ସମସ୍ତେ ଅଳ୍ପ ବହୁତେ ଜାଣନ୍ତି ରୋଗ ପ୍ରତିରୋଧକ ପ୍ରଣାଳୀ (ଇମ୍ୟୁନ ସିଷ୍ଟମ) ଶରୀର ପାଇଁ କେତେ ଗୁରୁତ୍ବପୂର୍ଣ୍ଣ । ଏହା ଆମ ଶରୀରକୁ ବିଭିନ୍ନ ମାରାତ୍ମକ ରୋଗ, ସଂକ୍ରମଣରୁ ରକ୍ଷା କରିଥାଏ । ଇମ୍ୟୁନିଟି ବା ରୋଗ ପ୍ରତିରୋଧକ ଶକ୍ତି କମିଲେ ଆମେ ରୋଗରେ ପଡିଥାଉ । ଏଥିପାଇଁ ସମସ୍ତେ ନିଜର ଇମ୍ୟୁନିଟି ମଜଭୁତ କରିବା ଅତି ଜରୁରୀ । ଇମ୍ୟୁନ ସିଷ୍ଟମ ଦୁର୍ବଳ ହେଲେ କିମ୍ବା ଏଥିରେ କିଛି ଗଡବଡ ଥିଲେ ଶରୀରକୁ କେତେକ ସଙ୍କେତ ଦେଇଥାଏ । ଯଦି ଏହି ସଙ୍କେତକୁ ବୁଝି ଠିକ୍ ସମୟରେ ସମସ୍ୟା ଦୂର କରିବାକୁ ଚେଷ୍ଟା କରନ୍ତି ତେବେ ଭବିଷ୍ୟତରେ ଅନେକ ଗମ୍ଭୀର ରୋଗରୁ ମୁକ୍ତି ପାଇପାରିବେ ।
କ'ଣ କୁହନ୍ତି ଡାକ୍ତର ?
ନୂଆଦିଲ୍ଲୀ ସ୍ଥିତ ଲାଇଫ ହସ୍ପିଟାଲର ଡାକ୍ତର ଅଶ୍ରୀ କ୍ୟୁରେସି କହିଛନ୍ତି, ଶରୀରକୁ ସୁସ୍ଥ ରଖିବାରେ ଇମ୍ୟୁନ ସିଷ୍ଟମ ଅତ୍ୟନ୍ତ ଗୁରୁତ୍ବପୂର୍ଣ୍ଣ । ଏହା ଭାଇରସ, ବ୍ୟାକ୍ଟେରିଆ ଓ ଅନ୍ୟ ହାନିକାରକ ପଦାର୍ଥ ପ୍ରଭାବରୁ ଆମ ଶରୀରକୁ ସୁରକ୍ଷା ଦେଇଥାଏ । ଯଦି କୌଣସି କାରଣରୁ ଇମ୍ୟୁନ ସିଷ୍ଟମ ଦୁର୍ବଳ ହୁଏ, ତାହେଲେ ବିଭିନ୍ନ ପ୍ରକାର ଗମ୍ଭୀର ରୋଗ, ସଂକ୍ରମଣ ଗ୍ରାସ କରିଥାଏ ଯାହାକି ଆମର ଦୈନନ୍ଦିନ ଜୀବନକୁ ପ୍ରଭାବିତ କରେ ।
ଦୁର୍ବଳ ଇମ୍ୟୁନ ସିଷ୍ଟମ ଲକ୍ଷଣ:
ବାରମ୍ବାର ଥଣ୍ଡା-ଜ୍ବର ହେବା: ବାରମ୍ବାର ଥଣ୍ଡା ଜ୍ବର ହେବା, ନାକରୁ ପାଣି ବୋହିବା ଦୁର୍ବଳ ଇମ୍ୟୁନିଟିର ସଙ୍କେତ । ଜଣେ ସୁସ୍ଥ ବ୍ୟକ୍ତିକୁ ବର୍ଷକୁ 2ରୁ 3 ଥର ଥଣ୍ଡା, ଜ୍ବର ହୋଇପାରେ । ହେଲେ ଇମ୍ୟୁନ ସିଷ୍ଟମ ଦୁର୍ବଳ ଥିଲେ ବାରମ୍ବାର ହୋଇଥାଏ ।
କ୍ଷତ କିମ୍ବା ଘା' ଶୀଘ୍ର ନ ଶୁଖିବା: ଆମ ଶରୀରରେ କ୍ଷତ କିମ୍ବା ଘା' ହେଲେ ଇମ୍ୟୁନ ସିଷ୍ଟମ ଏହାକୁ ଶୀଘ୍ର ଶୁଖାଇବାରେ କାମ କରେ । ଯଦି କ୍ଷତ ଭରିବାକୁ ଅଧିକ ସମୟ ଲାଗେ, ତାହେଲେ ଆପଣଙ୍କ ଇମ୍ୟୁନିଟି କମ୍ କିମ୍ବା ଏହା ଠିକ୍ ଭାବେ କାମ କରୁନାହିଁ ।
ବାରମ୍ବାର ସଂକ୍ରମଣ: ସୁସ୍ଥ ଇମ୍ୟୁନ ସିଷ୍ଟମ ଶରୀରକୁ ସଂକ୍ରମଣରୁ ରକ୍ଷା କରେ । ହେଲେ ବାରମ୍ବାର ସଂକ୍ରମଣ ହେଉଥିଲେ ଏହା ଦୁର୍ବଳ ଇମ୍ୟୁନିଟିର ସଙ୍କେତ । ସଂକ୍ରମଣ ବିଭିନ୍ନ ପ୍ରକାରର ଥାଏ ଯେମିତିକି- କାନ ସଂକ୍ରମଣ, ସାଇନସାଇଟିସ, ଫୁସଫୁସ ସଂକ୍ରମଣ କିମ୍ବା ୟୁରିନି (ପରିସ୍ରା) ସଂକ୍ରମଣ ଇତ୍ୟାଦି
ଥକ୍କାପଣ ଓ ଦୁର୍ବଳ ଲାଗିବା: ଇମ୍ୟୁନିଟି ଦୁର୍ବଳ ଥିଲେ ଲଗାତାର ଥକ୍କା ଓ ଦୁର୍ବଳ ଲାଗିଥାଏ । କିଛି କାମ କରିବାକୁ ଇଚ୍ଛା ହୁଏନି । ଆରାମ କରିବା ସତ୍ତ୍ବେ ଏହା ଠିକ୍ ହୋଇନଥାଏ ।
ପେଟ ସମସ୍ୟା: ଶରୀରର ପାଚନ ତନ୍ତ୍ର ଇମ୍ୟୁନ ସିଷ୍ଟମର ଏକ ଗୁରୁତ୍ବପୂର୍ଣ୍ଣ ଅଂଶ । ଏଥିରେ ଗଡବଡ ହେଲେ ପେଟରେ ଭଲ ବ୍ୟାକ୍ଟେରିଆ କମିଯାଏ ଓ ପେଟ ସମସ୍ୟା ଦେଖାଦିଏ । କୋଷ୍ଠକାଠିନ୍ୟ, ବଦହଜମୀ, ପେଟ ଯନ୍ତ୍ରଣା ଓ ଗ୍ୟାସ୍ ସମସ୍ୟା ହେବା ଆପଣଙ୍କ ରୋଗ ପ୍ରତିରୋଧକ ଶକ୍ତି ଦୁର୍ବଳ ହେବାର ସଙ୍କେତ ଦିଏ ।
ଡାକ୍ତର କହିଛନ୍ତି, ଆପଣ ନିଜ ସ୍ବାସ୍ଥ୍ୟ ପ୍ରତି ସଚେତନ ହେଲେ ସୁସ୍ଥ ରହିପାରିବେ । ଯଦି ଉପରୋକ୍ତ ଲକ୍ଷଣମାନ ମଧ୍ୟରୁ କେଉଁଟି ଆପଣଙ୍କଠାରେ ଦେଖାଯାଉଛି ତାହେଲେ ଡେରି ନ କରି ନିଜର ଇମ୍ୟୁନିଟି ସିଷ୍ଟମ ମଜଭୁତ କରିବା ଉପରେ ଧ୍ୟାନ ଦିଅନ୍ତୁ । ଆବଶ୍ୟକସ୍ଥଳେ ଡାକ୍ତରଙ୍କ ପରାମର୍ଶ ନିଅନ୍ତୁ । ଏହାବ୍ୟତୀତ ଖାଦ୍ୟପାନୀୟ, ପର୍ଯ୍ୟାପ୍ତ ନିଦ, ନିୟମିତ ବ୍ୟାୟାମ କରିବା ଦ୍ବାରା ରୋଗ ପ୍ରତିରୋଧକ ପ୍ରଣାଳୀ ମଜଭୁତ ହୋଇପାରିବ ।
