ହାଇଦ୍ରାବାଦ: ଦୀର୍ଘ ବର୍ଷର ଡେଟିଂ ପରେ ଏବେ ବିବାହ କରିବାକୁ ଯାଉଛନ୍ତି ବଲିଉଡ ଅଭିନେତା ପୁଲକିତ ସମ୍ରାଟ ଏବଂ ଅଭିନେତ୍ରୀ କ୍ରିତି ଖରବନ୍ଧା । ଖବର ଅନୁଯାୟୀ, ଏହି କପଲ ଘନିଷ୍ଠ ବନ୍ଧୁ ଏବଂ ପରିବାର ସଦସ୍ୟଙ୍କ ଉପସ୍ଥିତିରେ ପଞ୍ଜାବୀ ରୀତିନୀତିରେ ବିବାହ କରିବେ । ଏହି ଯୋଡି ମାର୍ଚ୍ଚ ୧୫ରେ ମନେସର ଏକ ହୋଟେଲରେ ସାତ ଜନ୍ମର ସାଥୀ ହେବାକୁ ପ୍ରସ୍ତୁତ ରହିଥିବା ବେଳେ ଆଜିଠାରୁ ଉଭୟଙ୍କ ବିବାହ କାର୍ଯ୍ୟକ୍ରମ ଆରମ୍ଭ ହେବ ।
ପୁଲକିତ ସମ୍ରାଟ ଏବଂ କ୍ରିତି ଖରବନ୍ଧାଙ୍କ ୱେଡିଂ ସେଡ୍ୟୁଲ ସାମ୍ନାକୁ ଆସିଛି । ସୂଚନା ଅନୁସାରେ, ଏହି କପଲ ଆଜି ଅର୍ଥାତ୍ ବୁଧବାର ମେହେନ୍ଦୀ ସେରମନିରୁ ବିବାହ ଉତ୍ସବ ଆରମ୍ଭ କରିବେ ଏବଂ ଆସନ୍ତାକାଲି ଅର୍ଥାତ୍ ଗୁରୁବାର ଉଭୟଙ୍କ ହଲଦୀ ସମାରୋହ ରହିଛି । ମାର୍ଚ୍ଚ ୧୪ର ସନ୍ଧ୍ୟାରେ ପୁଲକିତ ଏବଂ କ୍ରିତି ସେମାନଙ୍କ ଅତିଥିମାନଙ୍କ ପାଇଁ ଏକ କକଟେଲ ରାତି ଆୟୋଜନ କରିବେ ଏବଂ ଶେଷରେ ଏହି କପଲ ମାର୍ଚ୍ଚ ୧୫ରେ ପାରମ୍ପରିକ ପଞ୍ଜାବୀ ରାତିନୀତିରେ ବିବାହ କରିବେ ବୋଲି ଜଣାପଡିଛି ।
ଅତିଥି ତାଲିକା ବିଷୟରେ କହିବାକୁ ଗଲେ, ଉଭୟଙ୍କ ବିବାହରେ କେହି ବି-ଟାଉନର ସେଲିବ୍ରିଟି ଯୋଗଦେବେ ନାହିଁ । କେବଳ ନିଜ ପରିବାର ଏବଂ ଘନିଷ୍ଠ ବନ୍ଧୁଙ୍କ ଉପସ୍ଥିତିରେ ଦୁହେଁ ବିବାହ କରିବେ । ତଥାପି କିଛି ସେଲିବ୍ରିଟି ଅନ୍ତର୍ଭୁକ୍ତ ହୋଇପାରନ୍ତି ଯେଉଁମାନେ ସେମାନଙ୍କ ପରିବାର ସଦସ୍ୟ ଭାବେ ସାମିଲ ହୋଇପାରନ୍ତି । ବରୁଣ ଶର୍ମାଙ୍କ ସହିତ ଫୁକରେର ଅନ୍ୟ କଳାକାରମାନେ ଆସନ୍ତା ସପ୍ତାହରେ ଦିଲ୍ଲୀ ଯିବେ ।
ଏହା ମଧ୍ୟ ପଢନ୍ତୁ: ୧୫ରେ କ୍ରିତିଙ୍କ ହାତ ଧରିବେ ପୁଲକିତ; ବିବାହ ପ୍ରସ୍ତୁତି ଆରମ୍ଭ, ଆଲୋକରେ ଝଲସିଲା ଅଭିନେତାଙ୍କ ଘର
ପ୍ରକାଶ ଥାଉକି, ପୁଲକିତ କ୍ରିତିଙ୍କ ସହ ଦ୍ୱିତୀୟ ବିବାହ କରିବାକୁ ଯାଉଛନ୍ତି । ଏହାପୂର୍ବରୁ ପୁଲକିତ ସଲମାନ ଖାନଙ୍କ ସମ୍ପର୍କୀୟ ଭଉଣୀ ଶ୍ୱେତା ରୋହିରାଙ୍କୁ ବିବାହ କରିଥିଲେ । ଶ୍ୱେତାଙ୍କ ସହ ତାଙ୍କର ସମ୍ପର୍କ ଅଧିକ ଦିନ ତିଷ୍ଠି ନଥିଲା । ବିବାହର ମାତ୍ର ଗୋଟିଏ ବର୍ଷ ପରେ ଦୁହିଁଙ୍କର ଛାଡପତ୍ର ହୋଇଥିଲା । ଏହାପରେ ପୁଲକିତ 'ପାଗଲପନ୍ତୀ'ର ସେଟରେ କ୍ରିତିଙ୍କ ସହ ଭେଟିବା ପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା ଏବଂ ଏହି ଫିଲ୍ମର ପ୍ରମୋସନ ସମୟରେ ଅଭିନେତ୍ରୀ ଉଭୟଙ୍କ ସମ୍ପର୍କକୁ ନିଶ୍ଚିତ କରିଥିଲେ । ଦୀର୍ଘ ବର୍ଷର ଡେଟିଂ ପରେ ଏବେ ପରସ୍ପରକୁ ଜୀବନସାଥୀ କରିବାକୁ ନିଷ୍ପତ୍ତି ନେଇଛନ୍ତି ପୁଲକିତ ଏବଂ କ୍ରିତି ।
