ଭୁବନେଶ୍ୱର: ଦର୍ଶକଙ୍କୁ ବାବୁସାନଙ୍କ ଜନ୍ମଦିନର ଭେଟି । ମଙ୍ଗଳବାର ବାବୁସାନ ମହାନ୍ତି ତାଙ୍କ ୩୫ତମ ଜନ୍ମଦିନ ପାଳନ କରିଛନ୍ତି । ତେବେ ଜନ୍ମଦିନ ଅବସରରେ ନିଜ ଆଗାମୀ ଫିଲ୍ମ ଘୋଷଣା କରିଛନ୍ତି ବାବୁସାନ । ଭୁବନେଶ୍ୱରରେ ଆୟୋଜିତ ଏକ କାର୍ଯ୍ୟକ୍ରମରେ 'ସୋନକ'ର ଘୋଷଣା କରିଛନ୍ତି । ତେବେ ଖୁବଶୀଘ୍ର ଏହି ଫିଲ୍ମ ସହ ପରଦାରେ ଧମାକା କରିବାକୁ ପ୍ରସ୍ତୁତ ଅଭିନେତା ।
ଏହି ନିର୍ଦ୍ଦେଶକ ଦେବେ ନିର୍ଦ୍ଦେଶନା
ଆଦିଲକ୍ଷ୍ମୀ କନଭେନସନ୍ ଠାରେ ପ୍ରଯୋଜନା ସଂସ୍ଥା ଗୁର୍ଭି ମିଡିଆ ପକ୍ଷରୁ ବାବୁସାନଙ୍କ ଜନ୍ମଦିନ ବଡ଼ ଧୁମ୍ ଧାମରେ ପାଳନ କରାଯିବା ସହ ତାଙ୍କ ନୂଆ ଫିଲ୍ମର ଟାଇଟଲ ଘୋଷଣା କରାଯାଇଛି । ଏହି ଚଳଚ୍ଚିତ୍ର ସରଗମ୍ ତ୍ରିପାଠୀଙ୍କ ଦ୍ୱାରା ପ୍ରଯୋଜିତ ହୋଇଛି । ଶିଶିର କୁମାର ସାହୁ ଓ ପିନାକୀ ସିଂ ନିର୍ଦ୍ଦେଶନା ଦେଇଥିବା ବେଳେ ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ଗୌରବ ଆନନ୍ଦ। କାର୍ଯ୍ୟକାରୀ ପ୍ରଯୋଜକ ଅଛନ୍ତି ବିଶ୍ବଭୂଷଣ ମହାପାତ୍ର। ସିନେମାଟୋଗ୍ରାଫର ଅଛନ୍ତି ବିଭୂତି ଭୂଷଣ ବିଶ୍ୱାଳ। ଚିତ୍ରନାଟ୍ୟ ଅମିତ୍ କୁମାର ଦାଶ ଓ ଅନିଲ ବାରିକ ଲେଖିଥିବା ବେଳେ ସଂଳାପ ରଚନା କରିଛନ୍ତି ପ୍ରଣବ ପ୍ରସନ୍ନ ରଥ ।
'ସୋନକ' ଷ୍ଟାରକାଷ୍ଟ
ଏହି ଓଡ଼ିଆ ଚଳଚିତ୍ରରେ ନାୟକ ଭୂମିକାରେ ସୁପରଷ୍ଟାର ବାବୁଶାନ୍ ଥିବା ବେଳେ ନାୟିକା ଭୂମିକାରେ ଜଣେ ନବାଗତାଙ୍କୁ ଦେଖିବାକୁ ମିଳିବ । ଅନ୍ୟାନ୍ୟ ଚରିତ୍ରରେ ନଜର ଆସିବେ ଦ୍ଵିପାନ୍ଵିତ ଦାସ ମହାପାତ୍ର, ରବି ମିଶ୍ର, ବବି ମିଶ୍ର, କେକେ, ଚୌଧୁରୀ ଜୟ ପ୍ରକାଶ ଦାସ ଓ ଭାସ୍ଵତୀ ବସୁ । ତେବେ ସୋନକ ସିନେମାର ନା ଯାହା ଏକ ସଂସ୍କୃତ ଶବ୍ଦ ରୁ ଆନିତ ଏହାର ଅର୍ଥ ସୁନାରେ ତିଆରି ଜିନିଷ । ଏହି ସିନେମାରେ ସୁନାରେ ତିଆରି ଏକ ମୂଲ୍ୟବାନ ବସ୍ତୁର ଲୁଟ ଓ ସଂରକ୍ଷଣକୁ ଦେଖାଯାଇଥିବା ବେଳେ ବାବୁସାନକୁ ଆକ୍ସନ ହିରୋ ରୂପେ ଦେଖିବାକୁ ପାଇବେ ଦର୍ଶକ ।
ଭିନ୍ନ ଲୁକରେ ନଜର ଆସିଛନ୍ତି ବାବୁସାନ
ସେପଟେ ବାବୁସାନ ମହାନ୍ତି ନିଜ ଇନଷ୍ଟାଗ୍ରାମରେ ଫିଲ୍ମର ମୋଶନ ଭିଡିଓ ସେୟାର କରିଛନ୍ତି । ଏଥିରେ ବାବୁସାନଙ୍କୁ ଭିନ୍ନ ଲୁକରେ ଦେଖିବାକୁ ମିଳିଥିବା ବେଳେ ହାତରେ ଖଣ୍ଡା ଧରିଥିବାର ନଜର ଆସିଛନ୍ତି । ଏହା ସେୟାର କରି ସେ ଲେଖିଛନ୍ତି, ସୋନକ ଖୁବଶୀଘ୍ର ଆସୁଛି । ଏହା ଦେଖି ଫ୍ୟାନ୍ସ ପସନ୍ଦ କରିବା ସହ ଫିଲ୍ମକୁ ଉତ୍ସାହର ସହ ଅପେକ୍ଷା କରିଛନ୍ତି । ଫ୍ୟାନ୍ସ ବାବୁସାନଙ୍କ ଲୁକର ଖୁବ ପ୍ରଶଂସା କରିବା ସହ ତାଙ୍କୁ ଶୁଭକାମନା ଜଣାଇଛନ୍ତି ।
ଏହା ମଧ୍ୟ ପଢନ୍ତୁ: ଜନ୍ମଦିନରେ ବାବୁସାନଙ୍କୁ ପିପିଲି ଫ୍ୟାନଙ୍କ ଭେଟି, ଛାତିରେ ଆଙ୍କିଲେ ଅଭିନେତାଙ୍କ ଫଟୋ ଟାଟୁ
ଏହି ଦିନ ରିଲିଜ ହେବ 'ସୋନକ'
ଭିନ୍ନ ଏକ ଅବତାର ସହ ବାବୁସାନ ପରଦାରେ ଧମାକା କରିବାକୁ ଆସୁଥିବା ବେଳେ ଏହି ଫିଲ୍ମ ଦଶହରାରେ ରିଲିଜ ହେବ । ତେବେ ଆଇ ମା' କାହାଣୀର ଏହି କାହାଣୀଟିକୁ ବାସ୍ତବ ରୂପ ଦେଇ ଭଲ ଏକ ଚଳଚିତ୍ର ପ୍ରସ୍ତୁତିରେ ଲାଗିପଡ଼ିଛି ନିର୍ମାତା । ତେବେ ଏହି ଫିଲ୍ମ ଦର୍ଶକଙ୍କୁ ମନୋରଞ୍ଜନ ଖୋରାକ ଯୋଗାଇବ ବୋଲି ଆଶାବାଦୀ ରହିଛନ୍ତି ପ୍ରଯୋଜନା ସଂସ୍ଥା ।
ଇଟିଭି ଭାରତ, ଭୁବନେଶ୍ୱର
