ହାଇଦ୍ରାବାଦ: କରିନା କପୁର ଖାନ, କ୍ରିତି ସାନନ ଏବଂ ତବୁଙ୍କ ଫିଲ୍ମ 'ଦ କ୍ରୁ' ବହୁତ ସମୟରୁ ଚର୍ଚ୍ଚାରେ ରହିଛି । ତେବେ ପ୍ରଥମ ଥର ପାଇଁ ଏହି ତିନି ଅଭିନେତ୍ରୀଙ୍କୁ ଏକା ସାଙ୍ଗରେ ବଡ଼ ପରଦାରେ ଦେଖିବାକୁ ମିଳିବ । ଏହି ଫିଲ୍ମର ଘୋଷଣା ପରଠାରୁ ଫ୍ୟାନ୍ସ ମାନେ ଉତ୍ସାହର ସହିତ ଫିଲ୍ମକୁ ଅପେକ୍ଷା କରିଛନ୍ତି । ଏହି ଫିଲ୍ମରେ କରୀନା, ତବୁ ଏବଂ କ୍ରିତି ତିନିଜଣ ବଲିଉଡ ଅଭିନେତ୍ରୀ ଏୟାର ହଷ୍ଟେସ୍ ଭାବେ ନଜର ଆସିବେ । ଏହାରି ମଧ୍ୟରେ ଫିଲ୍ମ 'ଦ କ୍ରୁ'ର ଟିଜର ରିଲିଜ ହୋଇଛି । ଯାହା ସୋସିଆଲ ମିଡିଆରେ ଟ୍ରେଣ୍ଡରେ ରହିଛି । ଫିଲ୍ମ'ଦ କ୍ରୁ'ରେ କମେଡିର ତଡକା ଲଗାଇବେ କପିଲ ଶର୍ମା ।
ଟିଜରଟି ତବୁଙ୍କ ଭଏସ୍ ଓଭରରୁ ଆରମ୍ଭ ହୋଇଛି । ଯେଉଁଠାରେ ସେ ଯାତ୍ରୀମାନଙ୍କୁ ଚେତାବନୀ ଦେଇଛନ୍ତି ଯେ ସେମାନଙ୍କ ପାଇଁ ଏହାକୁ ପରିଚାଳନା କରିବା ବହୁତ କଷ୍ଟକର ହେବାକୁ ଯାଉଛି । ଟିଜରରେ ତବୁ ଏକ ମଜାଳିଆ ଢଙ୍ଗରେ ଗାଳି କରୁଥିବାର ନଜର ଆସିବେ । ଗୋଟିଏ ପଟେ କରୀନା କପୁର, ତବୁ ଏବଂ କ୍ରିତି ସାନନଙ୍କ ଚମତ୍କାର ଅଭିନୟ ପ୍ରଶଂସକଙ୍କୁ ହସାଉଥିବା ବେଳେ ଅନ୍ୟପଟେ ଦିଲଜିତ ଏବଂ କପିଲ ଶର୍ମା ମଧ୍ୟ କମେଡିର ତଡକା ଲଗାଇଥିବା ନଜର ଆସିବେ।
ଏହା ମଧ୍ୟ ପଢନ୍ତୁ-'ଦ କ୍ରୁ' କାଷ୍ଟଙ୍କ ପ୍ରଥମ ଲୁକ ଆଉଟ୍, ମାର୍ଚ୍ଚ ୨୯ରେ ମୁକ୍ତିଲାଭ
ତେବେ ଫିଲ୍ମର ଟିଜର କରୀନା ତାଙ୍କ ଇନଷ୍ଟାଗ୍ରାମରେ ସେୟାର କରି ଲେଖିଛନ୍ତି ଯେ,"ତୁମର ସିଟ୍ ବେଲ୍ଟକୁ ବାନ୍ଧିଦିଅ, କାରଣ ଏଠାରେ ତାପମାତ୍ରା ତୁମ ପାଇଁ ଅତ୍ୟଧିକ ଗରମ ହେବାକୁ ଯାଉଛି । କ୍ରୁ ଟିଜର ଆଉଟ୍ ।"ଏହି ଚଳଚ୍ଚିତ୍ର ମାର୍ଚ୍ଚ ୨୯, ୨୦୨୪ରେ ରିଲିଜ ହେବ । ରାଜେଶ କୃଷ୍ଣନଙ୍କ ନିର୍ଦ୍ଦେଶିତ 'ଦ କ୍ରୁ' ରିୟା କପୁର ଏବଂ ଏକତା କପୁରଙ୍କ ପ୍ରଡକ୍ସନ ବ୍ୟାନରରେ ଫିଲ୍ମଟି ନିର୍ମିତ ହୋଇଛି । ଗତ ବର୍ଷ (୨୦୨୩)ରେ ଏହି ଚଳଚ୍ଚିତ୍ରର ଘୋଷଣା କରାଯାଇଥିଲା । ଫିଲ୍ମର ସୁଟିଂ ମୁମ୍ବାଇ ଏବଂ ଆବୁଧାବିରେ କରାଯାଇଛି । ଫିଲ୍ମର କାହାଣୀ ବିଷୟରେ କହିବାକୁ ଗଲେ, ଏହି ଚଳଚ୍ଚିତ୍ରଟି ତିନିଜଣ ମହିଳାଙ୍କ ଉପରେ ଆଧାରିତ, ଯେଉଁମାନେ ବିମାନରେ କ୍ରୁ ଭାବରେ କାର୍ଯ୍ୟ କରନ୍ତି । ତିନିଜଣ ନିଜ ଜୀବନକୁ ଆଗକୁ ନେବାକୁ ଚେଷ୍ଟା କରି ଦିନରାତି ବ୍ୟସ୍ତ ରୁହନ୍ତି । ପରେ ତିନିଜଣ ଗୋଟିଏ ଜାଲରେ ଫସି ଯାଆନ୍ତି । ଏହି ଜାଲ ଭିତରେ ପୁରା କାହାଣୀର ମୂଳ ଅଛି । ଫିଲ୍ମରେ କମେଡିର ତଡକା ମଧ୍ୟ ଲଗାଯାଇଥିବା ଜଣାପଡ଼ିଛି ।
