ସକାଳେ କିମ୍ବା ରାତିରେ ପ୍ରାୟ ସମସ୍ତଙ୍କ ଘରେ ରୁଟି ହୋଇଥାଏ । ସାଧାରଣତଃ ରାତ୍ରିଭୋଜନରେ ଲୋକେ ରୁଟି ଖାଇବାକୁ ପସନ୍ଦ କରନ୍ତି, ଯାହାକି ଅଟାରୁ ପ୍ରସ୍ତୁତ ହୋଇଥାଏ । ହେଲେ ଆପଣ କେବେ ଚାଉଳ ଚୂନା ରୁଟି ଖାଇଛନ୍ତି କି ? ଶୁଣିବାକୁ ଟିକିଏ ଅଜବ ଲାଗୁଥିଲେ ବି ଏହା ସତ ! ଅଟା ଭଳି ଚାଉଳ ଚୂନାରେ ମଧ୍ୟ ଫୁଲକା ଫୁଲକା ନରମ ରୁଟି ପ୍ରସ୍ତୁତ ହୋଇପାରିବେ । ଆଜି ଏହି ଖବରରେ ଜାଣନ୍ତୁ କେମିତି ଚାଉଳ ଚୂନାରୁ ରୁଟି ତିଆରି କରିବେ । ଏହା ଖାଇବାକୁ ଏତେ ସୁଆଦିଆ ଲାଗିବ ଯେ ଆପଣ ବାରମ୍ବାର ଏହି ରୁଟି ଖାଇବାକୁ ମନ ବଳାଇବେ । ତେବେ ଚାଉଳ ଚୂନା ରୁଟି ସାମାନ୍ୟ ଟାଣ ହୋଇପାରେ । କିନ୍ତୁ ନିମ୍ନୋଲିଖିତ ରେସିପି ଅନୁସାରେ ବନାଇଲେ ଏହା ନରମ ହୋଇପାରିବ । ଚାଲନ୍ତୁ ଜାଣିବା...
ଆବଶ୍ୟକୀୟ ସାମଗ୍ରୀ:
- ଚାଉଳ ଚୂନା
- ପାଣି
- ଅଦା ରସୁଣ ପେଷ୍ଟ- ଏକ ଚାମଚ
- କଞ୍ଚାଲଙ୍କା ପେଷ୍ଟ
- ଧନିଆ ଗୁଣ୍ଡ
- ତେଲ
- ଆବଶ୍ୟକତା ଅନୁସାରେ ଲୁଣ
ପ୍ରସ୍ତୁତ ପ୍ରଣାଳୀ
- ପ୍ରଥମେ ଗ୍ୟାସ୍ ଲଗାଇ ଏକ କଡେଇରେ ପାଣି ବସାନ୍ତୁ । ପାଣି ଗରମ ହେବା ପରେ ଏଥିରେ ଅଦା ରସୁଣ ପେଷ୍ଟ, କଞ୍ଚା ଲଙ୍କା ପେଷ୍ଟ, ଧନିଆ ପାଉଡର, ଆବଶ୍ୟକତା ଅନୁସାରେ ଲୁଣ ଓ ଏକ ଚାମଚ ତେଲ ପକାନ୍ତୁ ।
- ପାଣି ଭଲ ଭାବେ ଫୁଟିବା ପରେ ଏଥିରେ ଚାଉଳ ଚୂନା ପକାଇ ଭଲ ଭାବେ ଗୋଳାନ୍ତୁ । ଏହାପରେ ଗ୍ୟାସ୍ ବନ୍ଦ କରି ଜନ୍ତୁଣିକୁ ଥଣ୍ଡା ହେବାକୁ ଛାଡିଦିଅନ୍ତୁ ।
- 15 ମିନିଟ୍ ପରେ ଚାଉଳ ଚୂନା ଜନ୍ତୁଣିକୁ ହାତରେ ଭଲ ଭାବେ ଅଟା ଚକଟିଲା ଭଳି ହାତରେ ଚକଟନ୍ତୁ ଓ ଛୋଟ ଛୋଟ ଗୁଳା କରନ୍ତୁ ।
- ଏବେ ଅଟା ରୁଟି ବେଲିଲା ଭଳି ଅଟା ଲଗାଇ ଚାଉଳ ଚୁନା ରୁଟି ବେଲନ୍ତୁ । ଅଟା ଲଗାଇବା ଦ୍ବାରା ରୁଟି ଭଲ ଭାବେ ଗୋଲ ହୋଇଥାଏ ।
- ଏହି ରୁଟିକୁ ଏବେ ତାୱାରେ ସେକନ୍ତୁ । ଦୁଇ ପଟ ଭଲ ଭାବେ ସେକନ୍ତୁ । ଆପଣ ଚାହିଁଲେ ଘିଅ କିମ୍ବା ତେଲ ଲଗାଇପାରିବେ ।
- ଦେଖିବେ ରୁଟି କେମିତି ଭଲ ଭାବେ ଫୁଲିବା ସହ ନରମ ହେବ । ଏବେ ପ୍ଲେଟରେ ତରକାରୀ କିମ୍ବା ଭଜା ନେଇ ଏହି ନରମ ରୁଟି ସହ ଖାଆନ୍ତୁ ।
ଆପଣ ଚାହିଁଲେ ବିନା ଅଦା ରସୁଣ ପେଷ୍ଟରେ ମଧ୍ୟ ଏହାକୁ ବନାଇ ପାରିବେ ।
