ନ୍ୟୁୟର୍କ: ଆଯୋଧ୍ୟାରେ ରାମଲାଲାଙ୍କ ପ୍ରାଣ ପ୍ରତିଷ୍ଠାକୁ ନେଇ କେବଳ ଦେଶ ନୁହେଁ ବିଶ୍ୱର କୋଣ ଅନୁକୋଣ ରାମମୟ । ସବୁଠି ଗୁଞ୍ଜରିତ ହେଉଛି ରାମ ନାମ । ଦେଶ ବିଦେଶରେ ପାଳନ କରାଯାଉଛି ପ୍ରାଣ ପ୍ରତିଷ୍ଠା ମହୋତ୍ସବ । ଅଯୋଧ୍ୟାରେ ରାମଲାଲାଙ୍କ ପ୍ରାଣ ପ୍ରତିଷ୍ଠା ଅବସରରେ ରବିବାର ଦିନ ନ୍ୟୁୟର୍କର ଟାଇମ୍ସ ସ୍କୋୟାରରେ 'ଓଭରସିଜ ଫ୍ରେଣ୍ଡ୍ସ ଅଫ ରାମ୍ ମନ୍ଦିର୍' ସଦସ୍ୟମାନେ ମିଠା ବାଣ୍ଟିଛନ୍ତି । ପ୍ରେମ ଭଣ୍ଡାରୀ ନାମକ ଏକ ସଂଗଠନର ସଦସ୍ୟମାନେ ଆମେରିକାରେ ମିଠା ବାଣ୍ଟିବା ସହ ବେଶ୍ ଖୁସିରେ ପାଳନ କରିଛନ୍ତି ଅଯୋଧ୍ୟା ରାମ ମନ୍ଦିର ପ୍ରତିଷ୍ଠା ଉତ୍ସବ । ଏଥିସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ପ୍ରଶଂସା କରିଛି ସଂଗଠନ । ଏହି କାର୍ଯ୍ୟକ୍ରମ କେବଳ ଭାରତ ନୁହେଁ ବରଂ ସମଗ୍ର ବିଶ୍ୱରେ ଲୋକଙ୍କୁ ସଂଯୋଗ କରିଛି ବୋଲି କୁହାଯାଇଛି ।
ଏହାମଧ୍ୟ ପଢନ୍ତୁ.. ରାମମୟ ଅଯୋଧ୍ୟା ନଗରୀ, ଆଜି ଭବ୍ୟ ମନ୍ଦିରରେ ବିରାଜିବେ ରାମଲାଲା
ନ୍ୟୁୟର୍କରେ ରବିବାର ଭାରତୀୟ ପ୍ରବାସୀମାନେ ପାଳନ କରିଛନ୍ତି ରାମ ମନ୍ଦିର ପ୍ରତିଷ୍ଠା ଉତ୍ସବ । ଏନେଇ ପ୍ରେମ ଭଣ୍ଡାରୀ ସଂଗଠନର ସଦସ୍ୟମାନେ କହିଛନ୍ତି, 'ଏଭଳି ଦିବ୍ୟ ସମୟ ଆମ ଜୀବନକାଳରେ ଦେଖିବାକୁ ମିଳିବ ତାହା କେବେ ଭାବିନଥିଲୁ । ଆଉ କିଛି ସମୟ ପରେ ପ୍ରାଣ ପ୍ରତିଷ୍ଠା ହେବାକୁ ଯାଉଛି । ଅଯୋଧ୍ୟା ଭଳି ଟାଇମ୍ସ ସ୍କୋୟାରରେ ଲୋକମାନେ ବେଶ ଧୁମଧାମରେ ପ୍ରାଣ ପ୍ରତିଷ୍ଠା ଉତ୍ସବ ପାଳନ କରୁଛନ୍ତି । ଭାରତୀୟ ପ୍ରବାସୀମାନେ ବିଭିନ୍ନ ସ୍ଥାନରେ କାର୍ଯ୍ୟକ୍ରମ ମାଧ୍ୟମରେ ପ୍ରାଣ ପ୍ରତିଷ୍ଠା ଉତ୍ସବ ପାଳନ କରୁଛନ୍ତି ।'
ଆଉ ମଧ୍ୟ ସଂଗଠନ ପକ୍ଷରୁ ପ୍ରଧାନମନ୍ତ୍ରୀ ମୋଦିଙ୍କ ପ୍ରଶଂସାରେ କୁହାଯାଇଛି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱ ଯୋଗୁ ଭଗବାନ ଶ୍ରୀରାମ ବନବାସରୁ ଫେରି ଆସିଛନ୍ତି । ସାରା ବିଶ୍ୱର ପରିବେଶ ଏବେ ରାମମୟ । ଏହା କେବଳ ଭାରତର 140କୋଟି ଲୋକଙ୍କୁ ନୁହେଁ ବରଂ ବିଦେଶରେ ରହୁଥିବା ଭାରତୀୟ ପ୍ରବାସୀମାନଙ୍କୁ ମଧ୍ୟ ଯୋଡି ରଖିଛି । ଆଜିର ଦିନ ଦୀପାବଳି ଠାରୁ କୌଣସି ଗୁଣରେ କମ ନୁହେଁ ।
ତେବେ ଆମେରିକାରେ ପ୍ରାଣ ପ୍ରତିଷ୍ଠା ଉତ୍ସବ ପାଳନ ପାଇଁ ସେଠାରେ ଥିବା ଭାରତୀୟ ପ୍ରବାସୀମାନେ ଏକାଠି ହୋଇଛନ୍ତି । ଏକାଧିକ କାର୍ଯ୍ୟକ୍ରମର ଆୟୋଜନ କରାଯିବା ସହ ଆମେରିକାରେ ଏହି ଐତିହାସିକ ଉତ୍ସବକୁ ଧୁମଧାମରେ ପାଳନ କରାଯାଉଛି । ନ୍ୟୁୟର୍କ, ଓ୍ବାଶିଂଟନ, ଡିସି, ବୋସଷ୍ଟୋନ, ଟାଇମ୍ସ ସ୍କୋୟାର, ଲସ୍ଆଞ୍ଜେଲ୍ସ, ସାନଫ୍ରାନସିସ୍କୋ ସମେତ ଅନେକ ସ୍ଥାନରେ ପାଳନ ହୋଇଛି ରାମଲାଲାଙ୍କ ପ୍ରାଣ ପ୍ରତିଷ୍ଠା ସମାରୋହ ।
