ମୁମ୍ବାଇ: ଆଜି ଆନନ୍ଦ, କୃତଜ୍ଞତା ଓ ଏକତାର ପର୍ବ ଇଦ-ଉଲ-ଫିତର । ମୁସଲିମ ଧର୍ମାବଲମ୍ବୀଙ୍କ ଲାଗି ଏହି ଦିନର ରହିଛି ବେଶ ସ୍ବତନ୍ତ୍ରତା । ତେବେ ପ୍ରତି ବର୍ଷ ପରି ଏବର୍ଷ ମଧ୍ୟ ଇଦରେ ମନ୍ନତ ବାଲକୋନିରୁ ଦେଶବାସୀଙ୍କୁ ଇଦର ଶୁଭେଚ୍ଛା ଜଣାଇଛନ୍ତି ବଲିଉଡ଼ ବାଦଶାହ ଶାହାରୁଖ ଖାନ । ନିଜ ବାସଭବନରୁ ହାତ ହଲାଇ ଫ୍ୟାନ୍ସଙ୍କୁ ଶୁଭେଚ୍ଛା ଜଣାଇଛନ୍ତି ଶାହାରୁଖ । ଇଦରେ ନିଜ ପ୍ରିୟ ଅଭିନେତାଙ୍କ ଝଲକ ପାଇଁ ମନ୍ନତ ଆଗରେ ଫ୍ୟାନ୍ସ ପ୍ରବଳ ଭିଡ଼ ଜମାଇଥିଲେ ।
ସ୍ବପ୍ନ ନଗରୀ ମୁମ୍ବାଇର ବାନ୍ଦ୍ରାଠାରେ ରହିଛି ଶାହାରୁଖଙ୍କ ବାସଭବନ ମନ୍ନତ । ପ୍ରତିବର୍ଷ ଏକ ପରମ୍ପରା ଭଳି ଶାହାରୁଖ ଇଦ ଦିନ ମନ୍ନତରୁ ଫ୍ୟାନ୍ସଙ୍କୁ ଶୁଭେଚ୍ଛା ଜଣାଇଥାନ୍ତି । ଏଥିଲାଗି ଫ୍ୟାନ୍ସ ମଧ୍ୟ ମନ୍ନତ ଆଗରେ ଭିଡ଼ ଜମାଇଥାନ୍ତି । ଆଜି ଶାହାରୁଖ ଇଦର ଶୁଭେଚ୍ଛା ଜଣାଇବା ସମୟର ଦୃଶ୍ୟ ନିଜ ଇନଷ୍ଟାଗ୍ରାମ ହ୍ୟାଣ୍ଡେଲରେ ସେୟାର କରିଛନ୍ତି । ଯେଉଁଠି ସେ ବାଲକୋନିକୁ ଆସି ହାତ ହଲାଇ ଫ୍ୟାନ୍ସଙ୍କୁ ଶୁଭେଚ୍ଛା ଜଣାଇଛନ୍ତି । ଏହି ସମୟରେ କିଙ୍ଗ ଖାନ ଧଳା ରଙ୍ଗର କୁର୍ତ୍ତା ପଜାମା ପିନ୍ଧିଥିବା ଦେଖିବାକୁ ମିଳିଛି । ଏହି ଭିଡିଓ ସେୟାର କରି ଶାହାରୁଖ କ୍ୟାପସନରେ ଲେଖିଛନ୍ତି, " ସମସ୍ତଙ୍କୁ ଇଦର ଶୁଭେଚ୍ଛା । ମୋ ଦିନକୁ ଅଧିକ ରଙ୍ଗୀନ କରିଥିବାରୁ ସମସ୍ତଙ୍କୁ ଧନ୍ୟବାଦ । ଆହ୍ଲା ଆପଣଙ୍କୁ ଖୁସି, ପ୍ରେମ ଓ ସମୃଦ୍ଧ ସହିତ ଆଶୀର୍ବାଦ କରନ୍ତୁ ।"
ଏହା ବି ପଢନ୍ତୁ- ଇଦରେ ଫ୍ୟାନ୍ସଙ୍କୁ ଭେଟି, ନୂଆ ଫିଲ୍ମ ଟାଇଟଲ୍ ଘୋଷଣା କଲେ ଭାଇଜାନ
ଶାହାରୁଖ ମନ୍ନତ ବାଲକୋନିକୁ ଆସିବା ପରେ ବାହାରେ ତାଙ୍କୁ ଅପେକ୍ଷା କରିଥିବା ଫ୍ୟାନ୍ସ ମାନେ ଜୋରରେ ଶବ୍ଦ କରି ଚିଅର କରିଥିବା ଦେଖିବାକୁ ମିଳିଥିଲା । ସମସ୍ତେ ହାତରେ ଧରିଥିବା ମୋବାଇଲରେ ଶାହାରୁଖଙ୍କ ଟିକିଏ ଝଲକକୁ କ୍ୟାପଚର କରିବାରେ ଲାଗିପଡ଼ିଥିଲେ । କିଙ୍ଗ ଖାନ ସଲାମ ଓ ନମସ୍ତେ ସହିତ ଫ୍ୟାନ୍ସଙ୍କୁ ଶୁଭେଚ୍ଛା ଜଣାଇଥିବା ମଧ୍ୟ ଦେଖିବାକୁ ମିଳିଥିଲା ।
ଅନ୍ୟପଟେ ଶାହାରୁଖଙ୍କ ୱାର୍କଫ୍ରଣ୍ଟ ସମ୍ପର୍କରେ ଆଲୋଚନା କଲେ ସେ ରାଜକୁମାର ହିରାନୀଙ୍କ ନିର୍ଦ୍ଦେଶିତ ଡଙ୍କିରେ ନଜର ଆସିଥିଲେ । ଏଥିରେ ତାଙ୍କ ବିପକ୍ଷରେ ଅଭିନେତ୍ରୀ ତାପସି ପନ୍ନୁଙ୍କୁ ଦେଖିବାକୁ ମିଳିଥିଲା । ଏହି ଫିଲ୍ମଟି ବକ୍ସ ଅଫିସରେ ମଧ୍ୟ ଭଲ ବ୍ୟବସାୟ କରିଥିଲା । ନିକଟରେ ନିଜର ଆଗାମୀ ପ୍ରୋଜେକ୍ଟ ସମ୍ପର୍କରେ ଶାହାରୁଖ ଆଲୋଚନା କରିଥିଲେ । ସେ ଆଗକୁ ମଧ୍ୟ ଲିଡ୍ ରୋଲରେ ଆସିବେ ବୋଲି କହିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
