ଭୁବନେଶ୍ବର: ବୟସ ବଢିବା ସହ ହାତ ଗୋଡ ଥରିବା ଭଳି ସମସ୍ୟା ଦେଖାଯିବା ଏକ ସାଧାରଣ କଥା । ହେଲେ କମ୍ ବୟସରୁ କିମ୍ବା ଛୋଟ ଛୁଆଙ୍କ କ୍ଷେତ୍ରରେ ମଧ୍ୟ ଏହି ସମସ୍ୟା ଦେଖାଯାଇପାରେ । ଅନେକ ଲୋକଙ୍କ ଧାରଣା ରହିଛି, ଶାରିରୀକ ଦୁର୍ବଳତା କାରଣରୁ ଏପରି ହୋଇଥାଏ । ଏହା ସମ୍ପୂର୍ଣ୍ଣ ଠିକ୍ ନୁହେଁ । ହାତ ଗୋଡ ଥରିବା ପଛରେ ଅନ୍ୟ କାରଣ ଥାଇପାରେ । ଛୋଟ ଛୁଆଠାରୁ ନେଇ ବୟସ୍କ ପର୍ଯ୍ୟନ୍ତ ଏହି ଥରା ରୋଗ ହୋଇପାରେ । ବୟସ୍କ ଲୋକଙ୍କଠାରେ ହେଉଥିବା ଥରା ରୋଗକୁ 'ପାର୍କିନସନ୍ସ ରୋଗ' କୁହାଯାଏ । ଏହା ଏକ ମସ୍ତିଷ୍କ ରୋଗ । ଏହି ରୋଗରେ ଗୋଟିଏ ହାତ ଥରିବା କିମ୍ବା ଗୋଡ ଥରିବା ଭଳି ଲକ୍ଷଣ ଦେଖାଯାଏ । ପାର୍କିନସନ୍ ରୋଗ ସାଧାରଣତଃ 60 ବର୍ଷ ପରେ ହୁଏ । ଏହି ରୋଗ ହେଲେ ଦେହ ହାତ ଥରିବା, ସନ୍ତୁଳନ ଓ ସମନ୍ବୟ ରକ୍ଷା କରିବାରେ ସମସ୍ୟା ସୃଷ୍ଟି ହୋଇଥାଏ ।
ଇସେନସିଆଲ ଟ୍ରେମୋର:
ସେହିପରି କମ୍ ବୟସରେ ହେଉଥିବା ଥରା ରୋଗକୁ ଇସେନସିଆଲ ଟ୍ରେମୋର (Essential Tremor) କୁହନ୍ତି । ନ୍ୟୁରୋଲୋଜିଷ୍ଟ ଡାକ୍ତର ଆକାଶ ଅଗ୍ରୱାଲ କହିଛନ୍ତି, ଏହା ବିଶେଷ କରି ଛୋଟ ଛୁଆ ଓ ଯୁବକଙ୍କ ମଧ୍ୟରେ ଦେଖାଯାଏ । ଏହି ରୋଗ ବଂଶାନୁକ୍ରମିକ ହୋଇପାରେ । ଅର୍ଥାତ୍ ବାପାମାଆ କିମ୍ବା ପରିବାରରେ କାହାକୁ ଥିଲେ ପିଲାକୁ ବି ହୋଇପାରେ । ଏଥିରେ କୌଣସି କାର୍ଯ୍ୟ କରିବାକୁ ଚେଷ୍ଟା କରିବା ବେଳେ, ଖାଇବା କିମ୍ବା କିଛି ଜିନିଷ ଧରିବାକୁ ଚେଷ୍ଟା କରୁଥିଲେ ହାତ ଅଧିକ ଥରିଥାଏ । ଫଳରେ କାର୍ଯ୍ୟ କରିବାରେ ସମସ୍ୟା ହୋଇଥାଏ ।
ଅନେକ ଲୋକ ପାର୍କିନସନ୍ସ ଓ ଇସେନସିଆଲ ଟ୍ରେମୋର ସମାନ ବୋଲି ଭାବିଥାନ୍ତି । ମାତ୍ର ଏହି ଦୁଇଟି ଭିନ୍ନ ଅବସ୍ଥା । ପାର୍କିନସନ୍ସ ରୋଗରେ ହାତ ସ୍ଥିର ରହିଥିଲେ ଅର୍ଥାତ୍ କୌଣସି କାମ କରୁନଥିବା ସମୟରେ ଅଧିକ ଥରିଥାଏ । ଇସେନସିଆଲ ଟ୍ରେମୋରରେ କୌଣସି କାର୍ଯ୍ୟ କରିବାକୁ ଚେଷ୍ଟା କରିବା ସମୟରେ ଏହା ଦେଖାଯାଏ ।
ପାର୍କିନସନ୍ସ ରୋଗର ଲକ୍ଷଣ:-
୧. ହାତ ଗୋଡ ଥରିବା ଓ ଧିମା ପଡ଼ିଯିବା
୨. ଯନ୍ତ୍ରଣା ହେବା
୩. ଚାଲିବା ଧିମା ହୋଇଯିବା
୪. ବାରମ୍ବାର ଖସି ପଡିବା
ସାଧାରଣତଃ ୬୦ ବର୍ଷରୁ ଅଧିକ ବୟସ୍କ ଲୋକଙ୍କ କ୍ଷେତ୍ରରେ ଏହି ରୋଗ ଦେଖାଯାଇଥାଏ । ବୟସ ବଢିବା ସହ ଏହି ରୋଗ ବି ବଢି ବଢି ଚାଲେ । ଇସେନସିଆଲ ଟ୍ରେମୋରରେ କେବଳ ହାତ ଗୋଡ ଥରିବା ଲକ୍ଷଣ ରହିଥାଏ । ଏହି ରୋଗ ଛୋଟ ଛୁଆ, ବୟସ୍କ ଲୋକଙ୍କୁ ମଧ୍ୟ ହୋଇପାରେ ।
କାହିଁକି ହୁଏ ଥରା ରୋଗ ଓ ଏହାର ଚିକିତ୍ସା :-
ଡାକ୍ତର ଆକାଶ ଅଗ୍ରୱାଲ କହିଛନ୍ତି ଯେ, ଇସେନସିଆଲ ଟ୍ରେମୋରରେ ବିଶେଷ ଭାବେ ଯଦି ଜଣେ ବ୍ୟକ୍ତି ଅତ୍ୟଧିକ ରାଗିଯାଏ କିମ୍ବା ଟେନସନରେ ରହିଥାଏ ଏହି ସମୟରେ ଥରିବା ଅଧିକ ବଢିଯାଏ । ଏହି ରୋଗ ଭଲ ପାଇଁ ଡାକ୍ତରଙ୍କ ପରାମର୍ଶରେ ଔଷଧ ଖାଇପାରିବେ । ଏହାର ସର୍ଜରୀ ମଧ୍ୟ ରହିଛି । ଏହି ରୋଗ ପ୍ରଭାବ କମାଇବା ପାଇଁ ସ୍ବାସ୍ଥ୍ୟକର ଜୀବନଶୈଳୀ ଆପଣାଇବା ଉଚିତ୍ । ନିୟମିତ ବ୍ୟାୟାମ କରିବା ସହ ସ୍ବାସ୍ଥ୍ୟକର ଆହାର ଗ୍ରହଣ କରିବା ଆବଶ୍ୟକତା ରହିଛି ବୋଲି କହିଛନ୍ତି ଡାକ୍ତର ।
ଏସବୁ ରୋଗର ଲକ୍ଷଣ ହୋଇପାରେ ଥରିବା:
ଅନ୍ୟ କିଛି ସ୍ବାସ୍ଥ୍ୟ ସମସ୍ୟା ଥିଲେ ମଧ୍ୟ ଥରିବା ଭଳି ଲକ୍ଷଣ ଦେଖାଯାଇଥାଏ । ଯେମିତିକି-
ରକ୍ତହୀନତା: ଶରୀରରେ ଅଧିକ ମାତ୍ରାରେ ରକ୍ତହୀନତା ଦେଖାଗଲେ ଗୋଡ ଓ ହାତ ଥରିବା ଆରମ୍ଭ କରିଥାଏ । ଏନିମିଆ (ରକ୍ତହୀନତା) ପାଇଁ ଶରୀର ଦୁର୍ବଳ ଲାଗେ । ଏଥିପାଇଁ ନିଜ ଖାଦ୍ୟପେୟ ଉପରେ ବିଶେଷ ଧ୍ୟାନ ଦେବା ସହ ରକ୍ତ ପରୀକ୍ଷା କରାଇବା ଆବଶ୍ୟକ ।
ମଧୁମେହ: ଦେହ ଥରିବା ମଧୁମେହ ରୋଗର ଲକ୍ଷଣ ମଧ୍ୟ ହୋଇପାରେ । ଶରୀରରେ ଶର୍କରା ସ୍ତର କମ୍ କିମ୍ବା ଅତ୍ୟଧିକ ରହିଲେ ଚାପ ବଢ଼ିଯାଏ । ଯାହାଫଳରେ ହାତ ଗୋଡ ଥରିବା ଆରମ୍ଭ ହୋଇଥାଏ । ଏଭଳି ଲକ୍ଷଣ ଦେଖାଯିବା ମାତ୍ରେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ଉଚିତ୍ ।
ରକ୍ତଚାପ: ରକ୍ତଚାପ ସ୍ବାଭାବିକ ନ ରହିଲେ ମଧ୍ୟ ଦେହ ଥରିବା ଭଳି ଲକ୍ଷଣ ଦେଖାଯାଏ । ରକ୍ତଚାପ ବଢ଼ିଲେ କିମ୍ବା କମିଲେ ଗୋଡ଼ ହାତ ଥରିଥାଏ । ଯଦି ଲଗାତର ଆପଣଙ୍କ ରକ୍ତଚାପ ସମସ୍ୟା ରହୁଛି ନିହାତି ଭାବେ ଡାକ୍ତରଙ୍କ ପରାମର୍ଶ ନିଅନ୍ତୁ ।
ଇଟିଭି ଭାରତ, ଭୁବନେଶ୍ବର
