ଭୁବନେଶ୍ବର: ଆରମ୍ଭ ହୋଇଗଲାଣି ଶୀତ ଋତୁ । ସାଧାରଣତଃ ଋତୁ ବଦଳିବା ସହ ବିଭିନ୍ନ ପ୍ରକାର ସ୍ବାସ୍ଥ୍ୟ ସମସ୍ୟା ଦେଖାଦେଇଥାଏ । ବିଶେଷକରି ଶୀତ ଦିନେ ଥଣ୍ଡା, କାଶ, ଜ୍ବର, ଚର୍ମରୋଗ ଆଦି ସାଧାରଣ ହୋଇଯାଏ । ଏଥିରେ ଶିଶୁମାନେ ବିଶେଷଭାବେ ଆକ୍ରାନ୍ତ ହୋଇଥାନ୍ତି । ଏଥିପାଇଁ ଏହି ଦିନରେ ସେମାନଙ୍କର ସ୍ବତନ୍ତ୍ର ଯତ୍ନ ନେବା ଜରୁରୀ । ପ୍ରତ୍ୟେକ ଋତୁରେ ଶିଶୁଙ୍କ ଉପଯୁକ୍ତ ଯତ୍ନ ନେଲେ ସେମାନଙ୍କ ଶରୀରରେ ରୋଗ ପ୍ରତିରୋଧକ ଶକ୍ତି ସୃଷ୍ଟି ହୋଇଥାଏ । ହେଲେ ଅଧିକାଂଶ ମାଆ ଏ ସମ୍ପର୍କରେ ଉପଯୁକ୍ତ ଜ୍ଞାନ ଅଭାବରୁ କ'ଣ କରିବେ, କ'ଣ ନକରିବେ ଜାଣିପାରି ନଥାନ୍ତି । ଯେଉଁ କାରଣରୁ ଅନେକ ସମୟରେ ନବଜାତ ଶିଶୁଙ୍କ ଶାରିରୀକ ଓ ମାନସିକ ବିକାଶ ଠିକ୍ ଭାବେ ହୋଇନଥାଏ । ତେବେ ଶୀତ ଦିନେ କିପରି ଶିଶୁଙ୍କ ଯତ୍ନ ନେବେ ସେନେଇ ପରାମର୍ଶ ଦେଇଛନ୍ତି ଶିଶୁରୋଗ ବିଶେଷଜ୍ଞ ଡଃ ଆଶୁତୋଷ ମହାପାତ୍ର ।
ଶିଶୁରୋଗ ବିଶେଷଜ୍ଞ କହିଛନ୍ତି, ''6 ମାସରୁ କମ୍ ଶିଶୁଙ୍କୁ ଶୀଘ୍ର ଥଣ୍ଡା ଧରିଥାଏ । ତେଣୁ ତାଙ୍କୁ ସବୁବେଳେ ଦୁଇରୁ ତିନୋଟି କପଡାରେ ଗୁଡାଇ ଉଷୁମ ରଖିବା ଉଚିତ୍ । ରୁମ୍ ତାପମାତ୍ରା 24ରୁ 28 ଡିଗ୍ରୀ ଭିତରେ ରହିବା ଉଚିତ୍ । ଏସି ନ ବ୍ୟବହାର କରିବା ଭଲ । ଶିଶୁଙ୍କୁ ସବୁଦିନ ସକାଳୁ ନଖ ଉଷୁମ ପାଣିରେ ଗାଧୋଇବା ଓ ଦେହରେ ମଇଶ୍ଚରାଇଜର ଲଗାଇବା ଦରକାର । କାରଣ ଶୀତ ଦିନ ଚର୍ମ ଶୁଷ୍କ ହେବା ସହ ଅଧିକ ଚର୍ମରୋଗ ହୋଇଥାଏ । ଏଥିସହ ଥଣ୍ଡା, କାଶ ହେଲେ କୌଣସି ଘରୋଇ ଉପଚାର ନ ଆପଣାଇ ଡାକ୍ତରଙ୍କ ପରାମର୍ଶ ନେବା ଆବଶ୍ୟକ ।''
ଆହୁରି କହିଛନ୍ତି, ''1 ବର୍ଷରୁ ଅଧିକ ପିଲାଙ୍କ କ୍ଷେତ୍ରରେ ମଧ୍ୟ ଏହିଭଳି ଯତ୍ନ ନେବା ଦରକାର । ବାହାରକୁ ଅଧିକ ନେବେ ନାହିଁ । ଗାଧୋଇବା ପୂର୍ବରୁ ନଡିଆ ତେଲରେ ମାଲିସ କରିବା କିମ୍ବା ମଇଶ୍ଚରାଇଜର ଲଗାଇପାରିବେ । ବାହାର ଧୂଳି ଅପରିଷ୍କାର ଠାରୁ ଦୂରେଇ ରଖିବେ । ଜଙ୍କଫୁଡ ନଦେଇ ଘରେ ରନ୍ଧା ଖୁଆଇବେ । ଏହାଦ୍ବାରା ଶିଶୁ ଋତୁ ପରିବର୍ତ୍ତନ ଜନିତ ସ୍ବାସ୍ଥ୍ୟ ସମସ୍ୟାରୁ ଦୂରେଇ ରହିଥାଏ ।''
ଶୀତ ଦିନେ ହେଉଥିବା ରୋଗ:
ଚର୍ମରୋଗ:
ଡାକ୍ତର ଆଶୁତୋଷ ମହାପାତ୍ର କହିଛନ୍ତି ଯେ, ଶୀତ ଋତୁରେ ବାୟୁମଣ୍ଡଳ ତାପମାତ୍ରା କମି ଯାଇଥାଏ । ଯାହାଫଳରେ ଶରୀରରେ ରୋଗ ପ୍ରତିରୋଧକ ଶକ୍ତି ସାଧାରଣ ଭାବରେ ହ୍ରାସ ପାଇଥାଏ । ଶୀତଳ ଓ ଶୁଷ୍କ ବାୟୁମଣ୍ଡଳ ହେତୁ ଚର୍ମ ଶୁଷ୍କ ହୋଇ ଧୂସର ବର୍ଣ୍ଣ ଦେଖାଯାଏ । ଶୀତ ଋତୁରେ ଆଲର୍ଜି ଯୋଗୁଁ ଚର୍ମ କୁଣ୍ଡିଆ ରୋଗ ଅଧିକ ହୋଇଥାଏ । ଏହି ସମୟରେ ଶିଶୁଙ୍କୁ ଅଧିକ କାଛୁ ଓ କୁଣ୍ଡିଆ ରୋଗ ହୋଇଥାଏ । ବିଶେଷ କରି ହଷ୍ଟେଲ ଓ ଅଧିକ ଲୋକ ରହୁଥିବା ଘରେ ଏହାର ପ୍ରାଦୁର୍ଭାବ ଅଧିକ ଦେଖିବାକୁ ମିଳେ । ହାତ ଓ ପାଦ ଫାଟିବା ମଧ୍ୟ କେତେକାଂଶରେ ଦେଖାଯାଇଥାଏ ।
ଶ୍ୱାସରୋଗ:
ଏହା ଭୂତାଣୁ ଜନିତ କିମ୍ବା ଜୀବାଣୁ ଦ୍ୱାରା ସାଧାରଣ ଭାବରେ ହୋଇଥାଏ । ଇନଫ୍ଲୁଏଞ୍ଜା ଓ ଆର.ଏସ.ଭି ଭୂତାଣୁ ଦ୍ୱାରା ଶିଶୁ ଆକ୍ରାନ୍ତ ହୋଇଥାନ୍ତି । ସାମାନ୍ୟ ଥଣ୍ଡା ଜ୍ୱରଠାରୁ ଆରମ୍ଭ କରି ଅତି ସାଂଘାତିକ ବ୍ରୋଙ୍କିଓଲାଇଟିସ ରୋଗ ଶିଶୁଠାରେ ଦେଖାଦେଇଥାଏ । ଏହି ରୋଗରେ ଶିଶୁ ଖୁବ୍ ଜୋରରେ ନିଶ୍ୱାସ ନେଇଥାଏ । ଠିକ ଭାବରେ ମା’ଠାରୁ ଖାଦ୍ୟ ଖାଇପାରେ ନାହିଁ । ବିଶେଷକରି ୨ ବର୍ଷରୁ କମ୍ ଶିଶୁଙ୍କ ଠାରେ ଏହା ଅଧିକ ଦେଖାଯାଏ । ନାକରୁ ପାଣି ବାହାରିବା ସହ ପୂର୍ବରୁ ଥିବା ଶ୍ୱାସ ରୋଗ ଅଧିକ ବଢିଥାଏ । ଏହି ସମୟରେ ଛିଙ୍କ ସାଧାରଣ ଅଟେ ବୋଲି କହିଛନ୍ତି ଶିଶୁ ବିଶେଷଜ୍ଞ ।
ତରଳଝାଡ଼ା:
ଛଅ ମାସରୁ ତିନି ବର୍ଷ ବୟସର ଶିଶୁଙ୍କୁ ମଧ୍ୟରେ ବାନ୍ତି ଝାଡା ଦେଖାଦେଇଥାଏ । ଏହା କୌଣସି ଔଷଧ ଦ୍ୱାରା ଭଲ ହୋଇନଥାଏ । କେବଳ ଓଆରଏସ ଓ ଜିଙ୍କ ଔଷଧ ଦ୍ୱାରା ଧୀରେ ଧୀରେ ସେମାନେ ସୁସ୍ଥ ହୋଇଥାନ୍ତି ବୋଲି ଶିଶୁ ବିଶେଷଜ୍ଞ ଆଶୁତୋଷ ମହାପାତ୍ର କହିଛନ୍ତି ।
ଗଣ୍ଠିବ୍ୟଥା:
ଶୀତ ଋତୁରେ ବିଶେଷ ଭାବେ ଶିଶୁଙ୍କୁ ଗଣ୍ଠିବ୍ୟଥା ଅଧିକ ହେଉଥିବାର ଲକ୍ଷ୍ୟ କରାଯାଇଥାଏ । ଏହି ଦିନେ ରକା ପଶିବା ଭଳି ସମସ୍ୟା ଅଧିକ ହୋଇଥାଏ ।
ସ୍ତନ୍ୟପାନ ଠିକ ସମୟରେ କରାଇବା:
ଶିଶୁ ବିଶେଷଜ୍ଞ ଆଶୁତୋଷ ମହାପାତ୍ର କହିଛନ୍ତି ଯେ, ମାଆ କ୍ଷୀର ନବଜାତ ଶିଶୁ ପାଇଁ ଅମୃତ ସଦୃଶ୍ୟ । ଏହା ଶିଶୁର ଶାରୀରିକ ତଥା ମାନସିକ ବିକାଶରେ ସହାୟକ ହୋଇଥାଏ । ସେଥିପାଇଁ ଶିଶୁ ଜନ୍ମ ହେବାର ୩୦ ମିନିଟ୍ ମଧ୍ୟରେ ତାକୁ ସ୍ତନ୍ୟପାନ ଆରମ୍ଭ କରାଇବା ଉଚିତ୍ । ପ୍ରସବ ପରେ ମା’ ଅଚେତ ଅବସ୍ଥାରେ ଥିଲେ ମଧ୍ୟ ଶିଶୁକୁ ସ୍ତନ୍ୟପାନ କରାନ୍ତୁ । ପ୍ରସବ ପରେ ଦୁଇ ତିନି ଘଣ୍ଟାର ବ୍ୟବଧାନରେ ଶିଶୁଟିକୁ ବାରମ୍ବାର ଠିକ୍ ଭାବେ ସ୍ତନ୍ୟପାନ କରାଇବା ଉଚିତ । ମା’ କ୍ଷୀର କମ୍ ହେବା ଏକ ସାଧାରଣ ସମସ୍ୟା ବୋଲି ସେ କହିଛନ୍ତି ।
ଶିଶୁ ସ୍ୱାସ୍ଥ୍ୟର ଯତ୍ନ: କ'ଣ କରିବେ ଓ କ'ଣ ନକରିବେ
କିପରି ସ୍ବାସ୍ଥ୍ୟର ଯତ୍ନ ନେବେ ସେନେଇ ଶିଶୁ ବିଶେଷଜ୍ଞ ସଚେତନ କରାଇ କହିଛନ୍ତି ଯେ, ଶିଶୁକୁ ସଂକ୍ରମଣ ଠାରୁ ଦୂରେଇ ରଖିବାକୁ ହେଲେ ଯେତେ କମ୍ ଲୋକ ତା'ର ସଂସ୍ପର୍ଶରେ ଆସିବେ ସେତେ ଭଲ । ଶିଶୁକୁ ଧରିବା ପୂର୍ବରୁ ଭଲ ଭାବେ ହାତ ଧୁଅନ୍ତୁ ଓ ପରିଷ୍କାର ପୋଷାକ ପିନ୍ଧନ୍ତୁ । ଖାସ୍ କରି ଥଣ୍ଡା, ଜ୍ୱର ଆଦିରେ ପୀଡ଼ିତ ବ୍ୟକ୍ତିଙ୍କଠାରୁ ଶିଶୁଙ୍କୁ ଦୂରେଇ ରଖିବା ଉଚିତ୍ । ଜନ୍ମ ହେବାର ତିନି ମାସ ଯାଏ କେବେ ବି ଶିଶୁକୁ ଚୁମ୍ବନ ଦେବା ଅନୁଚିତ୍ । ନବଜାତ ପିଲାଙ୍କ ଆଖିରେ ଆଦୌ କଳା ଲଗାନ୍ତୁ ନାହିଁ । ବଜାର କିମ୍ବା ଅଧିକ ଗହଳି ଥିବା ସ୍ଥାନକୁ ପିଲାଙ୍କୁ ନିଅନ୍ତୁ ନାହିଁ ବୋଲି ଶିଶୁ ବିଶେଷଜ୍ଞ ପରାମର୍ଶ ଦେଇଛନ୍ତି ।
ଏହା ମଧ୍ୟ ପଢନ୍ତୁ: ଦୁଷ୍କର୍ମ ଭୟ: ବ୍ୟାଗରେ ଏହି 5ଟି ଜିନିଷ ରଖନ୍ତୁ ମହିଳା, ବିପଦରେ କରିବ ସାହାଯ୍ୟ ଏହା ମଧ୍ୟ ପଢନ୍ତୁ: ଶୀତ ଦିନିଆ ଡ୍ରାଏ ସ୍କିନ ନେଇ ଚିନ୍ତିତ ? ଏହି ଘରୋଇ ଉପାୟ ଆପଣଙ୍କ ପାଇଁ... ଏହା ମଧ୍ୟ ପଢନ୍ତୁ: ପ୍ରସବ ପରେ ଚିନ୍ତାଗ୍ରସ୍ତ ରହୁଛନ୍ତି କି? ଡିପ୍ରେସନରୁ କିପରି ମୁକୁଳିବେ, ଜାଣନ୍ତୁ |
ଇଟିଭି ଭାରତ, ଭୁବନେଶ୍ବର
