ବେଙ୍ଗାଲୁରୁ: ଆପଣ ଗୁପଚୁପ ଖାଇବାକୁ ପସନ୍ଦ କରନ୍ତି କି ? ହୋଇଯାଆନ୍ତୁ ସାବଧାନ । ଗୁପଚୁପ ଖାଇଲେ ହୋଇପାରେ କ୍ୟାନସର । ରାସ୍ତାକଡ ହେଉ କିମ୍ବା ଯେକୌଣସି ରେଷ୍ଟୁରାଣ୍ଟ, ହେଉ ଗୁପଚୁପ ଖାଇବା ପୂର୍ବରୁ ଆପଣ ହୋଇଯାଆନ୍ତୁ ସତର୍କ । କାରଣ ଆପଣ ଯେଉଁ ଗୁପଚୁପ ଖାଉଛନ୍ତି ସେଥିରେ ମିଶାଯାଉଛି ମାରାତ୍ମକ କେମିକାଲ ! ଏହି କେମିକାଲ ଯୁକ୍ତ ଗୁପଚୁପ କ୍ୟାନସରର କାରଣ ହୋଇପାରେ ବୋଲି ନିକଟରେ କର୍ଣ୍ଣାଟକରେ ଖାଦ୍ୟ ସୁରକ୍ଷା ଅଧିକାରୀ ଯାଞ୍ଚ କରିବା ପରେ କହିଛନ୍ତି ।
ଷ୍ଟ୍ରିଟ ଫୁଡ ଭିତରେ ସମସ୍ତଙ୍କ ଅତି ପ୍ରିୟ ଗୁପଚୁପ । ହେଲେ ଏହି ଗୁପଚୁପ ଖାଇବା କେତେ ମାରାତ୍ମକ ସାଜିପାରେ ତାହା କର୍ଣ୍ଣାଟକରେ ଖାଦ୍ୟ ନିରାପତ୍ତା ଅଧିକାରୀଙ୍କ ଯାଞ୍ଚ ପରେ ଜଣାପଡିଛି । ଖାଦ୍ୟ ସୁରକ୍ଷା ଅଧିକାରୀଙ୍କ ପକ୍ଷରୁ ପ୍ରକାଶିତ ରିପୋର୍ଟ ଅନୁଯାୟୀ, ନିକଟରେ କର୍ଣ୍ଣାଟକରେ କିଛି ଗୁପଚୁପ ସାମ୍ପଲ ସଂଗ୍ରହ କରାଯାଇଥିଲା । ସେଥିମଧ୍ୟରୁ ପାଖାପାଖି ୨୨ ପ୍ରତିଶତ ଗୁପଚୁପରେ ଖାଦ୍ୟର ସର୍ବନିମ୍ନ ଗୁଣବତ୍ତା ନଥିବା ଯାଞ୍ଚରୁ ଜଣାପଡିଛି । ୨୬୦ ସାମ୍ପଲ ସଂଗ୍ରହ କରାଯାଇଥିବା ବେଳେ ସେଥିମଧ୍ୟରୁ ୪୧ ସାମ୍ପଲରେ କୃତ୍ରିମ ରଙ୍ଗ ଓ କେମିକାଲ ମିଶାଯାଇଥିବା ଜଣାପଡିଛି । ଯାହା କ୍ୟାନସର ଭଳି ମାରାତ୍ମକ ରୋଗର କାରଣ ସାଜିପାରେ । ଅନ୍ୟ ୧୮ଟି ନମୂନା ଯାଞ୍ଚ ବେଳେ ଏହା ମଣିଷ ଶରୀର ପାଇଁ ଉପଯୋଗୀ ନୁହେଁ ବୋଲି ଜଣାପଡିଛି ।
