ନିଆଳି: ସାଧାରଣ ନିର୍ବାଚନକୁ ନେଇ ନିଆଳି ବିଧାନସଭା କ୍ଷେତ୍ରରେ ଭରିଲାଣି ନିର୍ବାଚନୀ ତାତି । ବିଭିନ୍ନ ଦଳର ଆଶାୟୀ ପ୍ରାର୍ଥୀମାନେ ଘନ ଘନ ସାଧାରଣ ବୈଠକ ଏବଂ ଭୋଟରଙ୍କ ନିକଟତର ହେବା ପାଇଁ ଆରମ୍ଭ କରିସାରିଲେଣି ଉଦ୍ୟମ । ନିଜ ସପକ୍ଷରେ ଜନମତ ସୃଷ୍ଟି ଏବଂ ଭୋଟରଙ୍କୁ ଆକର୍ଷିତ କରିବା ପାଇଁ ବିଭିନ୍ନ ଉଦ୍ୟମ ଏବେଠୁ ଜୋରଦାର ହେଉଥିବା ଦେଖିବାକୁ ମିଳିଲାଣି । ଏହି ପରିପ୍ରେକ୍ଷୀରେ ଆଜି ବିଜେଡିର ଆଶାୟୀ ପ୍ରାର୍ଥୀ ସୁବାଷ ମଲ୍ଲିକଙ୍କ ନେତୃତ୍ବରେ ଏକ ବିଶାଳ ରୋଡ୍ ଶୋ' ଦେଖିବାକୁ ମିଳିଛି ।
ବିଜେଡି ଦଳରେ ଏକାଧିକ ଆଶାୟୀ ଥିବାରୁ ଦଳର ହାଇକମାଣ୍ଡଙ୍କ ଦୃଷ୍ଟିଗୋଚର ପାଇଁ ବିଭିନ୍ନ ପ୍ରାର୍ଥୀ ବିଭିନ୍ନ ଉପାୟରେ ଗୋଟିଚାଳନା ଆରମ୍ଭ କରିଲେଣି । ଏହାରି ମଧ୍ୟରେ ସୁବାଷ ମଲ୍ଲିକଙ୍କ ନେତୃତ୍ବରେ ଆଜି ନୂଆଗାଁ ସ୍ଥିତ ଶୋଭନେଶ୍ବର ମନ୍ଦିର ନିକଟରୁ ଏକ ରୋଡ ଆରମ୍ଭ କରି ବଙ୍ଗାଳିସାହି ଛକରୁ ନିଆଳି ବଜାର ପର୍ଯ୍ୟନ୍ତ ଏକ ଲମ୍ବା ପଦଯାତ୍ରା ଅନୁଷ୍ଠିତ ହୋଇଥିଲା । ନିଆଳି ଅଚିହ୍ନା ପଡିଆ ନିକଟରେ ଥିବା ବିଜୁବାବୁଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ ଆଶାୟୀ ବିଜେଡି ପ୍ରାର୍ଥୀ ସୁବାଷ । ସୁବାଷ ମଲ୍ଲିକଙ୍କ କହିବା କଥା, "ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶ ଓ ଲୋକାଭିମୁଖୀ କାର୍ଯ୍ୟକୁ ଲୋକଙ୍କ ନିକଟରେ ପହଞ୍ଚାଇବା ଏବଂ ସାଧାରଣ ଜନତା କିପରି ୨୦୨୪ ବିଧାନସଭାରେ ନବୀନ ପଟ୍ଟନାୟକଙ୍କୁ ଷଷ୍ଠ ଥର ମୁଖ୍ୟମନ୍ତ୍ରୀ ଭାବରେ ଓଡ଼ିଶାର ଶାସନ ଦେବେ, ଏଥିପାଇଁ ଏହି କାର୍ଯ୍ୟକ୍ରମ ମାଧ୍ୟମରେ ନିଆଳିବାସୀଙ୍କୁ ସଚେତନ କରାଯାଉଛି ।"
ତେବେ ଯଦି ଦଳର ସୁପ୍ରିମୋ ସୁବାଷଙ୍କୁ ନିଆଳିରୁ ଲଢିବା ପାଇଁ ସୁଯୋଗ ଦେବେ, ତେବେ ଏଥିପାଇଁ ସେ ପ୍ରସ୍ତୁତ ଥିବା କହିଛନ୍ତି ଆଶାୟୀ ପ୍ରାର୍ଥୀ ସୁବାଷ ମଲ୍ଲିକ । ବହୁ ସଂଖ୍ୟକ ପୁରୁଷ ଓ ମହିଳା ସମର୍ଥକ ସୁବାଷଙ୍କ ସହିତ ପଦଯାତ୍ରାରେ ସାମିଲ ହେବା ସହିତ 'ଏଥର ନିଆଳି ପାଇଁ ବିଜେଡି ଦଳରୁ ସୁବାଷ ମଲ୍ଲିକ ଆମର ନେତା' ବୋଲି ସ୍ଲୋଗାନ ଦେଇଥିଲେ । କଟକ ଜିଲ୍ଲା ନିଆଳି ନିର୍ବାଚନ ମଣ୍ଡଳୀ ଏକ ସମ୍ବେଦନଶୀଳ ନିର୍ବାଚନ ମଣ୍ଡଳୀ । ଏଠାରେ ବିଜେଡି, କଂଗ୍ରେସ ମଧ୍ୟରେ କଡା ଟକ୍କର ହେଉଥିବା ବେଳେ ଗତ ୨୦୧୯ ସାଧାରଣ ନିର୍ବାଚନ ସମୟରେ ବିଜେଡି ଓ ବିଜେପି ମଧ୍ୟରେ କଡା ଟକ୍କର ହୋଇଥିଲା । କଂଗ୍ରେସ ଦଳ ତୃତୀୟ ସ୍ଥାନରେ ଥିଲା । ତେବେ ବିଜେଡି ଦଳରେ ପ୍ରାୟ 8ରୁ ଅଧିକ ଆଶାୟୀ ପ୍ରାର୍ଥୀ ଥିବାରୁ କିଏ ନିଆଳି ପାଇଁ ବିଜେଡି ମଙ୍ଗ ଧରିବେ, ଏବେଠୁ ଆକଳନ କରିବା ମୁସ୍କିଲ ।
ଇଟିଭି ଭାରତ, ନିଆଳି/କଟକ
