ବେଙ୍ଗାଲୁରୁ: ଆପଣ ଗୁପଚୁପ ଖାଇବାକୁ ପସନ୍ଦ କରନ୍ତି କି ? ହୋଇଯାଆନ୍ତୁ ସାବଧାନ । ଗୁପଚୁପ ଖାଇଲେ ହୋଇପାରେ କ୍ୟାନସର । ରାସ୍ତାକଡ ହେଉ କିମ୍ବା ଯେକୌଣସି ରେଷ୍ଟୁରାଣ୍ଟ, ହେଉ ଗୁପଚୁପ ଖାଇବା ପୂର୍ବରୁ ଆପଣ ହୋଇଯାଆନ୍ତୁ ସତର୍କ । କାରଣ ଆପଣ ଯେଉଁ ଗୁପଚୁପ ଖାଉଛନ୍ତି ସେଥିରେ ମିଶାଯାଉଛି ମାରାତ୍ମକ କେମିକାଲ ! ଏହି କେମିକାଲ ଯୁକ୍ତ ଗୁପଚୁପ କ୍ୟାନସରର କାରଣ ହୋଇପାରେ ବୋଲି ନିକଟରେ କର୍ଣ୍ଣାଟକରେ ଖାଦ୍ୟ ସୁରକ୍ଷା ଅଧିକାରୀ ଯାଞ୍ଚ କରିବା ପରେ କହିଛନ୍ତି ।
ଷ୍ଟ୍ରିଟ ଫୁଡ ଭିତରେ ସମସ୍ତଙ୍କ ଅତି ପ୍ରିୟ ଗୁପଚୁପ । ହେଲେ ଏହି ଗୁପଚୁପ ଖାଇବା କେତେ ମାରାତ୍ମକ ସାଜିପାରେ ତାହା କର୍ଣ୍ଣାଟକରେ ଖାଦ୍ୟ ନିରାପତ୍ତା ଅଧିକାରୀଙ୍କ ଯାଞ୍ଚ ପରେ ଜଣାପଡିଛି । ଖାଦ୍ୟ ସୁରକ୍ଷା ଅଧିକାରୀଙ୍କ ପକ୍ଷରୁ ପ୍ରକାଶିତ ରିପୋର୍ଟ ଅନୁଯାୟୀ, ନିକଟରେ କର୍ଣ୍ଣାଟକରେ କିଛି ଗୁପଚୁପ ସାମ୍ପଲ ସଂଗ୍ରହ କରାଯାଇଥିଲା । ସେଥିମଧ୍ୟରୁ ପାଖାପାଖି ୨୨ ପ୍ରତିଶତ ଗୁପଚୁପରେ ଖାଦ୍ୟର ସର୍ବନିମ୍ନ ଗୁଣବତ୍ତା ନଥିବା ଯାଞ୍ଚରୁ ଜଣାପଡିଛି । ୨୬୦ ସାମ୍ପଲ ସଂଗ୍ରହ କରାଯାଇଥିବା ବେଳେ ସେଥିମଧ୍ୟରୁ ୪୧ ସାମ୍ପଲରେ କୃତ୍ରିମ ରଙ୍ଗ ଓ କେମିକାଲ ମିଶାଯାଇଥିବା ଜଣାପଡିଛି । ଯାହା କ୍ୟାନସର ଭଳି ମାରାତ୍ମକ ରୋଗର କାରଣ ସାଜିପାରେ । ଅନ୍ୟ ୧୮ଟି ନମୂନା ଯାଞ୍ଚ ବେଳେ ଏହା ମଣିଷ ଶରୀର ପାଇଁ ଉପଯୋଗୀ ନୁହେଁ ବୋଲି ଜଣାପଡିଛି ।
ସୂଚନା ଅନୁଯାୟୀ, ରାଜ୍ୟରେ ଗୁପଚୁପର ଗୁଣବତ୍ତା ସଠିକ ନଥିବା ନେଇ କର୍ଣ୍ଣାଟକ ଖାଦ୍ୟ ସୁରକ୍ଷା ଅଧିକାରୀଙ୍କ ନିକଟକୁ ଏକାଧିକ ଅଭିଯୋଗ ଆସିବା ପରେ ଏନେଇ ତଦନ୍ତ କରାଯାଇଥିଲା । ରାସ୍ତା କଡରେ ବିକ୍ରି ହେଉଥିବା ଗୁପଚୁପ ଷ୍ଟଲଠୁ ଆରମ୍ଭ କରି ନାମିଦାମୀ ରେଷ୍ଟ୍ରୁରାଣ୍ଟ ଗୁଡିକରୁ ନମୂନା ସଂଗ୍ରହ କରାଯାଇ ଯାଞ୍ଚ କରାଯାଇଥିଲା । ଯାଞ୍ଚ ବେଳେ ସାଂଘାତିକ ତଥ୍ୟ ସାମ୍ନାକୁ ଆସିଥିଲା । ଏଥିରେ କୃତ୍ରିମ ରଙ୍ଗ ଓ କେମିକାଲ ମିଶା ଯାଉଥିବା ବେଳେ ଏହା କ୍ୟାନସର ଭଳି ରୋଗ ସୃଷ୍ଟି କରିପାରେ ବୋଲି ଜଣାପଡିଛି । ଏହି ଗୁପଚୁପ ମଣିଷ ଶରୀର ପାଇଁ ଉପଯୋଗୀ ନୁହେଁ ବୋଲି ଅଧିକାଂଶ ନମୂନା ଯାଞ୍ଚ ବେଳେ ଜଣାପଡିଥିଲା ।
ସୂଚନା ଯୋଗ୍ୟ, କିଛି ଦିନ ତଳେ କର୍ଣ୍ଣାଟକ ସରକାର ଫୁଡ କଲର ରୋଡାମାଇନ-ବିକୁ ରାଜ୍ୟରେ ବ୍ୟାନ କରିଥିଲେ । ଏହାକୁ ଯିଏ ବ୍ୟବହାର କରିବ ତାହା ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସ୍ୱାସ୍ଥ୍ୟ ମନ୍ତ୍ରୀ ଦିନେଶ ଗୁଣ୍ଡୁ ରାଓ ଚେତାବନୀ ଦେଇଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
