ ଜିତିବ ବିଜେଡି । ଚଳିତ ନିର୍ବାଚନରେ ଚାରିଆଡେ ନବୀନ ପଟ୍ଟନାୟକଙ୍କ ଲହର ଅଛି ।'' ସମ୍ବାଦ ସରବରାହ ସଂସ୍ଥା ଏନଏନଆଇ ସହ ସାକ୍ଷାତକାର ସମୟରେ ଏଭଳି ଦମ୍ଭୋକ୍ତି ଦେଖାଇଛନ୍ତି ବିଜେଡି ନେତା ପାଣ୍ଡିଆନ ।
ଓଡ଼ିଶାରେ ପ୍ରଥମ ପର୍ଯ୍ୟାୟ ନିର୍ବାଚନ ସରିଛି । ପ୍ରଥମ ପର୍ଯ୍ୟାୟରେ ୪ ସଂସଦୀୟ କ୍ଷେତ୍ର ସହ ୨୮ ବିଧାନସଭା ଆସନରେ ମତଦାନ ହୋଇଛି । ଏନେଇ ANIକୁ ସାକ୍ଷାତକାରରେ 5T ଅଧ୍ୟକ୍ଷ ତଥା ବିଜେଡି ନେତା ପାଣ୍ଡିଆନ କହିଛନ୍ତି ଯେ, ଗତ ନିର୍ବାଚନରେ ଏହି ୨୮ ଆସନରୁ ବିଜେଡି ୨୦ ଆସନ ଜିତିଥିଲା । ଏଥର ୨୮ ଆସନରୁ ବିଜେଡି ୨୪ ଆସନ ଜିତିବ । ଆଉ ଦୁଇଟି ଆସନରେ କଂଗ୍ରେସ ଓ ଗୋଟିଏ ଆସନରେ ବିଜେପି ସହ ପ୍ରତଦ୍ବନ୍ଦିତା ହେଉଛି । ରାଜ୍ୟରେ ଏବେ ନବୀନ ଲହର ଅଛି । ୪ଟି ଯାକ ପର୍ଯ୍ୟାୟରେ ବିଜେଡି ସ୍ବିପ୍ କରିବ ।ସେହିପରି ଲୋକସଭା ଆସନରେ ମଧ୍ୟରେ ଦଳ ପୂର୍ବ ତୁଳନାରେ ଭଲ ପ୍ରଦର୍ଶନ କରିବ ।
ଗତକାଲି ରାଜ୍ୟ ବିଜେପିର ସାମ୍ବାଦିକ ସମ୍ମିଳନୀକୁ ସମାଲୋଚନା କରି ପାଣ୍ଡିଆନ ଆହୁରିମଧ୍ୟ କହିଛନ୍ତି ଯେ, ଓଡ଼ିଶାବାସୀ ୫ ଜଣ ବିଜେପି ନେତାଙ୍କ ମୁହଁରୁ ସେମାନଙ୍କ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାମ ଶୁଣିବାକୁ ଅପେକ୍ଷା କରିରହିଛନ୍ତି । ଜଣେ ମହିଳା ବିଜେପିର ମୁଖ୍ୟମନ୍ତ୍ରୀ ଚେହେରା ହେବା ନେଇ ଶୁଣିବାକୁ ମିଳୁଥିଲା । ହେଲେ ସେହି ନେତାଙ୍କ ମଧ୍ୟରେ ଗଣ୍ଡଗୋଳ ହୋଇ ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା ହୋଇପାରିଲା ନାହିଁ । ସେମାନଙ୍କ ରିମୋଟ କଣ୍ଟ୍ରୋଲ ଦିଲ୍ଲୀରେ ହାଇକମାଣ୍ଡଙ୍କ ହାତରେ ଅଛି । ପୂର୍ବରୁ କଂଗ୍ରେସ ସରକାର ଭଳି ଏବେ ଦିଲ୍ଲୀରୁ ବିଜେପି ନିୟନ୍ତ୍ରଣ ହେଉଛି । ଯଦି ସେମାନେ ପ୍ରକୃତରେ ଓଡ଼ିଶାରେ କିଛି କରିବାକୁ ଚାହୁଁଛନ୍ତି, ତାହେଲେ ସେମାନଙ୍କୁ ପ୍ରଥମେ କଂଗ୍ରେସ ଭଳି ମାନସିକତା ଛାଡିବାକୁ ହେବ ବୋଲି କଟାକ୍ଷ କରି କହିଛନ୍ତି ପାଣ୍ଡିଆନ ।
ଇଟିଭି ଭାରତ, ଭୁବନେଶ୍ବର
