ହାଇଦ୍ରାବାଦ: ଆସିଛି ଶ୍ରାବଣ ମାସ । ଏହି ମାସ ହିନ୍ଦୁ ଧର୍ମାବଲମ୍ବୀଙ୍କ ପାଇଁ ଏକ ପବିତ୍ର ମାସ ଭାବରେ ଗଣାଯାଏ । ବିଶେଷ କରି ଶ୍ରାବଣ ସୋମବାରରେ ଅନେକ ଲୋକ ବ୍ରତ ରଖିଥାନ୍ତି । ଏହି ମାସରେ ଭଗବାନ ଶିବଙ୍କୁ ନିଷ୍ଠାର ସହ ପୂଜା କଲେ ମନସ୍କାମନା ପୂରଣ ହେବା ନେଇ ବିଶ୍ବାସ ରହିଛି । ଯେଉଁ କାରଣରୁ ଶିବ ଭକ୍ତମାନେ ଆମିଷ ଭକ୍ଷଣ କରିନଥାନ୍ତି । ମାସର ପ୍ରତ୍ୟକ ଦିନ ସାକାହାରୀ ଭୋଜନ ସହ ସୋମବାର ବ୍ରତ ରଖିଥାନ୍ତି । ଏପରି କିଛି ଶୈବ ଭକ୍ତ ଅଛନ୍ତି, ଯେଉଁମାନେ ପ୍ରଥମ କରି ବ୍ରତ ରଖୁଛନ୍ତି । ଏପରି ସ୍ଥିତିରେ କେଉଁ ସବୁ ଖାଦ୍ୟ ଖାଇବା ଉଚିତ, କ'ଣ ଖାଇବା ଅନୁଚିତ ତାହା ସେମାନେ ଜାଣିପାରନ୍ତି ନାହିଁ । ଏଭଳି କ୍ଷେତ୍ରରେ ବିଶେଷଜ୍ଞମାନେ କ'ଣ ସବୁ ପରାମର୍ଶ ଦେଇଛନ୍ତି ଆସନ୍ତୁ ଜାଣିବା ।
କେଉଁ ଖାଦ୍ୟ ଖାଇବେ:
ଅନେକ ସମୟରେ ଦେଖାଯାଏ ଯେ, ବ୍ରତଧାରୀମାନଙ୍କର ଭୋଜନ ଠିକ ହେଉନଥିବାରୁ ଦୁର୍ବଳ ଓ ଥକାପଣ ଅନୁଭୂତ ହୋଇଥାଏ । ଏହାକୁ ଦୂର କରିବାକୁ ବିଶେଷଜ୍ଞ ଦେଇଥିବା ପରାମର୍ଶ ବିଷୟରେ ଆମେ ଆପଣଙ୍କୁ କହିବାକୁ ଯାଉଛୁ । ଡାଏଟିସିଆନଙ୍କ କହିବା ଅନୁଯାୟୀ, ବ୍ରତ ସମୟରେ ଆପଣ ଅନ୍ନ ଖାଆନ୍ତି ନାହିଁ । ତେଣୁ ଦୁର୍ବଳ ଅନୁଭୂତ ନହେବା ପାଇଁ ଫଳମୂଳ ଖାଇବାକୁ ଭୁଲନ୍ତୁନି । ଏହାଦ୍ବାରା ଆପଣଙ୍କ ଶରୀରକୁ ଶକ୍ତି ମିଳିଥାଏ । ଏହା ବ୍ୟତୀତ ବ୍ରତ ସମୟରେ ଆପଣ ବାଦାମ କିମ୍ବା ଅନ୍ୟ ଡ୍ରାଏଫ୍ରୁଟସ ମଧ୍ୟ ଖାଇପାରିବେ । ଏହା ଶରୀର ପାଇଁ ଖୁବ ଉପଯୋଗୀ । ଅନେକ ବ୍ରତଧାରୀ ସାବୁଦାନା ଖାଇଥାନ୍ତି । ଏହା ମଧ୍ୟ ଶରୀର ପାଇଁ ହିତକର । ଆପଣ ସାବୁଦାନାର ଖେଚୁଡି ମଧ୍ୟ ପ୍ରସ୍ତୁତ କରି ଖାଇପାରିବେ ।
କେଉଁ ଖାଦ୍ୟ ଖାଇବେ ନାହିଁ:
ବ୍ରତ ସମୟରେ କୌଣସି ମସଲାଯୁକ୍ତ ଖାଦ୍ୟ ଖାଆନ୍ତୁ ନାହିଁ । ଏହାଦ୍ବାରା ଆପଣଙ୍କୁ ଏସିଡିଟି ହୋଇପାରେ । ରକ୍ତଚାପ ମଧ୍ୟ ବଢିବାର ଆଶଙ୍କା ରହିଥାଏ । ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି ଡିହାଇଡ୍ରେସନରୁ ରକ୍ଷା ପାଇବାକୁ ପ୍ରଚୁର ପରିମାଣରେ ପାଣି ପିଅନ୍ତୁ ।
