ଢାକା: ବାଂଲାଦେଶରେ ଆସିଲା ନୂଆ ସରକାର । ରାଷ୍ଟ୍ରର ଅନ୍ତରୀଣ ବା ମଧ୍ୟବର୍ତ୍ତୀକାଳୀନ ସରକାରର ପ୍ରମୁଖ ଭାବେ ଶପଥ ଗ୍ରହଣ କରିଛନ୍ତି ନୋବେଲ ବିଜେତା ମହମ୍ମଦ ୟୁନୁସ । ରାଷ୍ଟ୍ରପତି ମହମ୍ମଦ ଶାହାବୁଦ୍ଦିନ ରାଷ୍ଟ୍ରପତି ମହଲ 'ବଙ୍ଗ ଭବନ'ରେ 84 ବର୍ଷୀୟ ୟୁନୁସଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ରାଷ୍ଟ୍ରର ନୂଆ ମୁଖିଆ ଭାବେ ୟୁନୁସ ଶପଥ ନେବା ପରେ ଟ୍ବିଟ କରି ତାଙ୍କୁ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ତାଙ୍କ ନେତୃତ୍ବରେ ପଡ଼ୋଶୀ ରାଷ୍ଟ୍ର ବାଂଲାଦେଶରେ ଶାନ୍ତି ବଜାୟ ରହିବା ସହ ହିନ୍ଦୁଙ୍କୁ ସୁରକ୍ଷା ପ୍ରଦାନ କରାଯିବ ବୋଲି ମୋଦି ଆଶାବ୍ୟକ୍ତ କରିଛନ୍ତି ।
ବାଂଲାଦେଶର ନୂଆ ମୁଖିଆ ୟୁନୁସ:-
ଶେଖ ହସିନା ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବା ପରେ ବାଂଲାଦେଶରେ ଗଠନ ହୋଇଛି ମଧ୍ୟବର୍ତ୍ତୀକାଳୀନ ସରକାର । ଅନ୍ତରୀଣ ସରକାରର ମୁଖ୍ୟ ଭାବେ ରାଷ୍ଟ୍ରପତି ମହଲରେ ଶପଥ ଗ୍ରହଣ କରିଛନ୍ତି ପ୍ରଫେସର ମହମ୍ମଦ ୟୁନୁସ । ଏହି ଶପଥ ଗ୍ରହଣ ସମାରୋହରେ ହସିନାଙ୍କ ଦଳ ପକ୍ଷରୁ କେହି ପ୍ରତିନିଧି ଉପସ୍ଥିତ ନଥିଲେ । ୟୁନୁସଙ୍କ କ୍ୟାବିନେଟରେ 16ଜଣଙ୍କୁ ସାମିଲ କରାଯାଇଛି । ସେମାନଙ୍କ ମଧ୍ୟରେ 2ଜଣ ଆନ୍ଦୋଳନକାରୀ ଛାତ୍ର ନେତା ଅଛନ୍ତି ।
My best wishes to Professor Muhammad Yunus on the assumption of his new responsibilities. We hope for an early return to normalcy, ensuring the safety and protection of Hindus and all other minority communities. India remains committed to working with Bangladesh to fulfill the…
— Narendra Modi (@narendramodi) August 8, 2024
ଶୁଭେଚ୍ଛା ବାର୍ତ୍ତାରେ କଣ କହିଲେ ମୋଦି:-
ପଡ଼ୋଶୀ ରାଷ୍ଟ୍ର ବାଂଲାଦେଶରେ ଅନ୍ତରୀଣ ସରକାର ଗଠନ ହେବା ପରେ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି X ସାଇଟ୍ରେ ଏକ ପୋଷ୍ଟ କରି କହିଛନ୍ତି, "ପ୍ରଫେସର ମହମ୍ମଦ ୟୁନୁସଙ୍କୁ ତାଙ୍କର ନୂତନ ଦାୟିତ୍ବ ଗ୍ରହଣ ପାଇଁ ମୋର ଶୁଭେଚ୍ଛା । ହିନ୍ଦୁ ତଥା ଅନ୍ୟ ସମସ୍ତ ସଂଖ୍ୟାଲଘୁ ସମ୍ପ୍ରଦାୟର ନିରାପତ୍ତାକୁ ସୁନିଶ୍ଚିତ କରି ଶୀଘ୍ର ସ୍ବାଭାବିକ ସ୍ଥିତିର ପୁନଃ ସ୍ଥାପିତ ହେବ ବୋଲି ଆଶା କରୁଛୁ । ଶାନ୍ତି, ନିରାପତ୍ତା ତଥା ବିକାଶ ଲାଗି ଉଭୟ ଦେଶର ଲୋକଙ୍କ ଆକାଂକ୍ଷା ପୂରଣ କରିବାକୁ ବାଂଲାଦେଶ ସହିତ କାମ କରିବା ଲାଗି ଭାରତ ପ୍ରତିଶ୍ରୁତିବଦ୍ଧ ।"
ପ୍ରଧାନମନ୍ତ୍ରୀ ଶେଖ ହସିନା ଇସ୍ତଫା ଦେଇ ଦେଶ ଛାଡିବା ପରେ ଅର୍ଥନୀତିଜ୍ଞ-ରାଜନେତା ୟୁନୁସଙ୍କୁ ମଧ୍ୟବର୍ତ୍ତୀକାଳୀନ ସରକାରର ମୁଖ୍ୟ ଭାବରେ ମଙ୍ଗଳବାର ନିଯୁକ୍ତ କରାଯାଇଥିଲା । ସରକାରୀ ଚାକିରିରେ ବିବାଦୀୟ କୋଟା ବ୍ୟବସ୍ଥାକୁ ନେଇ ସରକାରଙ୍କୁ ବ୍ୟାପକ ବିରୋଧ ପରେ ଶେଖ ହସିନା ନିଜ ପଦରୁ ଇସ୍ତଫା ଦେଇ ଭାରତ ଆସିଥିଲେ । ଫଳରେ ବାଂଲାଦେଶର ଦୀର୍ଘ 15ବର୍ଷ ସରକାରର ପତନ ଘଟିଥିଲା ।
କିଏ ମହମ୍ମଦ ୟୁନୁସ ?
୮୪ ବର୍ଷୀୟ ମହମ୍ମଦ ୟୁନୁସ୍ ୨୦୦୬ ମସିହାରେ ନୋବେଲ ଶାନ୍ତି ସମ୍ମାନ ଲାଭ କରିଥିଲେ । ଦେଶରେ ଗରୀବି ହଟାଇବା ପାଇଁ ତାଙ୍କୁ ଏହି ନୋବେଲ ପୁରସ୍କାର ପ୍ରଦାନ କରାଯାଇଥିଲା । ୟୁନୁସ ବାଂଲାଦେଶ ଗ୍ରାମୀଣ ବ୍ୟାଙ୍କର ସଂସ୍ଥାପକ । ସେ ଗ୍ରାମାଞ୍ଚଳରେ ୧୦୦ ଡଲାରରୁ କମ୍ ଋଣ ଯୋଗାଇ ଲକ୍ଷ ଲକ୍ଷ ଲୋକଙ୍କୁ ଦାରିଦ୍ର୍ୟରୁ ମୁକ୍ତ କରିବାରେ ସାହାଯ୍ୟ କରିଥିଲେ । ଶେଖ୍ ହସିନାଙ୍କ ଜଣେ ବଡ ସମାଲୋଚକ ଥିଲେ ୟୁନୁସ । ୨୦୧୧ରେ ହସିନା ସରକାର ତାଙ୍କୁ ଗ୍ରାମୀଣ ବ୍ୟାଙ୍କର ପରିଚାଳନା ନିର୍ଦ୍ଦେଶକ ପଦରୁ ହଟାଇଥିଲେ । ହସିନା ସରକାରରେ ତାଙ୍କ ବିରୋଧରେ ୧୯୦ଟି ମାମଲା ରୁଜୁ ହୋଇଥିଲା । ଚଳିତ ବର୍ଷ ଜନୁଆରୀରରେ ଶ୍ରମ ଆଇନ ଉଲ୍ଲଂଘନ ମାମଲାରେ ତାଙ୍କୁ ୬ ମାସ ଜେଲ୍ ଦଣ୍ଡ ମଧ୍ୟ ମିଳିଥିଲା ।
ଏହା ବି ପଢନ୍ତୁ- କିଏ ଏହି ମହମ୍ମଦ ୟୁନୁସ୍ ? ହସିନା ଯିବା ପରେ ବାଂଲାଦେଶରେ ଚଳାଇବେ ଅନ୍ତରୀଣ ସରକାର
