ଭୁବନେଶ୍ବର: ରାଜ୍ୟରେ ଜାରି ରହିଥିବା ନିର୍ବାଚନୀ ମାହୋଲ ମଧ୍ୟରେ ବିଭିନ୍ନ ପ୍ରସଙ୍ଗରେ ବିରୋଧୀ ଶାସକ ଦଳକୁ ଟାର୍ଗେଟ କରୁଛନ୍ତି । ଏହାରି ମଧ୍ୟରେ ଏକ ପ୍ରମୁଖ ମୁଦ୍ଦା ହୋଇଛି ବିଜୁଳି ପ୍ରସଙ୍ଗ । ଓଡ଼ିଶାରୁ ଉତ୍ପାଦିତ ବିଜୁଳି ବାହାର ରାଜ୍ୟ ଅପେକ୍ଷା ଓଡ଼ିଶାରେ ଅଧିକ ଟଙ୍କାରେ ଉପଭୋକ୍ତାଙ୍କୁ ମିଳୁଛି ବୋଲି କହି ବିରୋଧା ବାରମ୍ବାର ଶାସକ ଦଳକୁ ଟାର୍ଗେଟ କରୁଛନ୍ତି । ଏହି ପ୍ରସଙ୍ଗରେ ସ୍ପଷ୍ଟୋକ୍ତି ରଖିଛି ବିଜେଡି । ବିଜେଡି ରାଷ୍ଟ୍ରୀୟ ମୁଖପାତ୍ର ସଂତୃପ୍ତ ମିଶ୍ର ଏନେଇ ସାମ୍ବାଦିକ ସମ୍ମିଳନୀ କରିଛନ୍ତି । ନିର୍ବାଚନ ସମୟରେ ରାଜ୍ୟର ପାୱାର ସେକ୍ଟରକୁ ନେଇ ବିରୋଧୀ ବିଭିନ୍ନ ପ୍ରକାର ଭୁଲ ତଥ୍ୟ ଓ ଭୁଲ କଥାକହି ଲୋକଙ୍କୁ ଭ୍ରାନ୍ତରେ ପକାଇବାକୁ ଚାହୁଁଛନ୍ତି ବୋଲି ସେ କହିଛନ୍ତି । ସେଥିପାଇ ସ୍ପଷ୍ଟୀକରଣ ଆବଶ୍ୟକତା ରହିଥିବା କହିଛନ୍ତି ସଂତୃପ୍ତ ।
ସେ କହିଛନ୍ତି, "ବିକାଶଶୀଳ ଦେଶରେ ପାୱାର ସେକ୍ଟରର ଚାହିଦା ବଢ଼ିଥାଏ । ଏହି କ୍ରମରେ ଓଡ଼ିଶାରେ ଏନର୍ଜି ବା ଶକ୍ତିର ଚାହିଦା ବଢ଼ିଛି । ଏହାସହ ଲୋକଙ୍କର ଜୀବନଶୈଳୀ ମଧ୍ୟ ବଦଳିଛି । ତେଣୁ ଯେଉଁଠି ଏନର୍ଜି ବା ଶକ୍ତିର ଚାହିଦା ବଢିଥାଏ, ସେହି ରାଷ୍ଟ୍ରର ବିକାଶ ହେଉଛି ବୋଲି କହିପାରିବା ବା ଏହା ଆମ ରାଜ୍ୟର ବିକାଶର ସୂଚକାଙ୍କ । ମେକ୍ ଇନ୍ ଓଡିଶା ଓ ବିଭିନ୍ନ କାର୍ଯ୍ୟକ୍ରମ ଶିଳ୍ପାୟନକୁ ନେଇ ରାଜ୍ୟରେ ପାୱାରର ଚାହିଦା ବଢ଼ିଛି । ଯେହେତୁ ବିଜୁ ଜନତା ଦଳ ଏଥର ନିର୍ବାଚନରେ ଶହେ ୟୁନିଟ ମାଗଣା କଥା ମୁଖ୍ୟମନ୍ତ୍ରୀ ଘୋଷଣା କରିଛନ୍ତି, ଏହା ବିରୋଧୀଙ୍କୁ ଅଡ଼ୁଆରେ ପକାଇଦେଇଛି । ଓଡ଼ିଶାର ଜନସାଧାରଣ ଏହାକୁ ହୃଦୟର ସହିତ ଗ୍ରହଣ କରିଛନ୍ତି । ୯୦ ପ୍ରତିଶତ ରାଜ୍ୟର ଲୋକେ ଏଥିରେ ଲାଭ ପାଇବେ। ଆଉ ଏହା ଚଳିତ ନିର୍ବାଚନରେ ପ୍ରଭାବ ପକାଇବ । କାରଣ ଏହା ରାଜ୍ୟବାସୀଙ୍କ ପାଇଁ ଏକ ଜରୁରୀ ଯୋଜନା । ଏଥିପାଇଁ ଅନେକ ସମୟରେ ବିରୋଧୀ ଦଳ, ନେତା ଏବଂ କେନ୍ଦ୍ରମନ୍ତ୍ରୀଙ୍କ ପକ୍ଷରୁ ଭ୍ରମ ସୃଷ୍ଟି କରାଯାଉଛି । ତେଣୁ ଏହି କଥାକୁ ସ୍ପଷ୍ଟ କରିବା ପାଇଁ ଗୋଟିଏ ମିଛ କୁହାଯାଉଛି ଯେ, ଓଡ଼ିଶାରେ ଯାହା ପାୱାର ଉତ୍ପାଦନ ହେଉଛି ତାହା ଅନ୍ୟ ରାଜ୍ୟକୁ ଦିଆଯାଉଛି, ହେଲେ ଓଡ଼ିଶା ଲୋକଙ୍କୁ ମିଳୁନି । ଆଉ ଗୋଟିଏ କଥା କୁହାଯାଉଛି ଯେଉଁ ରାଜ୍ୟକୁ ଓଡ଼ିଶା ବିଜୁଳି ବିକୁଛି, ସେଠାରେ ଦର କମ ରହୁଛି, ହେଲେ ଓଡ଼ିଶାରେ ଅଧିକ । ଆଉ ଅନ୍ୟ ରାଜ୍ୟରେ ବିଦ୍ୟୁତ ଉପଭୋକ୍ତାମାନେ ବିଜୁଳି ଦର କମରେ ପାଉଥିବାବେଳେ ଓଡ଼ିଶାରେ ଅଧିକ ।" ଏହି ୩ଟି ଯାକ ତଥ୍ୟକୁ ମିଥ୍ୟା ବୋଲି କହିଛନ୍ତି ବିଜେଡି ରାଷ୍ଟ୍ରୀୟ ମୁଖପାତ୍ର ସଂତୃପ୍ତ ମିଶ୍ର ।
ତେଣୁ ବିଦ୍ୟୁତ ବା ଇଲେକ୍ଟ୍ରିସିଟିକୁ ନେଇ ବିଜେଡିର ମତ ରଖି ସେ କହିଛନ୍ତି, "ଭାରତ ବର୍ଷରେ ତିନି ପ୍ରକାରର ବିଜୁଳି ଉତ୍ପାଦନ ହୋଇଥାଏ । କ୍ୟାପଟିଭ ପାୱାର ପ୍ରଡ୍ୟୁସର, ଇଣ୍ଡିପେଣ୍ଡେଣ୍ଟ୍ ପାୱାର ପ୍ରଡ୍ୟୁସର, ତୃତୀୟ ହେଉଛି ଏନ୍ଟିପିସି ଭଳି କେନ୍ଦ୍ରୀୟ ସରକାରୀ ସଂସ୍ଥା ଯେଉଁ ବିଦ୍ୟୁତ ଉତ୍ପାଦନ କରିଥାନ୍ତି । ଓଡ଼ିଶା ସରକାର ପାୱାର ଉତ୍ପାଦନ କରି ବିକୁନାହାନ୍ତି । ଯେଉଁ ତଥ୍ୟ ଆମ ବିରୋଧୀ ଦେଉଛନ୍ତି, ସେମାନେ ଏନ୍ଟିପିସି ଏବଂ ଲିଗ୍ନାଇଡ୍ ଦ୍ବାରା ଉତ୍ପାଦିତ ପାୱାର ବିଷୟରେ କହୁଛନ୍ତି । ଆଉ ଏହି ଦୁଇ ସଂସ୍ଥା ଦ୍ବାରା ଉତ୍ପାଦିତ ଶକ୍ତି ବା ବିଦ୍ୟୁତ କେଉଁ ରାଜ୍ୟକୁ କେତେ ଯିବ, ତାହା କେନ୍ଦ୍ର ଶକ୍ତି ମନ୍ତ୍ରଣାଳୟ ସ୍ଥିର କରିଥାଏ, ଓଡ଼ିଶା ସରକାର ନୁହେଁ । କେଉଁ ଦରରେ ବିକିବେ, ସେଣ୍ଟ୍ରାଲ ଇଲେକ୍ଟ୍ରିସିଟି ରେଗୁଲେଟରି କମିଶନ ଧାର୍ଯ୍ୟ କରିଥାନ୍ତି । ସେହି ଅନୁସାରେ ରାଜ୍ୟ ବିଦ୍ୟୁତ୍ ଆୟୋଗ ଦର ଧାର୍ଯ୍ୟ କରିଥାନ୍ତି । ଏଥିରେ ଓଡ଼ିଶା ସରକାରଙ୍କର କିଛି ଭୂମିକା ନାହିଁ । ଖାଲି ସେତିକି ନୁହେଁ, ବିଦ୍ୟୁତ ଦର କେଉଁ ରାଜ୍ୟରେ କଣ ରହିବ ତାହା ମଧ୍ୟ ସେଣ୍ଟ୍ରାଲ ରେଗୁଲେଟିଂ କମିଟି ନିଷ୍ପତ୍ତି ନିଏ । ତେଣୁ ଯଦି କିଏ କହୁଛନ୍ତି ଓଡିଶା ବିଦ୍ୟୁତ ଅନ୍ୟ ରାଜ୍ୟକୁ ବିକ୍ରି କରୁଛି, ତାହା ସମ୍ପୂର୍ଣ୍ଣ ମିଥ୍ୟା ।"
ଅନ୍ୟପଟେ ଓଡ଼ିଶାରେ ବିଦ୍ୟୁତ ଉପଭୋକ୍ତା ଅଧିକ ଦରରେ ବିଦ୍ୟୁତ ବ୍ୟବହାର କରୁଥିବା ଅଭିଯୋଗକୁ ଖଣ୍ଡନ କରିବା ସହ ବିଜେପି ଶାସିତ ରାଜ୍ୟର ତାଲିକା ମଧ୍ୟ ଉପସ୍ଥାପିତ କରିଛି ବିଜେଡି । ସଂତୃପ୍ତ କହିଛନ୍ତି, "ଓଡ଼ିଶାରେ ୪ ଟଙ୍କା ୬୨ ପଇସାରେ ଉପଭୋକ୍ତା ବିଦ୍ୟୁତ ବ୍ୟବହାର କରୁଥିବାବେଳେ ଏହି କ୍ରମରେ ମଧ୍ୟପ୍ରଦେଶ ୫ ଟଙ୍କା ୭୩ ପଇସା, ଆସାମରେ ୭ ଟଙ୍କା ୮୦ ପଇସା ରାଜସ୍ଥାନରେ ୮ ଟଙ୍କା ୮୦ ପଇସା, ବିହାରରେ ୯ ଟଙ୍କା ୯୦ ପଇସା, ମହାରାଷ୍ଟ୍ରରେ ୬ ଟଙ୍କା ୭୪ ପଇସା, ଉତ୍ତରପ୍ରଦେଶରେ ୯ ଟଙ୍କା ୮୦ ପଇସା ରହିଛି । ଏହି ଗଣିତକୁ ବୁଝିଲେ ସବୁଠାରୁ କମ ଦରରେ ଓଡିଶା ବିଦ୍ୟୁତ ଯୋଗାଉଛି । ଆମେ ଭାରତର ଏକ ଅଂଶ ହୋଇଥିବାବେଳେ ସବୁବେଳେ ବିଦ୍ୟୁତ କ୍ଷେତ୍ରରେ ଆମର ଆବଶ୍ୟକତା ପାଇଁ କେନ୍ଦ୍ରକୁ ସହାୟତା ମାଗିଛୁ, ଆଉ ଆମର ସହଯୋଗିତା ମଧ୍ୟ ଦେଉଛୁ । ଯଦିଓ ବିଦ୍ୟୁତ ଉତ୍ପାଦନ କମ୍ପାନୀମାନେ ଆମ ରାଜ୍ୟର ପିଲାଙ୍କୁ ଅଗ୍ରାଧିକାର ଦିଅନ୍ତି ନାହିଁ, ତଥାପି ଶକ୍ତି କ୍ଷେତ୍ରରେ ଓଡ଼ିଶାର ଅଭିମୁଖ୍ୟ ପ୍ରଗତିଶୀଳ ରହିଛି । ଆମେ କେନ୍ଦ୍ର ସରକାରଙ୍କ ସହ କାମ କରୁଛୁ, ଓଡିଶା ପାଇଁ ଲଢ଼ୁଛୁ । ସେଥିପାଇଁ ଆମେ କହୁଛୁ ଯେ, ନିର୍ବାଚନ ପରିପ୍ରେକ୍ଷୀରେ ଏହି ପ୍ରସଙ୍ଗରେ କିଛି କଥା କହିବା ଠିକ୍ ନୁହେଁ । ଏଥିପାଇଁ ଯେ ବିଦ୍ୟୁତର ଜଟିଳ ଗଣିତକୁ ବିରୋଧୀ ବୋଧହୁଏ ବୁଝିନାହାନ୍ତି ।" ଯଦି ବୁଝିଛନ୍ତି, ତାହେଲେ ଜାଣିଶୁଣି ସତ କହୁନାହାନ୍ତି ବୋଲି କହିଛନ୍ତି ବିଜେଡି ରାଷ୍ଟ୍ରୀୟ ମୁଖପାତ୍ର ସଂତୃପ୍ତ ମିଶ୍ର ।
ଇଟିଭି ଭାରତ, ଭୁବନେଶ୍ବର
