ହାଇଦ୍ରାବାଦ: କ୍ରୋଧ ହେଉଛି ବ୍ରହ୍ମଚଣ୍ଡାଳ । ଜଣେ ବ୍ୟକ୍ତି କ୍ରୋଧିତ ଥିବା ସମୟରେ ନିଜର ହିତାହିତ ଜ୍ଞାନକୁ ଭୁଲିଯାଇ ନିଜ ଅଜାଣତରେ ଅନେକ କାଣ୍ଡ ଘଟାଇ ବସେ । ଫଳରେ ସେ ନିଜ ସହ ଅନ୍ୟକୁ ମଧ୍ୟ କ୍ଷତି ପହଞ୍ଚାଇ ଥାଏ । ସମସ୍ତେ କିଛି କଥାକୁ ନେଇ କ୍ରୋଧିତ ହୁଅନ୍ତି, ମାତ୍ର ଏମିତି କିଛି ଲୋକ ଅଛନ୍ତି ଯେଉଁମାନଙ୍କର ଟିକିଏ ଟିକିଏ କଥାରେ ନାକ ଅଗରେ ରାଗ । ଯଦି ଆପଣ ବି ଛୋଟ ଛୋଟ କଥାକୁ ନେଇ ରାଗି ଯାଉଛନ୍ତି, ତେବେ ଏହା ଆପଣଙ୍କ ପାଇଁ ନିହାତି ଜାଣିବା ଦରକାର ଯେ, ଆପଣ କାହିଁକି ଏତେ କ୍ରୋଧିତ ହେଉଛନ୍ତି । ଚାପ, ଚିନ୍ତା, ଅସୁସ୍ଥତା ମଧ୍ୟ କ୍ରୋଧର କାରଣ ହୋଇପାରେ । କିନ୍ତୁ ବିଶେଷଜ୍ଞମାନେ କହିଛନ୍ତି ଯେ, କେବଳ ଏତିକି ନୁହେଁ ଆମେ ଖାଉଥିବା ଖାଦ୍ୟ ମଧ୍ୟ କ୍ରୋଧର କାରଣ ହୋଇପାରେ । ତେବେ ଆସନ୍ତୁ ଜାଣିବା କେଉଁ ଖାଦ୍ୟ ଖାଇବା ଦ୍ବାରା ରାଗ ଅଧିକ ହୋଇଥାଏ ।
ଲୁଣ: ବିଶେଷଜ୍ଞମାନେ କହିଛନ୍ତି ଯେ, ଅଧିକ ଲୁଣ ଥିବା ଖାଦ୍ୟ ଏବଂ ସ୍ନାକ୍ସ କ୍ରୋଧକୁ ବଢାଇପାରେ । ଅତ୍ୟଧିକ ସୋଡିୟମ୍ ରକ୍ତଚାପ ବୃଦ୍ଧି କରାଥାଏ, ଯାହା ଉଭୟ ଶାରୀରିକ ଏବଂ ମାନସିକ ସୁସ୍ଥତା ଉପରେ ପ୍ରଭାବ ପକାଇଥାଏ । ତେଣୁ ଅତ୍ୟଧିକ ଲୁଣ ଖାଇବା ଠାରୁ ଦୂରେଇ ରହିବା ପାଇଁ ପରାମର୍ଶ ଦିଆଯାଇଛି ।
କଫିନ: ଅଧିକାଂଶ ଲୋକଙ୍କ ଦିନ କପେ କଫିରୁ ଆରମ୍ଭ ହୋଇଥାଏ । କିନ୍ତୁ ବିଶେଷଜ୍ଞମାନେ କହିଛନ୍ତି ଯେ, କଫିରେ ଅଧିକ ପରିମାଣର କଫିନ ଥାଏ । କଫିନ୍ ଯୁକ୍ତ ଖାଦ୍ୟ ମଧ୍ୟ କ୍ରୋଧର କାରଣ ହୋଇପାରେ । ଅଧିକ କଫି ପିଇବା ଦ୍ବାରା ଶରୀରରେ କଫିନର ପରିମାଣ ବୃଦ୍ଧି ପାଇଥାଏ । ଫଳରେ ଚିନ୍ତା, ଚାପ ଏବଂ କ୍ରୋଧ ଭଳି ମାନସିକ ସମସ୍ୟା ସୃଷ୍ଟି ହୋଇଥାଏ ।
2016ରେ ଜର୍ଣ୍ଣାଲ୍ ଅଫ୍ କ୍ଲିନିକାଲ୍ ସାଇକାଟ୍ରିରେ ପ୍ରକାଶିତ ଏକ ଅଧ୍ୟୟନ ଅନୁଯାୟୀ, କଫିନ ଖାଇବା ଦ୍ବାରା ଚିନ୍ତା, ଉଦାସୀନତା, କ୍ରୋଧ ଏବଂ ମାନସିକ ବ୍ୟାଧି ଭଳି ସମସ୍ୟା ସୃଷ୍ଟି ହୋଇପାରେ । ଏହି ଅନୁସନ୍ଧାନରେ ଯୁକ୍ତରାଷ୍ଟ୍ରର ଡ୍ୟୁକ୍ ୟୁନିଭରସିଟି ସ୍କୁଲ୍ ଅଫ୍ ମେଡିସିନର ସାଇକ୍ରେଟ୍ରି ବିଭାଗର ଡକ୍ଟର ଆଡ୍ରିଏନା ଶେଲଡନ୍ ଅଂଶଗ୍ରହଣ କରିଥିଲେ।
ମଦ୍ୟପାନ: ବିଶେଷଜ୍ଞମାନେ କହିଛନ୍ତି ଯେ, ମଦ୍ୟପାନ ମଧ୍ୟ କ୍ରୋଧକୁ ବଢ଼ାଇପାରେ । ଯେଉଁମାନେ ଅଧିକ ମଦ୍ୟପାନ କରନ୍ତି ସେମାନଙ୍କ ପାଖରେ କ୍ରୋଧ ଏବଂ ମାନସିକ ସମସ୍ୟା ବହୁତ ବଢ଼ିଥାଏ । ଏହାର କାରଣ ମଦ୍ୟପାନ ମସ୍ତିଷ୍କରେ ନ୍ୟୁରୋଟ୍ରାନ୍ସମିଟରର ସନ୍ତୁଳନକୁ ବାଧା ଦେଇଥାଏ । ତେଣୁ ଅତ୍ୟଧିକ ମଦ୍ୟପାନଠାରୁ ଦୁରେଇ ରହିବା ପାଇଁ ବିଶେଷଜ୍ଞମାନେ ପରାମର୍ଶ ଦେଇଛନ୍ତି ।
ଚିନି ମିଶ୍ରିତ ଖାଦ୍ୟ: ବିଶେଷଜ୍ଞମାନେ କହିଛନ୍ତି ଯେ, ଅଧିକ ଚିନି ମିଶିଥିବା ଖାଦ୍ୟ ମଧ୍ୟ କ୍ରୋଧକୁ ବଢ଼ାଇଥାଏ । କ୍ୟାଣ୍ଡି, ଚକୋଲେଟ୍, ମୃଦୁ ପାନୀୟ ଏବଂ ମିଠା ସହିତ ଅଧିକ ଚିନିଯୁକ୍ତ ଖାଦ୍ୟ ରକ୍ତରେ ଶର୍କରା ସ୍ତର ବୃଦ୍ଧି କରିଥାଏ । ଯାହା ଚିଡିଚିଡା ଲାଗିବା ସହ ସାମାନ୍ୟ କଥାରେ କ୍ରୋଧିତ ହେବା ଭଳି ସମସ୍ୟା ଦେଖାଦିଏ । ଏହାସହ ଅଧିକ ଚିନି ଖାଇବା ସ୍ୱାସ୍ଥ୍ୟ ଉପରେ ମଧ୍ୟ କ୍ଷତି ପହଞ୍ଚାଇପାରେ ।
ଏହି ୱେବସାଇଟରେ ଆପଣଙ୍କୁ ଦିଆଯାଇଥିବା ସମସ୍ତ ସ୍ୱାସ୍ଥ୍ୟ ସୂଚନା, ଡାକ୍ତରୀ ଟିପ୍ସ ଏବଂ ପରାମର୍ଶ କେବଳ ଆପଣଙ୍କ ସୂଚନା ପାଇଁ । ବୈଜ୍ଞାନିକ ଅନୁସନ୍ଧାନ, ଅଧ୍ୟୟନ ଓ ସ୍ବାସ୍ଥ୍ୟ ବିଶେଷଜ୍ଞଙ୍କ ପରାମର୍ଶ ଉପରେ ଆଧାର କରି ଆମେ ଏହି ସୂଚନା ପ୍ରଦାନ କରୁଛୁ ।
