ଭୁବନେଶ୍ବର: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସାମ୍ବାଦିକ ସମ୍ମିଳନୀର ଜବାବ ରଖିଛି ବିଜେଡି । ଧର୍ମେନ୍ଦ୍ର କହିଥିବା ଓଡ଼ିଆ ଅସ୍ମିତାର କଥାକୁ ଦଳ କାଉଣ୍ଟର କରିଛି । ନିର୍ବାଚନରେ ଫାଇଦା ପାଇଁ ଧର୍ମେନ୍ଦ୍ର ଓଡ଼ିଆ ଅସ୍ମିତା କଥା ଉଠାଇଛନ୍ତି । କିନ୍ତୁ ଓଡ଼ିଆଙ୍କ ଅସ୍ମିତାର ସହ ଜଡି଼ତ ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ବନ୍ଦ କରିବାକୁ ଧର୍ମେନ୍ଦ୍ର ଯୋଜନା କରିଥିଲେ ବୋଲି ବିଜେଡି ଅଭିଯୋଗ ଆଣିଛନ୍ତି । ସାମ୍ବାଦିକ ସମ୍ମିଳନୀ କରି ଧର୍ମେନ୍ଦ୍ରଙ୍କୁ ଟାର୍ଗେଟ କରିଛନ୍ତି ରାଜ୍ୟସଭା ସାଂସଦ ସୁଲତା ଦେଓ ଓ ଲେନିନ ମହାନ୍ତି । ରାଜ୍ୟସଭା ସାଂସଦ ସୁଲତା ଦେଓ କହିଛନ୍ତି, "ଠାକୁର ଘରେ କିଏ ନା ମୁଁ କଦଳୀ ଖାଇନି । ଏହି ଉକ୍ତିକୁ ସାର୍ଥକ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଗତକାଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ସାମ୍ବାଦିକ ସମ୍ମିଳନୀ କରିଥିଲେ । ସାମ୍ବାଦିକ ସମ୍ମିଳନୀରୁ ଗୋଟିଏ କଥା ସ୍ପଷ୍ଟ ହୋଇଛି ଯେ, ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ବନ୍ଦ କରିବା ଲାଗି କେନ୍ଦ୍ରମନ୍ତ୍ରୀ ଚେଷ୍ଟା କରିଥିଲେ । ଶ୍ରୀମନ୍ଦିର ପ୍ରକଳ୍ପ ବନ୍ଦ କରିବାର ଧର୍ମେନ୍ଦ୍ରଙ୍କ ମୂଳ ଉଦ୍ଦେଶ୍ୟ ଜନସାଧାରଣଙ୍କ ସାମନାକୁ ଆସିଯାଇଛି । ପରିକ୍ରମା ପ୍ରକଳ୍ପ ସଫଳତାର ସହ ସମାପନ ହେଉ ବୋଲି ସେ ଚାହୁଁନଥିଲେ । ଧର୍ମେନ୍ଦ୍ରଙ୍କ ମନରେ କେତେ କ୍ରୋଧ ଅଛି ଗତକାଲି ସାମ୍ବାଦିକ ସମ୍ମିଳନୀରୁ ପଦାରେ ପଡ଼ିଯାଇଛି ।"
ସେ ଆହୁରି ମଧ୍ୟ କହିଛନ୍ତି, "ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଖାନା ପାଇଁ ହେବ ବୋଲି ସେ କହିଲେ । ଏହା କୋଟି କୋଟି ଓଡ଼ିଆ ନୁହଁନ୍ତି, ସାରା ବିଶ୍ଵର ଜଗନ୍ନାଥପ୍ରେମୀଙ୍କୁ ଆଘାତ ଦେଇଥିଲା । ଧର୍ମେନ୍ଦ୍ର କହିଲେ ପରିକ୍ରମା ପ୍ରକଳ୍ପ ନାଁ'ରେ ଟାଇଲ ଲଗାଯାଇଛି । ଏଭଳି ବକ୍ତବ୍ୟ ଶୁଣି ଓଡ଼ିଶାବାସୀ ଆଶ୍ଚର୍ଯ୍ୟ ଓ ଆଚମ୍ବିତ ହୋଇଛନ୍ତି । କେତେବେଳେ କଣ କହୁଛନ୍ତି ସେ କଥା ସେ ନିଜେ ବୁଝି ପାରୁ ନହାନ୍ତି । ସବୁ ଦଳର ପ୍ରାର୍ଥୀ ଜଗନ୍ନାଥଙ୍କ ଆଶୀର୍ବାଦ ନେବାକୁ ପୁରୀ ଯାଉଛନ୍ତି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଜଗନ୍ନାଥଙ୍କ ପାଖକୁ ଯାଇଥିଲେ । ଜଗନ୍ନାଥଙ୍କ ଆଶିଷ ଭିକ୍ଷା ମଧ୍ୟ କରିଛନ୍ତି । ସେ ଆଉ ଥରେ ଜଗନ୍ନାଥଙ୍କ ପାଖକୁ ଯାଆନ୍ତୁ ବୋଲି ଅନୁରୋଧ କରୁଛି । ଭଲ ଓ ସ୍ୱଚ୍ଛ ମନରେ ଜଗନ୍ନାଥଙ୍କ ପାଖକୁ ଯାଆନ୍ତୁ ।"
ସେହିପରି ବିଜେଡି ମୁଖପାତ୍ର ଲେନିନ ମହାନ୍ତି କହିଛନ୍ତି , "ଆମେ ଶୁଣୁଥିଲୁ ଧର୍ମେନ୍ଦ୍ର ପ୍ରଧାନଙ୍କୁ ଲୋକେ ମିଛୁଆ କହୁଥିଲେ । କିନ୍ତୁ ଗତକାଲି ସାମ୍ବାଦିକ ସମ୍ମିଳନୀ ପରେ ତାଙ୍କୁ ଲୋକେ ସୁପର ମିଛୁଆ କହୁଛନ୍ତି । ଜଗନ୍ନାଥ ହେଉଛନ୍ତି କୋଟି ହୃଦୟରେ ବାସ କରୁଥିବା ପ୍ରଭୁ । ଗତ ଶହେ ବର୍ଷ ମଧ୍ୟରେ ଶ୍ରୀମନ୍ଦିରର ବିକାଶ କାର୍ଯ୍ୟର ପରିକଳ୍ପନା କରାଯାଇନଥିଲା । ସହ୍ୟ କରିପାରୁନଥିବାରୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ଗୌଣ କାରିବାକୁ ଚେଷ୍ଟା କରୁଛନ୍ତି ଧର୍ମେନ୍ଦ୍ର । ନିର୍ବାଚନ ରଣାଙ୍ଗନରେ ଧର୍ମେନ୍ଦ୍ର ଓଡ଼ିଆ ଅସ୍ମିତା କଥା କହିଛନ୍ତି । ଗଣତନ୍ତ୍ର ମନ୍ଦିରରେ ପ୍ରକଳ୍ପ ବାବଦରେ କହିବାକୁ ମିଳିଥିବା ସୁଯୋଗରେ ସେ କହିଥିଲେ କେବଳ ଗୋଟିଏ ପାଇଖାନା ହେବା ଲାଗି ଏପରି ହୋଇଛି ।"
ସେ ଆହୁରି ମଧ୍ୟ କହିଛନ୍ତି, "ଶ୍ରୀମନ୍ଦିର ଆସୁଥିବା ଲୋକଙ୍କ ସୁବିଧା କରିବା ପାଇଁ ରେଷ୍ଟ ରୁମ, କ୍ଳକ ରୁମ ହେଲେ କ'ଣ ଧର୍ମେନ୍ଦ୍ରଙ୍କୁ ବାଧୁଛି କି ? କୋଟି ଓଡ଼ିଆଙ୍କ ହୃଦୟରେ ଥିବା କଥାକୁ ନିନ୍ଦିବା ଧର୍ମେନ୍ଦ୍ରଙ୍କ ଅସ୍ମିତା । ଜଗନ୍ନାଥଙ୍କୁ ନେଇ ଏଭଳି ନୀଚ ମନ୍ତବ୍ୟ ଦେବା ଆମର ଅସ୍ମିତା ନୁହେଁ । ଧର୍ମେନ୍ଦ୍ରଙ୍କ ତୁଣ୍ଡ ଆଉ ତାଙ୍କ ବୋଲ ମାନୁନାହିଁ । ସେ ଓଡି଼ଶା ପାଇଁ କ'ଣ କରିଛନ୍ତି ସେ ବାବଦରେ ପଦେ କହୁନାହାନ୍ତି । ନିର୍ବାଚନରେ ଫାଇଦା ପାଇବା ପାଇଁ ସେ କହୁଛନ୍ତି । ଯେଉଁ ସେବାୟତ ମାନେ ନିଜ ସ୍ଥାନ ପ୍ରକଳ୍ପ ପାଇଁ ଛାଡିଛନ୍ତି ସେମାନଙ୍କୁ କେମିତି ଲାଗିବ ? ଧର୍ମେନ୍ଦ୍ର ଯଦି କହି ଖସି ଯିବେ ବୋଲି ଭାବୁଥିବେ, ତାହା ସମ୍ଭବ ନୁହେଁ । ଓଡ଼ିଆ ଲୋକ ଏହା ଉପରେ ତୀକ୍ଷଣ ନଜର ରଖିଛନ୍ତି ।"
ଇଟିଭି ଭାରତ, ଭୁବନେଶ୍ବର
