ହାଇଦ୍ରାବାଦ: ଫ୍ୟାନ୍ସଙ୍କ ଅପେକ୍ଷାର ହେଲା ଅନ୍ତ । ଅଲ୍ଲୁ ଅର୍ଜୁନ ଷ୍ଟାରର 'ପୁଷ୍ପା 2'ର ଆଇଟମ୍ ଗୀତ 'କିସିକ୍' ରିଲିଜ ହୋଇଛି । ପ୍ରତିଶ୍ରୁତି ଅନୁଯାୟୀ ନିର୍ମାତା ଫିଲ୍ମର ଆଇଟମ ଗୀତ ଆଜି ରିଲିଜ କରିଛନ୍ତି । ଗତକାଲି ନିର୍ମାତା ମୈତ୍ରୀ ମୁଭି ମେକର୍ସ ଫିଲ୍ମର ନୂଆ ଗୀତ 'କିସିକ୍'ର ପ୍ରମୋ ରିଲିଜ୍ କରିଥିଲେ ଏବଂ ନଭେମ୍ୱର 24ରେ ସନ୍ଧ୍ୟା 7ଟା ରେ ରିଲିଜ ହେବ ବୋଲି ସୂଚନା ଦେଇଥିଲେ । ଯାହା ପରେ ଫ୍ୟାନ୍ସ ଉତ୍ସାହର ସହ ଏହାକୁ ଅପେକ୍ଷା କରିଥିବା ବେଳେ ବର୍ତ୍ତମାନ ଗୀତ ରିଲିଜ ହୋଇଛି ।
ସାମନ୍ଥା ପରିବର୍ତ୍ତେ ଶ୍ରୀଲିଲା ଆସିବେ ନଜର
କହିରଖୁଛୁ କି, 'ପୁଷ୍ପା' ଫ୍ରାଞ୍ଚାଇଜର ପ୍ରଥମ ଭାଗ ଯଥା 'ପୁଷ୍ପା: ଦ ରାଇଜ' ଏକ ବ୍ଲକବଷ୍ଟର ବୋଲି ପ୍ରମାଣିତ ହୋଇଥିଲା । ଏଥିରେ ଆଇଟମ ଗୀତ 'ଉ ଉ ଆଣ୍ଟାୱା' ବେଶ ଲୋକପ୍ରିୟତା ସାଉଁଟିଥିଲା । ଏହି ଗୀତରେ ନିଜର ଦମଦାର ଡ୍ୟାନ୍ସ ସହ ସାମନ୍ଥା କୋଟି ଲୋକଙ୍କ ହୃଦୟ ଜିତିଥିଲେ, ବର୍ତ୍ତମାନ ସାମନ୍ଥାଙ୍କ ପରିବର୍ତ୍ତେ 'ପୁଷ୍ପା 2'ରେ ଶ୍ରୀଲିଲା ନଜର ଆସିବାକୁ ଯାଉଛନ୍ତି । ଗୀତ ‘କିସିକ୍’ ମଧ୍ୟ ଏକ ଚାର୍ଟବଷ୍ଟର ହେବ ବୋଲି ନିର୍ମାତା ଆଶା ରଖିଛନ୍ତି ।
'ପୁଷ୍ପା 2'ର ଆଇଟମ୍ ଗୀତ 'କିସିକ୍' ରିଲିଜ
'ପୁଷ୍ପା 2'ର ଆଇଟମ୍ ଗୀତ 'କିସିକ୍' ରିଲିଜ ହୋଇଥିବା କିଛି ସମୟ ମଧ୍ୟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏହି ଗୀତରେ ଡ୍ୟାନ୍ସିଂ କୁଇନ ଶ୍ରୀଲିଲାଙ୍କ ଜବରଦସ୍ତ ଡ୍ୟାନ୍ସ ଦେଖିବାକୁ ମିଳିଛି । ଏଥିସହ ଅଲ୍ଲୁ ଅର୍ଜୁନଙ୍କ ସହ ମଧ୍ୟ ଶ୍ରୀଲିଲାଙ୍କ ଜବରଦସ୍ତ ଡ୍ୟାନ୍ସ ତଡକା ଦେଖିବାକୁ ମିଳିଛି । ତେବେ ଫିଲ୍ମ ବକ୍ସ ଅଫିସରେ ଧମାକା କରିବ ବୋଲି କୁହାଯାଉଛି । ଏହି ଗୀତର ସଙ୍ଗୀତକୁ ଦେବୀ ଶ୍ରୀ ପ୍ରସାଦ ରଚନା କରିଛନ୍ତି । ଏହି ଗୀତକୁ ଲୋକେ ବେଶ ପସନ୍ଦ କରିଛନ୍ତି ଏବଂ ଏହା ଦେଖିବା ପରେ ଫିଲ୍ମ ରିଲିଜକୁ ନେଇ ଫ୍ୟାନ୍ସଙ୍କ ଉତ୍ସାହ ଦ୍ୱିଗୁଣିତ ହୋଇଛି ।
ଏହା ମଧ୍ୟ ପଢନ୍ତୁ: ଆସିଲା 'ପୁଷ୍ପା 2'ର ଟ୍ରେଲର; ପୁଣି ଦେଖିବାକୁ ମିଲିଲା ପୁଷ୍ପାରାଜଙ୍କ ସ୍ୱାଗ୍
ଏହି ଦିନ ପରଦାକୁ ଆସିବ 'ପୁଷ୍ପା 2'
ସୁକୁମାରନଙ୍କ ନିର୍ଦ୍ଦେଶିତ ଚଳଚ୍ଚିତ୍ର 'ପୁଷ୍ପା ୨' 'ପୁଷ୍ପା: ଦ ରାଇଜ'ର ସିକ୍ବେଲ ଅଟେ । ଯାହା 2021 ଡିସେମ୍ବରରେ ମୁକ୍ତିଲାଭ କରିବା ପରେ ବକ୍ସ ଅଫିସ୍ରେ ଧମାକା କରିଥିଲା । ଏହି ଚଳଚ୍ଚିତ୍ର ବେଶ ଲୋକପ୍ରିୟତା ହାସଲ କରିବା ସହ ବ୍ଲକବ୍ଲଷ୍ଟର ହୋଇଥିଲା । ତେବେ ପ୍ରଥମ ଭାଗ ପରି 2ୟ ଭାଗରେ ଅଲ୍ଲୁ ଅର୍ଜୁନ, ରଶ୍ମିକା ମନ୍ଦାନା, ଫାହାଦ୍ ଫାସିଲ, ସୁନୀଲ, ଅଜୟ, ରାଓ ରମେଶ, ଅନାସୁୟା ଏବଂ ଅନ୍ୟ କଳାକାର ନଜର ଆସିବେ । ଡିସେମ୍ବର 5, 2024 ରେ 'ପୁଷ୍ପା 2' ସାରା ବିଶ୍ୱରେ ଏକ ବଡ଼ ମୁକ୍ତିଲାଭ କରିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
