ଭୁବନେଶ୍ବର: ନିର୍ବାଚନରେ ବିଜେଡି ବଡ଼ ବିପର୍ଯ୍ୟୟର ସମ୍ମୁଖୀନ ହେବା ପରେ ଶଙ୍ଖ ଭବନରେ ବସୁଛି ବଡ଼ ବୈଠକ । ସେପ୍ଟେମ୍ବର ୨୭ ତାରିଖରେ ବିଜେଡିର ଗୁରୁତ୍ୱପୂର୍ଣ୍ଣ ବୈଠକ ବସିବ । କାର୍ଯ୍ୟକ୍ରମରେ ସାମିଲ ହେବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଅକ୍ଟୋବର ୨ରୁ ପଦଯାତ୍ରା, ରାଜ୍ୟ କମିଟି ଗଠନ, ନିର୍ବାଚନ ପରାଜୟ କାରଣ ଖୋଜା ଓ ସାଂଗଠନିକ କାର୍ଯ୍ୟକ୍ରମ ନେଇ ହେବ ଆଲୋଚନା । ଶଙ୍ଖ ଭବନରେ ହେବାକୁ ଥିବା ବୈଠକରେ ଫୋକ୍ସରେ ରହିବ ନିର୍ବାଚନ ପରାଜୟ କାରଣ ଖୋଜା କମିଟି ଚୟନ । ସୂଚନା ଦେଲେ ବିଜେଡିର ସମନ୍ୱୟ କମିଟି ଅଧ୍ୟକ୍ଷ ଦେବୀ ପ୍ରସାଦ ମିଶ୍ର ।
ବିଜେଡି ଗୁରୁତ୍ୱପୂର୍ଣ୍ଣ ବୈଠକ:
ବିଜେଡିର ସମନ୍ୱୟ କମିଟି ଅଧ୍ୟକ୍ଷ ଦେବୀ ପ୍ରସାଦ ମିଶ୍ର କହିଛନ୍ତି, "ଜିଲ୍ଲାର ସଂଗଠନ କର୍ମକର୍ତ୍ତାଙ୍କ ସହ ବିଜେଡି ସଭାପତି ନବୀନ ପଟ୍ଟନାୟକଙ୍କ ବୈଠକ ଜାରି ରହିଛି । ପ୍ରାୟ ୨୦ ଜିଲ୍ଲାର ବୈଠକ ଶେଷ ହୋଇଛି । ଏହାପରେ ଦଳର ପଦଯାତ୍ରା କାର୍ଯ୍ୟକ୍ରମ ରହିଛି । ସେହିପରି ଦଳର ସଦସ୍ୟ ସଂଗ୍ରହ ଅଭିଯାନ ମଧ୍ୟ ହେବ । ସେ ନେଇ ଦିନେ ଦୁଇ ଦିନ ମଧ୍ୟରେ ନିଷ୍ପତ୍ତି ନିଆଯିବ । ୨୭ ତାରିଖରେ ଶଙ୍ଖ ଭବନରେ ଏନେଇ ଏକ ଗୁରୁତ୍ୱପୂର୍ଣ୍ଣ ବୈଠକ ଡକାଯାଇଛି । ଏହା ପରେ ନିର୍ବାଚନ ପ୍ରକ୍ରିୟା ରହିଛି । କର୍ମକର୍ତ୍ତାଙ୍କ ତାଲିକା ବାବଦରେ ଦଳର ସଭାପତି ନିଷ୍ପତ୍ତି ନେବେ । ବୈଠକରେ ଏ ସବୁ ନିଷ୍ପତ୍ତି ନିଆଯିବ ।"
ମେଣ୍ଟ ଚର୍ଚ୍ଚା ଅତୀତ:
ଦେବୀ ମିଶ୍ର ଆହୁରି କହିଛନ୍ତି, "ବିଜେଡି ନବୀନ ବାବୁଙ୍କ ନେତୃତ୍ୱରେ ବିରୋଧୀ ଦଳରେ ଅଛି । ଯେତିକି ଭୋଟ ମିଳିଛି, ସେ ଅନୁସାରେ ବିଜେଡ଼ି ୧ ନମ୍ବର ଦଳ । ଲୋକଙ୍କ ହୃଦୟର ନେତା ହେଉଛନ୍ତି ନବୀନ ବାବୁ । ପ୍ରଥମ ୩ ମାସ ପରି ରାଜନୈତିକ ବୟାନବାଜି ଚାଲିବ । ଲୋକେ ଏବେ ସବୁ କଥା ଅନୁଭବ କରୁଛନ୍ତି । ବିଜେପି ନେତା ବି ଅନୁଭବ କରୁଥିବେ । ଓଡ଼ିଶାର ଉନ୍ନତି କରନ୍ତୁ, ସେ ବାବଦରେ କେହି ମନା କରୁନାହାନ୍ତି । ମେଣ୍ଟ ଚର୍ଚ୍ଚା ଅତୀତ ହୋଇସାରିଛି । ସମସ୍ତେ ଅଲଗା ଅଲଗା ନିର୍ବାଚନ ଲଢ଼ିଛନ୍ତି ।"
କିଛି ଲୋକ ଏପାଖ ସେପାଖ ହେବେ:
ଦେବୀ ଏହା ମଧ୍ୟ କହିଛନ୍ତି, "ବିଜେପି ନେତା ବି ଆମ ସହିତ ସମ୍ପର୍କରେ ଥିବା ଜଣେ ସାଂସଦ କହିଥିଲେ । କିଏ କେତେବେଳେ କାହା ସହିତ ଯୋଗାଯୋଗ କରୁଥିବେ । ମୋ ସହିତ କେହି କଥା ହୋଇନାହାନ୍ତି । ଅନ୍ୟମାନଙ୍କ ସହିତ କଥା ହୋଇଥିବେ । ସାଙ୍ଗରେ ସେମାନେ ବିଭିନ୍ନ ସ୍ଥାନରେ ବସୁଛନ୍ତି । ବିଭିନ୍ନ ଲୋକ ଭିନ୍ନ ଭିନ୍ନ ବିଚାରଧାରରେ ହୋଇଥିବେ । କିଛି ଲୋକ ଏପାଖ ସେପାଖ ହେବେ । ରାଜନୀତିରେ ସବୁ ସମ୍ଭବ ।"
ଇଟିଭି ଭାରତ, ଭୁବନେଶ୍ବର
