ପଦାରେ ପଡୁଛି BJD କଳି; ‘ବାସ୍ତବତା ନବୁଝି ଅପରିପକ୍ୱ ନେତା ଦେଉଛନ୍ତି ଅରୁଚିକର ମନ୍ତବ୍ୟ’

ବାସ୍ତବତା ନବୁଝି ଅପରିପକ୍ୱ ନେତା ଅରୁଚିକର ମନ୍ତବ୍ୟ ଦେଉଥିବା ଅମର କହିଛନ୍ତି । ଆଗକୁ ବିଜେଡିରେ ଆହୁରି ଅନେକ କଥା ଘଟିବାକୁ ଯାଉଛି ସେ କହିଛନ୍ତି ।

ଭୁବନେଶ୍ୱର: ବିଜେଡିରେ ଅମର ବିସ୍ଫୋରଣ ଜାରି ରହିଛି । ଲଗାତାର ଭାବେ ଅମର ବିଜେଡି ବିରୋଧରେ ବିଷୋଦଗାର କରିଚାଲିଛନ୍ତି । ବାସ୍ତବତା ନବୁଝି ଅପରିପକ୍ୱ ନେତା ଅରୁଚିକର ମନ୍ତବ୍ୟ ଦେଉଥିବା ଅମର କହିଛନ୍ତି । ଆଗକୁ ବିଜେଡିରେ ଆହୁରି ଅନେକ କଥା ଘଟିବାକୁ ଯାଉଛି ବୋଲି ସେ ଆକଳନ କରିଛନ୍ତି । ସେପଟେ ଜବାବ ରଖିଛନ୍ତି ବିଜେଡି ମୁଖପାତ୍ର ଲେନିନ ମହାନ୍ତି ।

ବିଜେଡ଼ିରେ ଜାରି ରହିଛି ଅମର ବିସ୍ଫୋରଣ-

ପ୍ରତ୍ୟେକ ଦିନ ବିଜେଡିକୁ ଟାର୍ଗେଟ କରୁଛନ୍ତି ଅମର । ଅମରଙ୍କ ମନ୍ତବ୍ୟର କାଉଣ୍ଟର କରୁଛନ୍ତି ଏକାଧିକ ବିଜେଡି ନେତା । ବିଜେଡିର ଜଣେ ପରେ ଜଣେ ନେତାଙ୍କ କାଉଣ୍ଟରକୁ ଅପରିପକ୍ୱ କହିଛନ୍ତି ଅମର । ଆଜି ପ୍ରତିକ୍ରିୟା ରଖି ଅମର କହିଛନ୍ତି, "ଏଭଳି ଅରୁଚିକର ଅପରିପକ୍ୱ ମନ୍ତବ୍ୟ ଯେଉଁମାନେ ଦେଉଛନ୍ତି ସେମାନଙ୍କ ପ୍ରତି ମୋର ଦୟା ଆସୁଛି । ଯେଉଁମାନେ ବିଜୁ ଜନତା ଦଳ ଗଠନରେ ନଥିଲେ ସେମାନେ ବର୍ତ୍ତମାନ ଆସି କ୍ୟାମେରା ସାମ୍ନାରେ ବହୁତ କଥା କହୁଛନ୍ତି । ଏଭଳି ବୟାନବାଜି ହିଁ କହୁଛି ବିଜେଡି ବର୍ତ୍ତମାନ ବାସ୍ତବତାଠୁ କେତେ ଦୂରରେ ରହିଛି । ମୋତେ ଦୁଃଖ ଲାଗୁଛି ବୟାନ ବାଜି କରୁଥିବା ନେତା ମାନେ ବାସ୍ତବତାକୁ ବୁଝିବାକୁ ଚାହୁଁ ନାହାନ୍ତି ।"

ଅମର ଆହୁରି ମଧ୍ୟ କହିଛନ୍ତି, "ବୟାନବାଜି କରୁଥିବା ନେତା ମାନେ ମୋ ମୂଳ ପ୍ରଶ୍ନରେ ଉତ୍ତର ଦେଉ ନାହାନ୍ତି । ଦଳର ପରାଜୟ କାହିଁକି ହେଲା ଏବଂ ଗୋଲମାଳିଆ ସ୍ଥିତି ପାଇଁ କିଏ ଦାୟୀ ରାଜ୍ୟ ସଭାପତି ସେ ବିଷୟରେ ଉତ୍ତର ଦେବା ଦରକାର ବୋଲି ମୁଁ କହିଥିଲି । ରାଜ୍ୟ ସଭାପତି ବର୍ତ୍ତମାନ ସୁଦ୍ଧା ମୁହଁ ଖୋଲି ନାହାନ୍ତି । କିନ୍ତୁ ଯେଉଁମାନେ ତାଙ୍କ ତରଫରୁ କହୁଛନ୍ତି ସେମାନଙ୍କ ପ୍ରଚ୍ଛଦପଟରେ କିଏ ଅଛି ସାମ୍ନା ପଟରେ କିଏ ଅଛି ତାହା କହିବାକୁ ଚାହୁଁନି । ମାତ୍ର ଦଳର ପ୍ରଭୁତ କ୍ଷତି ସେହିମାନେ ହିଁ କରୁଛନ୍ତି ।"

ସେ ଏହା ମଧ୍ୟ କହିଛନ୍ତି, "ଦଳରେ ସଂସ୍କାର ଆଣିବା ଲାଗି ସ୍ଥିତିରେ ସୁଧାର ଆଣିବା ଲାଗି କହିଥିଲି । କିନ୍ତୁ ତାକୁ ଭୁଲ ବାଟରେ ନେଇ ଅଣ ନିଶ୍ୱାସୀ ଥିବା କଥା କୁହାଗଲା । ଯିଏ ଅଣନିଶ୍ୱାସୀ ଶବ୍ଦଟି ଲଗେଇଛନ୍ତି ସେ କେତେ ଅମ୍ଳଜାନ କି ଅଙ୍ଗାରକାମ୍ଳ ପାଉଛନ୍ତି ଜାଣିନି । ଦଳରେ ପୁଞ୍ଜିଭୂତ ଅସନ୍ତୋଷ ଥିଲା । କିନ୍ତୁ କେହି କହୁ ନଥିଲେ । ମୁଁ ମୁହାଁ ଖୋଲିବା ଆରମ୍ଭ କରିବା ପରେ ଧୀରେ ଧୀରେ ବାସ୍ତବତାକୁ ବୁଝୁଥିବା ନେତା ମାନେ ସମସ୍ତେ କହିବା ଆରମ୍ଭ କରିଛନ୍ତି । ଆଗକୁ ବିଜେଡିରେ ଆହୁରି ଅନେକ କଥା ଘଟିବାକୁ ଯାଉଛି । ଦୁଇ ଜଣ ରାଜ୍ୟସଭା ସାଂସଦ ପରେ ଅନ୍ୟ ମାନେ ମଧ୍ୟ ସେହି ଲାଇନରେ ଅଛନ୍ତି । ସେମାନେ ହୁଏତ ଛାଡି ପାରନ୍ତି !"

ବିଜେଡି ମୁଖପାତ୍ର ଲେନିନ ମହାନ୍ତି କହିଛନ୍ତି, "ଅମର ଏକାଧିକ ମନ୍ତବ୍ୟ ଦେଉଛନ୍ତି । ଦୁଇଟି ଗୋଡ଼ ଭିନ୍ନ ଭିନ୍ନ ସ୍ଥାନରେ ରଖିଛନ୍ତି । ଗୋଟେ ଗୋଡ଼ ନୂଆ ଘର ଆଡ଼କୁ ଯାଉଛି । ଅମର ଦ୍ବନ୍ଦ୍ୱରେ ଅଛନ୍ତି । ଜୁଆଡ଼େ ଯିବାକୁ ଚାହୁଁଛନ୍ତି ଯାଆନ୍ତୁ । ଜ୍ଞାନୀ ଗୁଣୀ ବ୍ୟକ୍ତି ହୋଇ ଯେଉଁ ଘରେ ବସି ସେହି ଘରକୁ କଣା କରିବା ଗ୍ରହଣୀୟ ନୁହେଁ ।"