ନୂଆଦିଲ୍ଲୀ: ଦିଲ୍ଲୀ ବିମାନ ବନ୍ଦରରେ ଗତକାଲି ସୁନା ତସ୍କରୀ କରୁଥିବା ଅଭିଯୋଗରେ ଦୁଇଜଣ ଗିରଫ ହୋଇଛନ୍ତି । ବିମାନ ବନ୍ଦର କଷ୍ଟମ ବିଭାଗ ଉଭୟଙ୍କ ଠାରୁ ପ୍ରାୟ 5ଶହ ଗ୍ରାମର ସୁନା ଜବତ କରିଛି । ତେବେ ଦୁଇ ଅଭିଯୁକ୍ତଙ୍କ ମଧ୍ୟରୁ ଜଣେ କଂଗ୍ରେସ ସାଂସଦ ଶଶି ଥରୁରଙ୍କ ବ୍ୟକ୍ତିଗତ ସହଯୋଗୀ ଭାବେ ନିଜକୁ ପରିଚୟ ଦେଇଛନ୍ତି । ଅଭିଯୁକ୍ତଙ୍କ ନାମ ଶିବ କୁମାର ପ୍ରସାଦ ଓ ସେ ଶଶିଙ୍କ ସହଯୋଗୀ ବୋଲି ତଦନ୍ତକାରୀ ସଂସ୍ଥାକୁ କହିଛନ୍ତି । ଅନ୍ୟଜଣଙ୍କ ସମ୍ପର୍କରେ ତଥ୍ୟ ସ୍ପଷ୍ଟ ହୋଇନି ।
ତେବେ ମିଳିଥିବା ସୂଚନା ଅନୁସାରେ, ସୁନା ଧରି ଜଣେ ବ୍ୟକ୍ତି ଦୁବାଇରୁ ଦିଲ୍ଲୀ ଆସିଥିଲେ । ଶିବ କୁମାର ତାଙ୍କୁ ରିସିଭ କରିବା ପାଇଁ ବିମାନ ବନ୍ଦର ଯାଇଥିଲେ । ତାଙ୍କ ପାଖରେ ଏରୋଡ୍ରୋମ ପରମିଟ କାର୍ଡ ଥିବା କାରରୁ ସେ ବିମାନ ବନ୍ଦର ଟର୍ମିନାଲ ମଧ୍ୟରେ ପ୍ରବେଶ ମଧ୍ୟ କରିଥିଲେ । ଯାତ୍ରୀଜଣକ ଟର୍ମିନାଲରେ ପହଞ୍ଚିବା ପରେ ଶିବ ତାଙ୍କ ଠାରୁ ଏକ ପ୍ୟାକେଟ ଗ୍ରହଣ କରିଥିଲେ । ଏହି ସମୟରେ ସନ୍ଦେହ ହେବାରୁ ସେଠାରେ ଥିବା କଷ୍ଟମ ଅଧିକାରୀମାନେ ଉଭୟଙ୍କୁ ଅଟକ ରଖି ଯାଞ୍ଚ କରିଥିଲେ । ଉକ୍ତ ପ୍ୟାକେଟରୁ ପ୍ରାୟ 5ଶହ ଗ୍ରାମ ସୁନା ଜବତ କରାଯାଇଥିଲା ସୂଚନା ମିଳିଛି । ଉକ୍ତ ଯାତ୍ରୀଜଣଙ୍କ ଏହି ସୁନା ଧରି ଦୁବାଇରୁ ଦିଲ୍ଲୀ ଆସିଥିଲେ ଓ ଏହାକୁ ଶିବକୁମାରଙ୍କୁ ହସ୍ତାନ୍ତର କରିବାକୁ ଯାଉଥିବା ପ୍ରାଥମିକ ଭାବେ ଜଣାପଡିଛି । ଅନ୍ୟପଟେ ପ୍ରାଥମିକ ତଦନ୍ତରେ ଶିବ କୁମାର ନିଜକୁ ଶଶୀଙ୍କ ସହଯୋଗୀ ବୋଲି ପରିଚୟ ଦେଇଛି । ନିର୍ବାଚନ ସମୟରେ ଯଦି ଶିବ କୁମାରଙ୍କ ସମ୍ପୃକ୍ତି ଶଶୀଙ୍କ ପର୍ଯ୍ୟନ୍ତ ଥାଏ, ତେବେ ଶଶୀଙ୍କ ଅଡୁଆ ବଢିପାରେ ।
ଅନ୍ୟପଟେ ଏହି ଘଟଣାରେ କେରଳରେ ରାଜନୀତି ଆରମ୍ଭ ହୋଇସାରିଛି । ରାଜଧାନୀ ଥିରୁଅନନ୍ତପୁରମରୁ ବିଜେପି ପ୍ରାର୍ଥୀ ତଥା କେନ୍ଦ୍ରମନ୍ତ୍ରୀ ରାଜୀବ ଚନ୍ଦ୍ରଶେଖର ଶଶିଙ୍କୁ ଟାର୍ଗେଟ କରିଛନ୍ତି । କେରଳରେ ପୂର୍ବରୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ଅଧିକାରୀ ମଧ୍ୟ ଗୋଲ୍ଡ ସ୍ମଗ୍ଲିଂ ମାମଲାରେ ଗିରଫ ହୋଇଥିଲେ । ଏବେ ଏହି ଘଟଣା ପରେ ଏହାକୁ କଂଗ୍ରେସ-ସିପିଆଇ(ଏମ) ‘ଗୋଲ୍ଡ ସ୍ମଗ୍ଲର ମେଣ୍ଟ’ ବୋଲି ଚନ୍ଦ୍ରଶେଖର କହିଛନ୍ତି । ଅନ୍ୟପଟେ ଏହି ଘଟଣାରେ ଶଶିଙ୍କ ପ୍ରତିକ୍ରିୟା ମିଳିପାରିନି ।
2020 ମସିହାରେ କେରଳରେ ବଡଧରଣର ଏକ ସୁନା ଟସ୍କରୀ ସାମ୍ନାକୁ ଆସିଥିଲା । ରାଜଧାନୀ ଥିରୁଅନନ୍ତପୁରମ ଅନ୍ତର୍ଜାତୀୟ ବିମାନ ବନ୍ଦରରେ ପ୍ରାୟ 30 କି.ଗ୍ରା ସୁନା ଜବତ କରାଯାଇଥିଲା । ପରେ ଏହି ଘଟଣାରେ ସରକାରୀ ଅଧିକାରୀଙ୍କ ସମ୍ପୃକ୍ତି ଥିବା ମଧ୍ୟ ଜଣାପଡିଥିଲା । ମୁଖ୍ୟମନ୍ତ୍ରୀ କାର୍ଯ୍ୟାଳୟର ଅଧିକାରୀ ମଧ୍ୟ ଗିରଫ ହୋଇଥିଲେ । ବିଭିନ୍ନ ସମୟରେ କେରଳରେ ସୁନା ତସ୍କରୀର ମାମଲା ସାମ୍ନାକୁ ଆସିବାର ନଜିର ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
